సజ్జనార్ చుట్టూ ఆరోపణల వలయం!
రాజాసింగ్, సీబీఐ విచారణ డిమాండ్తో తెరపైకి పాత వివాదాలు
ఆమ్ వే వ్యవహారంలో రూ.100 కోట్లకు పైగా అక్రమాలంటూ లేఖ
ట్రైనీ ఐపీఎస్ ఉదయ్ కృష్ణారెడ్డిని కస్టడీలో వేధించారన్న మాజీ సీబీఐ అధికారి
స్వయంగా విచారించి ఎన్కౌంటర్ చేస్తానని బెదిరించారన్న ఆరోపణలు
సీబీ-సీఐడీ లేదా స్వతంత్ర సంస్థతో విచారణ జరిపించాలని డిమాండ్
ఆమ్వే, గోల్డ్ క్రెస్ట్ కేసుల దర్యాప్తు తీరుపైనా చర్చ
కాకతీయ, తెలంగాణ బ్యూరో : మాజీ హైదరాబాద్ పోలీస్ కమిషనర్ వి.సి. సజ్జనార్పై ఆరోపణలు వరుసగా తెరపైకి వస్తున్నాయి. ఆయన కమిషనర్గా పనిచేసిన సమయంలోని కొన్ని కేసుల దర్యాప్తు తీరు, పోలీసు కస్టడీలో వ్యవహరించిన విధానం, ఆర్థిక నేరాల కేసుల పురోగతిపై తాజాగా వివాదం మొదలైంది. గోషామహల్ ఎమ్మెల్యే రాజాసింగ్ ముఖ్యమంత్రి రేవంత్రెడ్డికి లేఖ రాస్తూ బంగారం చోరీ, హామ్వే వ్యవహారాల్లో దర్యాప్తు సరిగా సాగలేదని, రూ.100 కోట్లకు పైగా ఆర్థిక అవకతవకలు జరిగినట్లు ఆరోపించారు. ఈ వ్యవహారాలపై సీబీఐ లేదా న్యాయ విచారణ జరిపించాలని కోరారు. మరోవైపు మాజీ సీబీఐ తాత్కాలిక డైరెక్టర్ ఎం. నాగేశ్వరరావు ట్రైనీ ఐపీఎస్ అధికారి ఉదయ్ కృష్ణారెడ్డి కేసులో సజ్జనార్పై మరింత తీవ్రమైన ఆరోపణలు చేశారు. కస్టడీలో వేధింపులు, ఎన్కౌంటర్ చేస్తానని బెదిరింపులు ఎదురయ్యాయని పేర్కొంటూ స్వతంత్ర దర్యాప్తు కోరారు. ఈ రెండు పరిణామాలతో సజ్జనార్ గతంలో నిర్వహించిన కేసులపై మరోసారి చర్చ మొదలైంది.
బంగారం చోరీ, హామ్వే వ్యవహారాలపై రాజాసింగ్ ప్రశ్నలు
గోషామహల్ ఎమ్మెల్యే రాజాసింగ్ ఈ నెల 15న ముఖ్యమంత్రి రేవంత్రెడ్డికి రాసిన లేఖలో సజ్జనార్ కమిషనర్గా ఉన్న సమయంలోని కొన్ని కేసులను ప్రస్తావించారు. బంగారం చోరీ కేసులో దర్యాప్తు ముందుకు సాగలేదని, నిందితుల గుర్తింపు, అరెస్టు, బాధితులకు న్యాయం చేసే విషయంలో జాప్యం జరిగిందని ఆరోపించారు. హామ్వే వ్యవహారంలోనూ దర్యాప్తు మందగించిందని, సుమారు రూ.100 కోట్లకు పైగా ఆర్థిక అవకతవకలు జరిగినట్లు పేర్కొన్నారు. ఈ కేసులకు సంబంధించిన ఆర్థిక లావాదేవీలు, బాధ్యుల పాత్ర, దర్యాప్తు పురోగతిపై సమగ్ర విచారణ జరగాలని కోరారు. జనార్ధన్ అనే వ్యక్తికి సంబంధించిన సామాజిక మాధ్యమ పోస్టుపై సజ్జనార్ స్పందించిన తీరును కూడా తన లేఖలో ప్రస్తావించినట్లు సమాచారం. ఈ వ్యవహారాలన్నింటినీ పరిశీలించి సీబీఐతో లేదా న్యాయ విచారణ ద్వారా వాస్తవాలను వెలికితీయాలని రాజాసింగ్ డిమాండ్ చేశారు.
