అభిమాని నిరంజన్ ఇంటికి పవన్
అరుదైన జన్యుపరమైన వ్యాధితో బాధపడుతున్న నిరంజన్
ప‌వ‌న్‌ను చూడాల‌నే కోరికను నెర‌వేర్చిన ఏపీ డిప్యూటీ సీఎం
హన్మకొండ హనుమాన్ నగర్‌లోని ఇంటికి వెళ్లిన జనసేనాని
రూ. లక్ష సాయం.. తిరుమల తీర్థప్రసాదాల అందజేత
పరామర్శ అనంతరం నేరుగా భద్రకాళి ఆలయానికి పయనం
కాకతీయ,హన్మకొండ : అరుదైన జన్యుపరమైన డీఎండీ (డ్యూచెన్ మాస్కులర్ డిస్ట్రోఫీ) వ్యాధితో బాధపడుతున్న హనుమకొండకు చెందిన యువ అభిమాని పొనుగోటి నిరంజన్‌ను ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ బుధవారం స్వయంగా అతని నివాసానికి వెళ్లి పరామర్శించారు. అభిమానిగా తనను ఒక్కసారి కలవాలన్న నిరంజన్ కోరికను గౌరవిస్తూ పవన్ కళ్యాణ్ ఇంటికే వెళ్లి అతనితో ఆత్మీయంగా మాట్లాడారు. హనుమకొండలోని హనుమాన్ నగర్‌కు చెందిన 17 ఏళ్ల నిరంజన్ జన్యుపరమైన వ్యాధితో మంచానికే పరిమితమయ్యాడు. ఈ విషయం జనసేన నాయకుల ద్వారా తెలుసుకున్న పవన్ కళ్యాణ్, అతని ఇంటికి వెళ్లి ఆరోగ్య పరిస్థితిని అడిగి తెలుసుకున్నారు. నిరంజన్ తల్లిదండ్రులు పొనుగోటి రాంగోపాల్, మానసతో మాట్లాడి ప్రస్తుతం జరుగుతున్న వైద్యం, భవిష్యత్ చికిత్స అవకాశాలపై ఆరా తీశారు.
భావోద్వేగానికి గురైన జనసేనాని
నిరంజన్‌కు ధైర్యం చెబుతూ, కుటుంబ సభ్యులకు మనోధైర్యం నింపిన పవన్ కళ్యాణ్, వైద్య ఖర్చుల నిమిత్తం రూ.లక్ష ఆర్థిక సాయం అందజేశారు. అలాగే తిరుమల శ్రీ వెంకటేశ్వరస్వామి వారి తీర్థప్రసాదాలు అందించి, భగవంతుని ఆశీస్సులు ఎల్లప్పుడూ ఉండాలని ఆకాంక్షించారు. నిరంజన్‌ను చూసిన పవన్ కళ్యాణ్ తీవ్ర భావోద్వేగానికి గురయ్యారు. అతని మంచం పక్కనే కూర్చొని ఆప్యాయంగా హత్తుకుని, నుదిటిపై ముద్దు పెట్టి పలకరించారు. చిన్నప్పటి నుంచి తనకు పవన్ కళ్యాణ్ అంటే ఎంతో అభిమానం అని నిరంజన్ చెప్పడంతో ఆయన చలించిపోయారు. తిరుమల నుంచి తెప్పించిన వస్త్రాన్ని కప్పి, కళ్యాణం అక్షింతలు ఇచ్చి ఆశీర్వదించారు. నిరంజన్ ఆరోగ్యంగా ఉన్న రోజుల్లో పవన్ కళ్యాణ్‌ను అనుకరిస్తూ చేసిన డ్యాన్స్ వీడియోలు, ఫొటోలను కూడా ఆయన పరిశీలించారు.
కుటుంబ జీవనోపాధికి ఉపాధి హామీ
తనను అందరూ చోటా గబ్బర్ సింగ్ అని పిలుస్తారని నిరంజన్ చెప్పగా పవన్ కళ్యాణ్ ఆనందం వ్యక్తం చేశారు. ఈ సందర్భంగా నిరంజన్ ఒక కుక్కపిల్లను పెంచుకోవాలన్న తన కోరికను వెల్లడించగా, దానిని కొని పంపిస్తానని పవన్ కళ్యాణ్ హామీ ఇచ్చారు. ఇంటి యజమానుల అనుమ‌తి అవసరమని నిరంజన్ తండ్రి చెప్పడంతో వారితో స్వయంగా మాట్లాడారు. అలాగే నిరంజన్ కుటుంబ జీవనోపాధిపై ఆరా తీసిన పవన్ కళ్యాణ్, గతంలో వారు ఆస్పత్రి క్యాంటీన్‌లో పనిచేసిన విషయాన్ని తెలుసుకుని, కుటుంబానికి ఉపాధి కల్పించేలా క్యాంటీన్ ఏర్పాటు చేయాలని జనసేన తెలంగాణ నాయకులకు సూచించారు. నిరంజన్‌ను పరామర్శించిన అనంతరం పవన్ కళ్యాణ్ నేరుగా వరంగల్ భద్రకాళి అమ్మవారి ఆలయానికి వెళ్లి ప్రత్యేక పూజలు నిర్వహించారు. ఈ కార్యక్రమంలో జనసేన తెలంగాణ ఇన్‌చార్జ్ శంకర్ గౌడ్, పార్టీ ప్రధాన కార్యదర్శి రామ్ తాళ్లూరి, నాయకులు రాధారం రాజలింగం, ఆర్.కే. సాగర్ తదితరులు పాల్గొన్నారు.
