మార్కెట్‌ను ఏఎంసీకి అప్పగించండి
నాలుగేళ్లుగా అసంపూర్తిగా ఇంటిగ్రేటెడ్‌ ఫ్రూట్స్‌ మార్కెట్‌
రూ.24 కోట్ల పనులు మధ్యలోనే నిలిచిపోయాయి
కాంట్రాక్టర్‌ బిల్లులు చెల్లించకపోవడంతోనే జాప్యం
పండ్ల మార్కెట్‌ అధ్యక్షుడు వెల్ది సాంబయ్య విజ్ఞప్తి
కాకతీయ, వరంగల్: “లక్ష్మీపురం పండ్ల మార్కెట్‌ నిర్మాణాన్ని త్వరగా పూర్తి చేయాలి. మున్సిపల్‌ కార్పొరేషన్‌ ఆధ్వర్యంలో చేపట్టిన మార్కెట్‌ను వ్యవసాయ మార్కెట్‌ కమిటీకి అప్పగిస్తే మేమే నిర్మాణాన్ని పూర్తి చేసుకుంటాం. వ్యాపారుల నుంచి పదో, ఇరవయ్యో చొప్పున విరాళాలు సేకరించైనా మార్కెట్‌ను నిర్మించుకుంటాం” అని పండ్ల మార్కెట్‌ అధ్యక్షుడు వెల్ది సాంబయ్య కోరారు. శనివారం లక్ష్మీపురం పండ్ల మార్కెట్‌లో బీజేపీ నాయకులు, వ్యాపారులు నిర్వహించిన నిరసన కార్యక్రమంలో ఆయన మాట్లాడారు. సుమారు రూ.24 కోట్ల అంచనా వ్యయంతో ప్రారంభించిన ఇంటిగ్రేటెడ్‌ ఫ్రూట్స్‌ మార్కెట్‌ నిర్మాణం నాలుగేళ్లుగా అసంపూర్తిగా ఉందని ఆవేదన వ్యక్తం చేశారు. కాంట్రాక్టర్‌కు బిల్లులు చెల్లించకపోవడంతో పనులు నిలిచిపోయాయని తెలిపారు. పెండింగ్‌ బిల్లులను వెంటనే విడుదల చేయాలని ప్రభుత్వాన్ని కోరారు. మార్కెట్‌ను ఏఎంసీకి అప్పగిస్తే ప్రభుత్వ నిధుల కోసం ఎదురుచూడకుండా వ్యాపారుల సహకారంతోనే పూర్తి చేసుకుంటామని స్పష్టం చేశారు.
మార్కెట్‌ సమస్యను పరిష్కరించాలి : బీజేపీ జిల్లా అధ్యక్షుడు గంట రవికుమార్‌
బీజేపీ జిల్లా అధ్యక్షుడు గంట రవికుమార్‌ మాట్లాడుతూ గత బీఆర్‌ఎస్‌ ప్రభుత్వ హయాంలో పాత మార్కెట్‌ను కూల్చి కొత్తది నిర్మిస్తామని హామీ ఇచ్చారని, ఇప్పటికీ పనులు పూర్తి కాలేదని విమర్శించారు. ప్రస్తుత కాంగ్రెస్‌ ప్రభుత్వం కూడా సమస్యను పరిష్కరించడం లేదన్నారు. వరంగల్ తూర్పు ఎమ్మెల్యే వెంటనే స్పందించి మార్కెట్‌ను ఏఎంసీకి అప్పగించేలా చర్యలు తీసుకోవాలని డిమాండ్‌ చేశారు. లేనిపక్షంలో ఆందోళన ఉధృతం చేస్తామని హెచ్చరించారు. కార్యక్రమంలో పండ్ల వ్యాపారులు, బీజేపీ నాయకులు పాల్గొన్నారు.
