పెద్ది… నిన్ను మరవదు ఈ గడ్డ..!

పెద్ది… నిన్ను మరవదు ఈ గడ్డ..!
ఉద్య‌మ‌కారుడు, మాజీ ఎమ్మెల్యే పెద్ది సుద‌ర్శ‌న్ రెడ్డి ఇక లేరు
తెలంగాణ‌ను స్వ‌ప్నిస్తూ.. ఉద్యమమే ఊపిరిగా బ‌తికిన యోధుడు
పదవి కోసం కాదు… ప్రజల కోసం బతికిన మనిషి
నర్సంపేటను గుండెల్లో పెట్టుకున్న నాయకుడు
పెద్ది చివరి ప్రయాణంతో కన్నీటిలో మునిగిన ఓరుగల్లు

తెల్లవారు జామునే వరంగల్ నుంచి నర్సంపేట వైపు వెళ్లే ప్రతి రహదారి ఒకే దిశగా కదులుతోంది. చేతుల్లో గులాబీ జెండాలు… కళ్లల్లో నీళ్లు… పెదవులపై ఒక్కటే మాట… “పెద్ది అన్న ఇక లేరు…”. రాజకీయ సభలకు, ఉద్యమ ర్యాలీలకు, విజయోత్సవాలకు వేలమంది తరలివచ్చిన ఈ నేల… ఈసారి మాత్రం తన బిడ్డకు చివరి వీడ్కోలు చెప్పడానికి నిశ్శబ్దంగా క‌దులుతోంది. నిన్నటి వరకు ధైర్యం చెప్పిన నాయకుడిని… ఈ రోజు కన్నీటి కళ్లతో సాగనంపాల్సి రావడం ఓరుగల్లును భారంగా మారుస్తోంది. రాజకీయాల్లో పదవులు వస్తుంటాయి… పోతుంటాయి. నాయకులు వస్తుంటారు… వెళ్తుంటారు. కానీ కొందరు మాత్రం ఒక ప్రాంతానికి గుర్తింపుగా మారిపోతారు. తెలంగాణ ఉద్యమం గురించి మాట్లాడితే వరంగల్ జిల్లాలో గుర్తుకొచ్చే పేర్లలో పెద్ది సుదర్శన్ రెడ్డి ఒకరు. నర్సంపేట గురించి మాట్లాడితే ప్రజల కష్టసుఖాల్లో కలిసిపోయిన నాయకుడిగా ఆయన గుర్తొస్తారు. గులాబీ జెండా గురించి మాట్లాడితే చివరి శ్వాస వరకు పార్టీని విడిచిపెట్టని కార్యకర్తగా గుర్తుకొస్తారు. అందుకే ఆయన మరణాన్ని ఒక కుటుంబం కాదు… ఒక ఉద్యమం శోకిస్తోంది. ఒక పార్టీ కాదు… ఒక ప్రాంతం కన్నీరు పెడుతోంది.