ఉదయ్ కృష్ణారెడ్డి కేసులో… ఆరోపణలు
సజ్జనార్పై వచ్చిన ఆరోపణల్లో అత్యంత తీవ్రమైనది ట్రైనీ ఐపీఎస్ అధికారి ఉదయ్ కృష్ణారెడ్డి కేసుకు సంబంధించినది. నేషనల్ పోలీస్ అకాడమీలో శిక్షణ పొందుతున్న మహిళా ట్రైనీ ఐపీఎస్ అధికారిణి ఫిర్యాదు మేరకు 2026 జూలై 18న అత్తాపూర్ పోలీస్స్టేషన్లో కేసు నమోదైంది. లైంగిక వేధింపులు, దాడి, బెదిరింపులు, వ్యక్తిగత సమాచారాన్ని దుర్వినియోగం చేయడం వంటి ఆరోపణలు ఫిర్యాదులో ఉన్నాయి. ఈ ఆరోపణలను ఉదయ్ కృష్ణారెడ్డి ఖండించారు. జూలై 29న పోలీసులు ఆయనను అరెస్టు చేశారు. ఈ కేసు దర్యాప్తు తీరుపై మాజీ సీబీఐ తాత్కాలిక డైరెక్టర్ ఎం. నాగేశ్వరరావు అభ్యంతరాలు వ్యక్తం చేశారు. ఆయన ఆగస్టు 8న తెలంగాణ డీజీపీకి సమర్పించిన వినతిలో ఉదయ్ కృష్ణారెడ్డిని కస్టడీలో వేధించారని ఆరోపించారు. సజ్జనార్ స్వయంగా విచారిస్తూ ఎన్కౌంటర్ చేస్తానని బెదిరించారన్నది ఆయన చేసిన మరో కీలక ఆరోపణ. ఈ వ్యవహారంపై సాధారణ పోలీసు దర్యాప్తుతో సరిపెట్టకుండా సీబీ-సీఐడీ లేదా మరో స్వతంత్ర సంస్థకు అప్పగించాలని కోరారు.
ఆమ్వే, గోల్డ్ క్రెస్ట్ కేసుల ప్రస్తావన..
సజ్జనార్ గతంలో నిర్వహించిన ఆర్థిక నేరాల దర్యాప్తుల తీరుపైనా కొన్ని వర్గాలు అభ్యంతరాలు వ్యక్తం చేస్తున్నాయి. ముఖ్యంగా ఆమ్వే, గోల్డ్ క్రెస్ట్ కేసులను ప్రస్తావిస్తూ దర్యాప్తు విధానంపై ప్రశ్నలు లేవనెత్తుతున్నాయి. ఆమ్వే వ్యవహారంలో తెలంగాణ పోలీసుల ఎఫ్ఐఆర్ల ఆధారంగా ఎన్ఫోర్స్మెంట్ డైరెక్టరేట్ దర్యాప్తు చేపట్టి 2023 నవంబర్లో ప్రత్యేక న్యాయస్థానంలో మనీలాండరింగ్ నిరోధక చట్టం కింద ప్రాసిక్యూషన్ ఫిర్యాదు దాఖలు చేసింది. ఇది ఆమ్వే సంస్థకు సంబంధించిన ఆర్థిక నేరాల దర్యాప్తు పరిణామం. గోల్డ్ క్రెస్ట్ వ్యవహారంలోనూ ఆయనపై ఉన్న నిర్దిష్ట ఆరోపణలు, కేసు రికార్డులు, అధికారిక విచారణ వివరాలు పరిశీలించిన తర్వాతే స్పష్టమైన నిర్ధారణకు రావాల్సి ఉంటుంది. ఇటీవల తెలంగాణ ప్రభుత్వం చేపట్టిన ఐపీఎస్ అధికారుల బదిలీల్లో సజ్జనార్ను హైదరాబాద్ పోలీస్ కమిషనర్ పదవి నుంచి తప్పించి అగ్నిమాపక, విపత్తు నిర్వహణ, అత్యవసర సేవలు, పౌర రక్షణ విభాగం డీజీగా నియమించింది. ఆయన స్థానంలో మహేశ్ మురళీధర్ భగవత్ హైదరాబాద్ పోలీస్ కమిషనర్గా బాధ్యతలు చేపట్టారు. ఈ బదిలీకి నిర్దిష్ట కారణాన్ని ప్రభుత్వం అధికారికంగా వెల్లడించలేదు. బదిలీ తర్వాత రాజాసింగ్ సీబీఐ విచారణ డిమాండ్ చేయడం, నాగేశ్వరరావు చేసిన ఆరోపణలు మళ్లీ చర్చకు రావడంతో వివాదం మరింత ప్రాధాన్యం సంతరించుకుంది.

