ఎంతసేపు జీఎంను లేపాలా.. ఎండీని లేపాలా…
ఈ ఆలోచనలతో జీవితం నాశనమవుతోంది
ఇసుక కాంట్రాక్టర్ శ్రీకర్తో అధికారి సంభాషణ.. కాకతీయ చేతిలో ఆడియో ..!
కాకతీయ, తెలంగాణ బ్యూరో : కాకతీయ, తెలంగాణ బ్యూరో : మణుగూరు ఇసుక ర్యాంపుల్లో కొనసాగుతున్న అక్రమాల్లో అధికారుల పాత్ర కీలకమనే విషయం తేటతెల్లమవుతోంది. కాంట్రాక్టర్లతో అంటకాగుతూ..వారి కనుసన్నల్లోనే అధికారులు పనిచేస్తున్నారనడానికి కాకతీయకు చిక్కిన ఆడియో ప్రస్పుటం చేస్తోంది. ఇసుక ర్యాంపులతో తనకు ఏమాత్రం సంబంధం లేదని వాదిస్తున్న శ్రీకర్తో అధికారులు ఎంతో చనువుగా సంభాషిస్తున్న ఆడియో కాకతీయ చేతికి చిక్కింది. టీజీఎండీసీ ఎండీని ఓ అధికారి చాలా చులకనకగా మాట్లాడుతున్నట్లుగా ఆడియోలో నిక్షిప్తమై ఉంది. జీఎంను.. ఎండీలకు ఊడిగం చేయాలా… ఎంత సేపు ఈ ఆలోచనలతో జీవితం నాశనమవుతోందంటూ సదరు అధికారి వ్యాఖ్యనిస్తున్నట్లుగా ఆడియోలో ఉండటం గమనార్హం.
కాంట్రాక్టర్ శ్రీకర్తో పాటు మరో ఇద్దరు అధికారుల మధ్య ఈ సంభాషణ జరిగినట్లుగా ఉంది. దాదాపు ఎనిమిది నిముషాల పాటు ఉన్న ఆడియోలో కలెక్టర్, టీజీఎండీసీ, ఫారెస్ట్ డిపార్ట్మెంటు, పోలీసు డిపార్ట్మెంట్కు చెందిన అధికారుల వ్యవహార శైలిపై అధికారుల మధ్య చర్చకు రావడం గమనార్హం. ఈ సంభాషణలో ఓ జిల్లా కలెక్టర్కు సంబంధించిన చాంబర్ విషయం.. ఫైల్ క్లియరెన్స్ తాను తీసుకుంటున్న రిస్క్… సదరు కలెక్టర్ రామలక్ష్మణులుగా ఎలా తన చాంబర్లోకి తమను ఆహ్వానించే విషయాలను ఇద్దరు అధికారులు ముచ్చటిస్తుండగా..శ్రీకర్ నవ్వుతున్నట్లుగా ఆడియోలో రికార్డయి ఉంది. లోడింగ్ అమౌంట్ గురించి ఒక లారీ ఓనర్ ఫోన్ చేస్తున్నాడు నేను లేపడం లేదని టీజీఎండీసీ అధికారి చెబుతుండటం గమనార్హం.
ఈ సంభాషణలో శ్రీకర్ అనుచరుడు వాసు ప్రస్తావన సైతం ఉంది. క్వారీల్లో ఆర్థిక లావాదేవీలకు సంబంధించి.. వాసుతో రిస్క్ అవుతోందంటూ ఓ అధికారి శ్రీకర్కు ఫిర్యాదు చేస్తున్నట్లుగా కూడా ఉంది. శ్రీకర్ ర్యాంపుల్లో వాసుయే కీలకంగా వ్యవహరిస్తున్నట్లుగా కాకతీయ కథనాల్లో స్పష్టం చేసిన విషయం తెలిసిందే. టీజీఎండీసీ కాంట్రాక్టర్లకు అధికారులకు కొమ్ము కాస్తున్నాడనే ఫిర్యాదు చేసినా ఉన్నత అధికారులు చర్యలు తీసుకోకపోవడంపై ఇప్పుడు అనుమానాలు బలపడుతున్నాయి. తనకు ఇసుక ర్యాంప్ లే లేవని అని చెప్పుకునే శ్రీకర్కు సదరు టీజీఎండీసీ అధికారులతో ఏం పని, సదరు అధికారులతో అంత చనువుగా ఎందుకు ఉంటాడన్న ప్రశ్నలకు సమాధానం చెప్పాల్సి ఉంది.
