పది పాఠశాలలకు చేరని సీఎం బ్రేక్‌ఫాస్ట్‌!
అల్పాహారం అందక ఆకలితోనే తరగతి గదుల్లో విద్యార్థులు
పథకం అమలులో నిర్లక్ష్యంపై తల్లిదండ్రుల ఆందోళన
అధికారుల స్పందన ఏదీ?: విద్యార్థులు, తల్లిదండ్రులు
కాకతీయ, దుగ్గొండి : ప్రభుత్వ పాఠశాలల్లో విద్యార్థులకు పౌష్టికాహారం అందించాలనే లక్ష్యంతో ప్రవేశపెట్టిన సీఎం బ్రేక్‌ఫాస్ట్‌ పథకం దుగ్గొండి మండలంలో సక్రమంగా అమలు కావడం లేదనే విమర్శలు వ్యక్తమవుతున్నాయి. మండలంలోని పది ప్రభుత్వ పాఠశాలలకు ఇప్పటివరకు అల్పాహారం సరఫరా కావడం లేదని సమాచారం. ఉదయం పాఠశాలలకు చేరుకున్న విద్యార్థులు అల్పాహారం అందక ఆకలితోనే తరగతి గదుల్లో కూర్చోవాల్సి వస్తోందని తల్లిదండ్రులు ఆందోళన వ్యక్తం చేస్తున్నారు. అల్పాహారం అందని పాఠశాలల్లో మల్లంపల్లి జిల్లా పరిషత్‌ ఉన్నత పాఠశాల, మల్లంపల్లి మండల పరిషత్‌ ప్రాథమిక పాఠశాల, మర్రిపల్లి, మహమ్మదాపురం, మైసంపల్లి, ముద్దునూరు, బెజ్జంకిపల్లి, గూడెలుగుపల్లి పాఠశాలలు ఉన్నాయి. పథకం అమలులో జాప్యానికి కారణాలను అధికారులు వెల్లడించాలని తల్లిదండ్రులు కోరుతున్నారు. జిల్లా విద్యాశాఖ అధికారి, కలెక్టర్‌ వెంటనే స్పందించి క్షేత్రస్థాయిలో పరిశీలన జరిపి, బాధ్యులపై చర్యలు తీసుకోవడంతో పాటు అన్ని పాఠశాలలకు సకాలంలో అల్పాహారం అందించాలని డిమాండ్‌ చేస్తున్నారు.
