మట్వాడాలో కల్తీ పొడుల దందా గుట్టురట్టు!
రూ.5.92 లక్షల విలువైన 2,250 కిలోల సరుకు పట్టివేత
ఒకరి అరెస్ట్‌.. ఫుడ్‌ సేఫ్టీ అధికారులకు అప్పగింత
కాకతీయ, వరంగల్ : మట్వాడా పోలీస్‌స్టేషన్‌ పరిధిలో కల్తీ కారం, పసుపు పొడుల నిల్వలు, విక్రయాల వ్యవహారాన్ని టాస్క్‌ఫోర్స్‌ పోలీసులు గురువారం వెలుగులోకి తెచ్చారు. విశ్వసనీయ సమాచారం మేరకు దాడి చేసి రూ.5,92,500 విలువైన 2,250 కిలోల పొడులను స్వాధీనం చేసుకున్నారు. ఈ వ్యవహారంలో కరీమాబాద్‌కు చెందిన ఆకుతోట గోపిని అదుపులోకి తీసుకున్నారు. స్వాధీనం చేసుకున్న సరుకులో 600 కిలోల కారం పొడి, 1,650 కిలోల పసుపు పొడి ఉన్నాయి. తనిఖీల్లో ఫుడ్‌ సేఫ్టీ లైసెన్స్‌ లేకుండా వ్యాపారం నిర్వహించడం, లేబుళ్లు లేకుండా ప్యాకింగ్‌ చేయడం, అపరిశుభ్ర వాతావరణంలో పొడులను ప్యాక్‌ చేయడం గుర్తించారు. కార్మికులకు తల కవర్లు, మాస్కులు, చేతి తొడుగులు లేకపోవడంతో పాటు వైద్య ఫిట్‌నెస్‌ ధ్రువపత్రాలు కూడా లేవని అధికారులు గుర్తించారు. నిందితుడితో పాటు స్వాధీనం చేసుకున్న సరుకును ఫుడ్‌ సేఫ్టీ అధికారి చి. మౌనికకు అప్పగించారు. ఆహార భద్రత, ప్రమాణాల చట్టం ప్రకారం తదుపరి చర్యలు తీసుకోనున్నట్లు తెలిపారు. దాడిలో టాస్క్‌ఫోర్స్‌ ఏసీపీ ఎ. మధుసూదన్‌, ఇన్‌స్పెక్టర్‌ వి. క్రాంతికుమార్‌, ఎస్సై కె. సుధాకర్‌, సిబ్బంది పాల్గొన్నారు.