ఉద్యమమే ఊపిరి… తెలంగాణే జీవితం

పెద్ది సుదర్శన్ రెడ్డి రాజకీయాల్లోకి అధికారాన్ని ఆశించి రాలేదు. ప్రజల మధ్య నుంచి వచ్చిన నాయకుడిగా, తెలంగాణ కోసం పోరాడాలనే సంకల్పంతో తన జీవితాన్ని మలచుకున్నారు. దుగ్గొండి బ్లాక్ కాంగ్రెస్ అధ్యక్షుడిగా ప్రజా జీవితాన్ని ప్రారంభించిన ఆయన, తెలంగాణ రాష్ట్ర సాధనే చరిత్రను మార్చే లక్ష్యంగా కేసీఆర్ పిలుపునందుకుని 2001లో టీఆర్ఎస్‌లో చేరారు. ఆ నిర్ణయం ఆయన రాజకీయ జీవితాన్నే కాదు… వ్యక్తిగత జీవితాన్నీ మార్చేసింది. ఉద్యమం ఉవ్వెత్తున ఎగిసిపడుతున్న రోజుల్లో వరంగల్ జిల్లా తెలంగాణ పోరాటానికి ప్రధాన కేంద్రంగా మారింది. ఆ ఉద్యమానికి ఊపిరిగా నిలిచిన నాయకుల్లో పెద్ది ముందువరుసలో ఉండేవారు. రాస్తారోకోలు, బంద్‌లు, ధర్నాలు, దీక్షలు, నిరసన ర్యాలీలు… ఉద్యమం ఎక్కడ ఉంటే అక్కడ పెద్ది కనిపించేవారు. ఉద్యమానికి ప్రజలను సమీకరించడంలో, గ్రామాలను చైతన్యవంతం చేయడంలో, యువతలో తెలంగాణ ఆత్మగౌరవాన్ని రగిలించడంలో ఆయన పాత్రను సహచరులు ఇప్పటికీ గర్వంగా గుర్తు చేసుకుంటారు. టీఆర్ఎస్ కార్యక్రమాలతో పాటు తెలంగాణ రాజకీయ జేఏసీ ఆధ్వర్యంలో నిర్వహించిన ఉద్యమాల్లోనూ ఆయన కీలక పాత్ర పోషించారు. ఉద్యమం ఒక పార్టీ సొత్తు కాదని… అది తెలంగాణ సమాజం అంతటిదని నమ్మిన నాయకుడిగా అన్ని వర్గాలను కలుపుకొని ముందుకు నడిచారు. భిన్న రాజకీయ అభిప్రాయాలు ఉన్న నాయకులను కూడా తెలంగాణ అనే ఒకే లక్ష్యం కోసం ఒకే వేదికపైకి తీసుకురావడంలో ఆయన చూపిన సమన్వయం ప్రత్యేకంగా నిలిచింది. ఉద్యమం కోసం ఆయన చెల్లించిన మూల్యం చిన్నది కాదు. పోలీసుల కేసులు ఎదుర్కొన్నారు. నాన్-బెయిలబుల్ కేసులు నమోదయ్యాయి. జైలు నిర్బంధాలను ఎదుర్కొన్నారు. కానీ ఒక్క అడుగు వెనక్కి వేయలేదు. ఉద్యమం కోసం ఎదురైన ప్రతి కష్టాన్ని చిరునవ్వుతో స్వీకరించారు. తెలంగాణ సాధన కోసం వ్యక్తిగత జీవితాన్ని కూడా పక్కన పెట్టారు. ఆయనతో కలిసి ఉద్యమం చేసిన సహచరులు ఇప్పటికీ ఒక విషయాన్ని గుర్తు చేసుకుంటారు. ఉద్యమ కార్యక్రమాల కోసం కష్టపడి సంపాదించుకున్న అంతో ఇంతో ఆస్తినీ వెచ్చించారని… తన సౌకర్యాల గురించి ఎప్పుడూ ఆలోచించలేదని చెబుతుంటారు. కుటుంబం కంటే ఉద్యమానికే ఎక్కువ సమయం ఇచ్చిన నాయకుడిగా ఆయనను గుర్తుచేసుకుంటారు. ఎన్నో కష్టాలు, నష్టాలు అనుభవించినా… వాటిని తనలోనే దాచుకుని ప్రజల మధ్యకు మాత్రం ఎప్పుడూ చిరునవ్వుతో వచ్చేవారు. తన బాధను ఎవరికీ చెప్పుకోని మనిషి… ఎదుటివారి బాధను మాత్రం తనదిగా భావించే మనసు ఆయనది.

