పత్తి రైతును దోచేస్తున్న దళారులు

కాకతీయ, వరంగల్ ప్రతినిధి: గ్రామాల్లో చిల్లర కాంటాలతో మధ్య దళారులు పత్తి రైతులను దోచుకుంటున్నారని, మార్కెట్లో ధరల వ్యత్యాసంతో రైతులు తీవ్రంగా నష్టపోతున్నారని అఖిల భారత రైతు సమాఖ్య (ఏఐకేఎఫ్) రాష్ట్ర ప్రధాన కార్యదర్శి పెద్దారపు రమేష్ ఆరోపించారు. సోమవారం ఏఐకేఎఫ్ రాష్ట్ర ప్రతినిధి బృందం వరంగల్ లోని ఎనుమాముల వ్యవసాయ మార్కెట్ ను సందర్శించి రైతులు తీసుకువచ్చిన పత్తి ధరలు, వారి ఇబ్బందులు, జరుగుతున్న మోసాలను అడిగి తెలుసుకున్నారు. అంతర్జాతీయంగా పత్తి విస్తీర్ణం, దిగుబడి తగ్గి డిమాండ్ ఉన్నా ధరలు పెరగకపోగా తగ్గించడం అన్యాయమని, ఆసియాలోనే రెండో అతిపెద్ద మార్కెట్ అయిన ఎనుమాములలో ఈ సీజన్లో ఒక్కసారి కూడా హైరేట్ పలకకపోవడం, జెండా పాట పేరుతో కొందరికే ఎక్కువ ధర ఇచ్చి మిగతా వారికి క్వింటాకు 500 నుండి 600 రూపాయలు తక్కువకు కొనుగోలు చేయడం దారుణమన్నారు. మార్కెట్లో 4 వే బ్రిడ్జిలు ఉన్నా ఒక్కటీ పనిచేయకపోవడం సిగ్గుచేటని, లూజు పత్తికి బయట తూకం వేసి మార్కెట్లో ధర తగ్గించడం, గ్రామాల్లో చిల్లర కాంటాలతో తూకంలో మోసం చేయడం జరుగుతోందని మండిపడ్డారు. ఇప్పటికైనా చిల్లర కాంటాలను అరికట్టి ధరల వ్యత్యాసాన్ని తొలగించి జెండా పాట అందరికీ వర్తింపజేయాలని, మార్కెట్లో రైతులు, కార్మికులకు నాణ్యమైన ఉచిత భోజనం అందించాలని, కేంద్ర, రాష్ట్ర ప్రభుత్వాలు పత్తికి క్వింటాకు 12 వేల రూపాయల మద్దతు ధర ప్రకటించి ఆదుకోవాలని డిమాండ్ చేశారు. అనంతరం సమస్యలతో కూడిన వినతిపత్రాన్ని మార్కెట్ చైర్మన్ ఎర్ర ప్రియాంక, కార్యదర్శి నిషాని శ్రీనివాస్ లకు అందజేయగా వారు సానుకూలంగా స్పందించి పరిష్కరిస్తామని హామీ ఇచ్చారు. ఈ కార్యక్రమంలో ఏఐకేఎఫ్ రాష్ట్ర సహాయ కార్యదర్శి ఎన్. రెడ్డి హంసారెడ్డి, వ్యవసాయ కార్మిక సంఘం రాష్ట్ర కార్యదర్శి గోనె కుమారస్వామి, జిల్లా కార్యదర్శి కుసుంబ బాబురావు తదితరులు పాల్గొన్నారు.

📰 Share Epaper Clip