రూల్స్ కాగితాల‌కే ప‌రిమితం
32 ఏళ్లుగా అమలుకు నోచుకోని విద్యాశాఖ నిబంధనలు
ఉమ్మడి జిల్లాలో 900 ప్రైవేటు పాఠశాలలు
ఫీజుల వివరాలు వెబ్‌సైట్‌లో నమోదు చేయాల్సిందే
వెబ్‌సైట్‌లో ఒక రేటు.. వసూళ్లలో మరో రేటా?
రసీదుల్లో ఎంత.. వాస్తవంగా చెల్లించేది ఎంత?
కాకతీయ, నిఘాప్ర‌తినిధి : ప్రైవేటు పాఠశాలల్లో ఫీజుల వసూళ్లకు నిబంధనలు ఉన్నాయి.. పాఠశాలలు వసూలు చేసే ఫీజుల వివరాలను ప్రభుత్వానికి తెలియజేయాల్సిన విధానం ఉంది. ఫీజులపై పర్యవేక్షణ చేయాల్సిన బాధ్యత విద్యాశాఖ అధికారులదే. అయినా క్షేత్రస్థాయిలో పరిస్థితి మాత్రం మారడం లేదు. ఏటా పాఠశాలల ప్రారంభ సమయంలో ఫీజుల వ్యవహారం తెరపైకి వస్తూనే ఉంది. తల్లిదండ్రులపై ఫీజుల భారం పెరుగుతూనే ఉంది. నిబంధనలు అమలు చేయాల్సిన అధికారులు పర్యవేక్షణ చేస్తున్నారా? పాఠశాలలు నిబంధనలను పాటిస్తున్నాయా? అన్నదే ప్రశ్న. ఉమ్మడి వరంగల్ జిల్లాలోనే 900 ప్రైవేటు పాఠశాలలు ఉండటంతో ఈ వ్యవహారంపై పర్యవేక్షణ మరింత కీలకంగా మారింది.
ప్రైవేటు విద్యాసంస్థల్లో ఫీజుల వసూళ్లను క్రమబద్ధీకరించేందుకు ప్రభుత్వం 1994లోనే జీవో జారీ చేసింది. పాఠశాలలు వసూలు చేసే ఫీజుల వివరాలను విద్యాశాఖకు తెలియజేయాలన్నది ఇందులోని ప్రధాన ఉద్దేశం. ఫీజుల విషయంలో యాజమాన్యాలు ఇష్టారాజ్యంగా వ్యవహరించకుండా.. వసూలు చేస్తున్న మొత్తాలపై ప్రభుత్వానికి సమాచారం ఉండేలా ఈ విధానాన్ని రూపొందించారు. అయితే జీవో వచ్చి 32 ఏళ్లు గడిచినా.. దాని అమలు మాత్రం ఆశించిన స్థాయిలో లేదన్న విమర్శలు ఉన్నాయి. నిబంధనలు ఉన్నా వాటి అమలును నిరంతరం పర్యవేక్షించే వ్యవస్థ బలహీనంగా ఉండటంతో సమస్య యథాతథంగా కొనసాగుతోందన్న అభిప్రాయాలు వ్యక్తమవుతున్నాయి.
900 బడులపై నిఘా ఏదీ?
ఉమ్మడి వరంగల్ జిల్లాలోని ఆరు జిల్లాల్లో మొత్తం 900 ప్రైవేటు పాఠశాలలు ఉన్నట్లు గణాంకాలు చెబుతున్నాయి. ఇందులో హనుమకొండ జిల్లాలో 333, వరంగల్ జిల్లాలో 261, మహబూబాబాద్‌లో 115, జనగామలో 82, భూపాలపల్లిలో 69, ములుగులో 40 పాఠశాలలు ఉన్నాయి. ఇంత పెద్ద సంఖ్యలో పాఠశాలలు ఉన్నప్పుడు వాటిలో ఫీజుల వసూళ్లపై విద్యాశాఖ ఎంతమేరకు నిఘా పెడుతోందన్నది చర్చనీయాంశంగా మారింది. పాఠశాలలు నిబంధనల ప్రకారం ఫీజులు వసూలు చేస్తున్నాయా? వివరాలను నమోదు చేస్తున్నాయా? తల్లిదండ్రులకు పూర్తి సమాచారం ఇస్తున్నాయా? అన్న అంశాలపై అధికారులు క్రమం తప్పకుండా తనిఖీలు చేయాల్సి ఉంది. అయితే ఫిర్యాదు వచ్చినప్పుడు స్పందించడం కాకుండా.. ముందుగానే పర్యవేక్షించే విధానం ఎంతవరకు అమలవుతోందన్న ప్ర‌శ్న‌లు ఉత్ప‌న్న‌మ‌వుతున్నాయి.