పార్టీకి పెద్ద దిక్కుగా… కేసీఆర్ నమ్మిన నాయకుడిగా

టీఆర్ఎస్ ఆవిర్భావం తర్వాత ఉమ్మడి వరంగల్ జిల్లాలో పార్టీని గ్రామ గ్రామానికీ చేర్చడంలో పెద్ది సుదర్శన్ రెడ్డి కీలక పాత్ర పోషించారు. జిల్లా కన్వీనర్‌గా, రాష్ట్ర కార్యదర్శిగా, ముఖ్యంగా ఉమ్మడి వరంగల్ జిల్లా అధ్యక్షుడిగా దాదాపు 8 సంవత్సరాలు బాధ్యతలు నిర్వహించడం ఆయనపై పార్టీ అధినేత కేసీఆర్‌కు ఉన్న విశ్వాసాన్ని తెలియజేస్తుంది. పార్టీ కోసం రాత్రింబవళ్లు శ్రమించిన నాయకుడిగా ఆయనకు ప్రత్యేక గుర్తింపు ఏర్పడింది. అధికారంలో ఉన్నా… ప్రతిపక్షంలో ఉన్నా… పార్టీ కార్యకర్తలతో సంబంధాన్ని ఎప్పుడూ కోల్పోలేదు. ఉద్యమ కాలం నుంచి చివరి శ్వాస వరకు గులాబీ జెండానే తన రాజకీయ జీవితానికి చిరునామాగా మార్చుకున్నారు. అందుకే ఆయన మరణవార్త తెలిసిన వెంటనే మాజీ ముఖ్యమంత్రి, బీఆర్ఎస్ అధినేత కేసీఆర్ తీవ్ర దిగ్భ్రాంతి వ్యక్తం చేశారు. “ఉద్యమ సహచరుడిని… ఆప్తమిత్రుడిని కోల్పోయాను” అని ఆవేదన వ్యక్తం చేయడం, పెద్ది కుటుంబానికి పార్టీ అండగా ఉంటుందని ప్రకటించడం… ఇద్దరి మధ్య ఉన్న రాజకీయ, ఉద్యమ అనుబంధానికి అద్దం పడుతోంది.

నర్సంపేటే శ్వాస… ప్రజలే కుటుంబం

ఉద్యమం ముగిసింది… తెలంగాణ రాష్ట్రం ఆవిర్భవించింది. చాలామంది నాయకులు అధికారపు గదుల్లోకి వెళ్లిపోయారు. కానీ పెద్ది సుదర్శన్ రెడ్డి మాత్రం మళ్లీ ప్రజల మధ్యకే వచ్చారు. ఉద్యమ నాయకుడిగా సంపాదించుకున్న విశ్వాసాన్ని ప్రజాసేవగా మలచుకోవడమే తన బాధ్యతగా భావించారు. నర్సంపేట ఆయనకు ఒక నియోజకవర్గం కాదు… తన కుటుంబం. గ్రామాల్లో రోడ్లు బాగాలేకపోతే అది తన సమస్యగా భావించేవారు. రైతుకు నీరు రాకపోతే తనకు నిద్ర పట్టేది కాదు. విద్య, వైద్యం, తాగునీరు, సాగునీరు, మౌలిక సదుపాయాల అభివృద్ధి… ప్రతి అంశంలోనూ నర్సంపేట ముందుండాలని తపించారు. 2018 అసెంబ్లీ ఎన్నికల్లో నర్సంపేట ప్రజలు ఆయనపై నమ్మకం ఉంచి శాసనసభకు పంపారు. ఎమ్మెల్యేగా బాధ్యతలు చేపట్టిన తర్వాత కూడా అధికారం ఆయనలో ఎలాంటి మార్పు తీసుకురాలేదు. అధికారంలో ఉన్న నాయకుడిలా కాకుండా… పక్కింటి మనిషిలా ప్రజలతో మమేకమయ్యారు. సమస్యతో వచ్చిన వ్యక్తిని “రేపు రా” అని వెనక్కి పంపడం ఆయనకు అలవాటు కాదు. చేతనైనంత వరకు వెంటనే పరిష్కారం చూపించేందుకు ప్రయత్నించేవారు. అందుకే ఆయన ఇంటి గుమ్మం ఎప్పుడూ ప్రజలతో కళకళలాడేది.

