శంకర్‌గౌడ్‌ కుటుంబానికి ఇచ్చిన మాట నిలబెట్టుకున్నాం!
డ్రైవర్‌ కుమారుడు హేమంత్‌గౌడ్‌కు ఆర్టీసీలో ఉద్యోగ నియామక పత్రం
ఆర్టీసీ సిబ్బందిపై దాడులు చేస్తే కఠిన చర్యలు : మంత్రి పొన్నం ప్రభాకర్‌
కాకతీయ, హైదరాబాద్: నర్సంపేట ఆర్టీసీ డిపోలో డ్రైవర్‌గా పనిచేస్తూ దివంగతులైన శంకర్‌గౌడ్‌ కుటుంబానికి ప్రభుత్వం అండగా నిలిచి ఇచ్చిన హామీని నెరవేర్చిందని రవాణా శాఖ మంత్రి పొన్నం ప్రభాకర్‌ తెలిపారు. శంకర్‌గౌడ్‌ కుమారుడు హేమంత్‌గౌడ్‌కు ఆర్టీసీలో రికార్డ్‌ ట్రెజర్‌గా ఉద్యోగం కల్పిస్తూ సచివాలయంలో ఆర్టీసీ ఎండీ నాగిరెడ్డితో కలిసి నియామక పత్రాన్ని అందజేశారు. ముఖ్యమంత్రి సూచనల మేరకు ప్రభుత్వం, ఆర్టీసీ తరఫున బాధిత కుటుంబానికి పరిహారం అందించామని, రాష్ట్రవ్యాప్తంగా ఆర్టీసీ ఉద్యోగులు ఒక రోజు వేతనంగా దాదాపు కోటి రూపాయలు సమకూర్చి కుటుంబానికి అండగా నిలిచారని పేర్కొన్నారు.
ఆర్టీసీ సిబ్బందిపై దాడులు చేస్తే కఠిన చర్యలు
ప్రయాణికులకు సౌకర్యాలు కల్పించడం ఆర్టీసీ బాధ్యత అయితే, ఉద్యోగులను కాపాడుకోవడం ప్రజల బాధ్యత అని మంత్రి అన్నారు. సిబ్బంది దురుసుగా ప్రవర్తిస్తే ఉన్నతాధికారులకు ఫిర్యాదు చేయాలని, భౌతిక దాడులకు పాల్పడవద్దని సూచించారు. ఉద్యోగులపై దాడులు చేస్తే ప్రభుత్వం తీవ్రంగా స్పందించి చట్టపరమైన చర్యలు తీసుకుంటుందని హెచ్చరించారు. ప్రయాణికులు మర్చిపోయిన విలువైన వస్తువులను నిజాయితీగా తిరిగి అప్పగిస్తున్న ఉద్యోగులు ఎందరో ఉన్నారని గుర్తుచేశారు. మహిళలకు ఉచిత బస్సు ప్రయాణం నేపథ్యంలో రద్దీకి అనుగుణంగా అదనపు బస్సులు ఏర్పాటు చేస్తున్నామని, ప్రయాణికుల అవసరాలకు తగ్గట్టుగా కొత్త బస్సుల కొనుగోలు, బస్టాండ్ల ఆధునీకరణకు చర్యలు తీసుకుంటున్నామని తెలిపారు. గ్రామాలకు బస్సు సౌకర్యం అవసరమైతే స్థానిక అధికారులను సంప్రదించాలని, రూట్‌ వెరిఫికేషన్‌, సాధ్యాసాధ్యాల పరిశీలన అనంతరం సౌకర్యం కల్పిస్తామని చెప్పారు. కార్యక్రమంలో ఆర్టీసీ కార్మిక సంఘం నేతలు వెంకన్న, బాబూరావు, ఇతర నాయకులు, అధికారులు పాల్గొన్నారు.
