పేదలకు అండగా సంక్షేమ పథకాలు
చేయూత పెన్షన్ల మంజూరు పత్రాలు అందజేత
ఎమ్మెల్యే మామిడాల యశస్విని రెడ్డి
కాకతీయ,రాయపర్తి : అర్హులైన ప్రతి పేదవాడికి సంక్షేమ పథకాలు అందించడమే లక్ష్యంగా కాంగ్రెస్ ప్రజా ప్రభుత్వం పనిచేస్తుందని పాలకుర్తి ఎమ్మెల్యే మామిడాల యశశ్విని రెడ్డి అన్నారు.సోమవారం రాయపర్తి మండల పరిషత్ అభివృద్ధి కార్యాలయంలో మండలంలోని పలు గ్రామాలకు చెందిన లబ్ధిదారులకు ఆమె కొత్త పింఛన్ల మంజూరు పత్రాలను అందజేశారు.మండల వ్యాప్తంగా పింఛన్ల కోసం మొత్తం 1,246 దరఖాస్తులు రాగా,క్షుణ్ణంగా పరిశీలించి అర్హులైన 940 మందికి కొత్త పింఛన్లు మంజూరు చేసినట్లు అధికారులు వెల్లడించారు.ఈ సందర్భంగా ఎమ్మెల్యే మాట్లాడుతూ…అర్హులైన ప్రతి ఒక్కరికీ సంక్షేమ ఫలాలు అందించడమే ప్రభుత్వ ప్రధాన ధ్యేయమని అన్నారు.గత బీఆర్ఎస్ ప్రభుత్వం పేదలను ఏనాడూ పట్టించుకోలేదని విమర్శించారు.నేడు రాష్ట్ర ప్రభుత్వం అందిస్తున్న చేయూత పింఛన్ల మంజూరు పత్రాలు నిరుపేద కుటుంబాలకు ఎంతో ఊరటనిస్తాయని ఆశాభావం వ్యక్తం చేశారు.అర్హుల ఎంపికలో ఎలాంటి జాప్యం లేకుండా అధికారులు పారదర్శకంగా వ్యవహరించాలని సూచించారు.మిగిలిన దరఖాస్తులను కూడా పరిశీలిస్తామని,ఎవరు ఆందోళన చెందవద్దని భరోసా ఇచ్చారు.ఈ నేపథ్యంలో మంజూరు పత్రాలు అందుకున్న చేనేత కార్మికులు,దివ్యాంగులు, ఒంటరి మహిళలు, కల్లుగీత కార్మికుల కళ్ళలో ఆనందం వెళ్లి విరిసింది.ఎంతో కాలంగా ఎదురుచూస్తున్న తమకు మంజూరు పత్రాలు అందడంతో హర్షం వ్యక్తం చేశారు.ఈ పింఛన్ తమ జీవనోపాధికి భరోసానిస్తుందని పేర్కొంటూ ఎమ్మెల్యే కృతజ్ఞతలు తెలిపారు.ఈ కార్యక్రమంలో డిఆర్డిఓ నాగ పద్మజ,మండల ప్రత్యేక అధికారి వై.శ్రీకాంత్ రెడ్డి, తహసిల్దార్ ముల్కనూరి శ్రీనివాస్,ఎంపీడీవో పాక శ్రీనివాసులు,సర్పంచ్ లు,ఉప సర్పంచ్ లు,పార్టీ మండల అధ్యక్షుడు ఈదులకంటి రవీందర్ రెడ్డి,మండల నాయకులు,కార్యకర్తలు పాల్గొన్నారు.