వెబ్‌సైట్‌లో నమోదు తప్పనిసరి
ఫీజుల వసూళ్లలో పారదర్శకత కోసం పాఠశాలలు ఫీజుల వివరాలను ప్రభుత్వ వెబ్‌సైట్‌లో నమోదు చేయాల్సి ఉంది. ఏ పాఠశాల ఎంత ఫీజు వసూలు చేస్తోంది? ఏ తరగతికి ఎంత ఫీజు నిర్ణయించింది? అనే వివరాలు అందుబాటులో ఉండేలా చేయడమే దీని ఉద్దేశం. దీనివల్ల తల్లిదండ్రులు కూడా తమ పిల్లలు చదువుతున్న పాఠశాల ఫీజుల వివరాలను తెలుసుకునే అవకాశం ఉంటుంది. కానీ ఆ వివరాలు వాస్తవ పరిస్థితికి అద్దం పడుతున్నాయా? పాఠశాలలు వెబ్‌సైట్‌లో ఫీజుల వివరాలు నమోదు చేస్తున్నాయా? నమోదు చేసిన వివరాలను ఎప్పటికప్పుడు అప్డేట్ చేస్తున్నాయా? అన్నది పరిశీలించాల్సి ఉంది. వెబ్‌సైట్‌లో వివరాలు నమోదు చేయడం ఒక ప్రక్రియగా మిగిలిపోకుండా.. వాటి ఆధారంగానే వసూళ్లు జరుగుతున్నాయా లేదా అన్నది అధికారులు నిర్ధారించాల్సి ఉంది.
వెబ్‌సైట్‌లో ఒకటి.. వసూళ్లలో మరొకటి?
ఇదే ఇప్పుడు అసలు పరిశీలించాల్సిన అంశం. పాఠశాలలు ప్రభుత్వ వెబ్‌సైట్‌లో నమోదు చేసిన ఫీజులనే విద్యార్థుల నుంచి వసూలు చేస్తున్నాయా? లేక అదనంగా మరేదైనా మొత్తాన్ని తీసుకుంటున్నాయా? అన్నది తేలాల్సి ఉంది. వెబ్‌సైట్‌లో పేర్కొన్న ఫీజుకు, తల్లిదండ్రులు చెల్లిస్తున్న మొత్తానికి తేడా ఉంటే.. ఆ అదనపు మొత్తం ఏ పేరుతో వసూలు చేస్తున్నారన్నది ప్రశ్న. ఫీజులతో పాటు ఇతర చార్జీలు ఏమైనా ఉంటే వాటి వివరాలు కూడా పారదర్శకంగా వెల్లడించాల్సి ఉంటుంది. వెబ్‌సైట్‌లో ఒక మొత్తం చూపిస్తూ.. వాస్తవంగా మరో మొత్తం వసూలు చేస్తున్నట్లయితే నిబంధనల ఉద్దేశమే నీరుగారిపోతుంది. అందుకే కేవలం వెబ్‌సైట్‌లో వివరాలు నమోదు చేశారా లేదా అన్నది కాకుండా.. అందులో నమోదైన మొత్తాన్నే వసూలు చేస్తున్నారా లేదా అన్నదానిపై దృష్టి పెట్టాల్సిన అవసరం ఉంది.
రసీదులే అసలు ఆధారం
ఫీజుల వసూళ్లలో తల్లిదండ్రులకు ఇచ్చే రసీదులు కీలక ఆధారాలు. పాఠశాలలు వసూలు చేస్తున్న మొత్తానికి రసీదు ఇస్తున్నాయా? అందులో ఫీజు వివరాలను స్పష్టంగా నమోదు చేస్తున్నాయా? వెబ్‌సైట్‌లో పేర్కొన్న మొత్తానికీ రసీదులో చూపిన మొత్తానికీ పొంతన ఉందా? అన్నది పరిశీలిస్తే వాస్తవ పరిస్థితి బయటపడే అవకాశం ఉంది. ఒకవైపు ప్రభుత్వ వెబ్‌సైట్‌.. మరోవైపు పాఠశాల రసీదులు.. ఇంకోవైపు తల్లిదండ్రులు వాస్తవంగా చెల్లించిన మొత్తం.. ఈ మూడింటినీ సరిపోల్చితేనే ఫీజుల వ్యవహారంలో పారదర్శకత ఎంతవరకు ఉందో తేలుతుంది. 32 ఏళ్ల క్రితం రూపొందించిన నిబంధనలు ఇప్పటికీ అమలు కావాల్సిన అవసరం ఉండటం పరిస్థితికి అద్దం పడుతోంది. నిబంధనలు పెట్టడంతోనే సరిపెట్టకుండా.. 900 ప్రైవేటు పాఠశాలల్లో అవి అమలవుతున్నాయా లేదా అన్నది విద్యాశాఖ పర్యవేక్షించాలి. ఫీజుల వివరాలు, వెబ్‌సైట్‌ నమోదు, రసీదులు, వాస్తవ వసూళ్లను క్రమం తప్పకుండా తనిఖీ చేస్తేనే నిబంధనలకు సార్థకత చేకూరుతుంది.
