నేటి నుంచి ఏనుమాముల మార్కెట్ యథావిధిగా!
కేసు ఉపసంహరణపై ఒప్పందం..
మూడు గంటల చర్చల అనంతరం ప్రకటన
ఉత్పత్తులను మార్కెట్కు తీసుకురావాలని మార్కెటింగ్ శాఖ విజ్ఞప్తి
కాకతీయ, వరంగల్ ప్రతినిధి : ఏనుమాముల వ్యవసాయ మార్కెట్లో నెలకొన్న ప్రతిష్టంభనకు తెరపడింది. మంగళవారం నుంచి మార్కెట్లో క్రయవిక్రయాలు యథావిధిగా కొనసాగనున్నట్లు మార్కెటింగ్ శాఖ ప్రకటించింది. రైతులు తమ వ్యవసాయ ఉత్పత్తులను మార్కెట్కు తీసుకురావాలని కోరింది. అడ్తి సెక్షన్ ప్రెసిడెంట్ లింగారెడ్డిపై నమోదైన కేసు ఉపసంహరణ అంశంపై ఒప్పందం కుదరడంతో ఈ నిర్ణయం తీసుకున్నారు. సోమవారం ఉదయం 11 గంటల నుంచి మధ్యాహ్నం 2 గంటల వరకు మార్కెట్ ప్రధాన కార్యాలయంలోని చైర్పర్సన్ ఛాంబర్లో సమావేశం జరిగింది. మార్కెట్ కమిటీ చైర్పర్సన్ ఎర్ర ప్రియాంక అధ్యక్షతన మార్కెటింగ్ అడిషనల్ డైరెక్టర్ ఆర్. లక్ష్మణుడు, డీసీపీ అంకిత్కుమార్, అదనపు కలెక్టర్ (రెవెన్యూ) ఎల్. కిషోర్కుమార్, వ్యాపారులు, మార్కెటింగ్ అధికారులు చర్చల్లో పాల్గొన్నారు. కేసు ఉపసంహరణ, నోటీసులు, మార్కెట్ నిర్వహణ తదితర అంశాలపై చర్చించి ఒప్పందానికి వచ్చారు. అంతకుముందు సోమవారం ఉదయం మార్కెట్లో పత్తి, మిర్చి, అపరాలు, పసుపు యార్డులు బోసిపోయాయి. కేవలం రెండు, మూడు పత్తి ఆటోలు మాత్రమే యార్డుకు చేరుకున్నాయి. వ్యాపారుల నుంచి ముందస్తు సమాచారం అందడంతో రైతులు మార్కెట్కు రాలేదని తెలిసింది. జిల్లా కలెక్టర్ డాక్టర్ సత్యశారద అధ్యక్షతన జరిగిన సమీక్షలోనూ మార్కెట్ యథావిధిగా కొనసాగుతుందని, రైతులకు ఇబ్బందులు కలగనివ్వమని స్పష్టం చేశారు. ఆదివారం రాత్రి 10.30 గంటల వరకు వ్యాపారులతో చర్చలు కొనసాగాయి. ఈ నెల 20న మరోసారి సమావేశం కానున్నట్లు తెలిపారు. సమావేశంలో జిల్లా మార్కెటింగ్ అధికారి కె. నాగరాజు, మార్కెట్ కార్యదర్శి శ్రీనివాస్, సంబంధిత అధికారులు, వ్యాపార ప్రతినిధులు పాల్గొన్నారు.