ఓటమిని ఒప్పుకున్నా… ప్రజలను వదల్లేదు

రాజకీయాల్లో గెలవడం ఒక్కటే గొప్ప విషయం కాదు. మనుషుల మనసులు గెలవడం అంతకంటే గొప్పది. పెద్ది సుదర్శన్ రెడ్డి ఆ రెండో మార్గాన్ని ఎంచుకున్నారు. ఉద్యమం కోసం తన వ్యక్తిగత జీవితాన్ని పక్కన పెట్టారు. కష్టపడి కూడబెట్టుకున్న అంతో ఇంతో ఆస్తినీ ఉద్యమ అవసరాలకు వెచ్చించారని ఆయనతో కలిసి నడిచిన సహచరులు ఇప్పటికీ చెప్పుకుంటారు. అధికారాన్ని సంపాదించుకోవడం కోసం కాదు… ఆశయాన్ని నిలబెట్టుకోవడం కోసం బతికిన నాయకుడని గుర్తుచేసుకుంటారు. వ్యక్తిగతంగా ఎన్ని కష్టాలు ఎదురైనా… ఆర్థిక ఇబ్బందులు వచ్చినా… వాటిని ఎప్పుడూ బయటకు రానివ్వలేదు. తన బాధను తనలోనే దాచుకుని, ఎదుటివారిని మాత్రం చిరునవ్వుతో పలకరించేవారు. ఒక కార్యకర్త ఇంట్లో కష్టం ఉందంటే ముందుగా వెళ్లేది పెద్ది. ఒక కుటుంబానికి ఆపద వచ్చిందంటే అండగా నిలబడేది పెద్ది. ఎవరి కష్టం చూసినా తనదిగా భావించే మానవత్వం ఆయన వ్యక్తిత్వానికి అసలైన గుర్తింపు. రాజకీయ ప్రత్యర్థులు కూడా ఆయన గురించి మాట్లాడేటప్పుడు ముందుగా చెప్పేది ఆయన మనసు గురించే. వాగ్వాదాలు ఉండేవి… రాజకీయ విభేదాలు ఉండేవి… కానీ వ్యక్తిగత శత్రుత్వానికి ఆయన రాజకీయాల్లో చోటివ్వలేదు. అందరినీ కలుపుకొని నడిచే స్వభావమే ఆయనను ప్రత్యేక నాయకుడిగా నిలబెట్టింది.
2023 అసెంబ్లీ ఎన్నికల్లో విజయం దూరమైనా… ప్రజలకు దూరం కాలేదు. ఓటమిని రాజకీయ జీవితానికి ముగింపుగా భావించలేదు. అదే ఆత్మవిశ్వాసంతో నియోజకవర్గంలో తిరుగుతూ కార్యకర్తలకు ధైర్యం చెప్పారు. అనారోగ్యం వేధిస్తున్నా ప్రజలతో అనుబంధాన్ని కొనసాగించారు. అధికార పదవి లేకపోయినా ప్రజల మనసుల్లో తన స్థానాన్ని మాత్రం కోల్పోలేదు.

కేసీఆర్‌కు ఆప్తుడు… పార్టీకి అండగా నిలిచిన నాయకుడు

పార్టీ ఆవిర్భావం నుంచి చివరి శ్వాస వరకు గులాబీ జెండాను విడిచిపెట్టని నాయకుడిగా పెద్ది సుదర్శన్ రెడ్డి నిలిచారు. ఉద్యమ కాలంలోనూ… అధికారంలోనూ… ప్రతిపక్షంలోనూ ఒకే విధేయతతో పనిచేశారు. అందుకే ఆయన మరణవార్త విని బీఆర్ఎస్ అధినేత కేసీఆర్ తీవ్ర దిగ్భ్రాంతి వ్యక్తం చేశారు. “ఉద్యమ సహచరుడిని… ఆప్తమిత్రుడిని కోల్పోయాను” అని ఆవేదన వ్యక్తం చేయడం, పెద్ది కుటుంబానికి పార్టీ అండగా ఉంటుందని ప్రకటించడం… ఇద్దరి మధ్య ఉన్న విశ్వాసానికి నిదర్శనం. ఉమ్మడి వరంగల్ జిల్లాలో పార్టీని బలోపేతం చేయడంలో పెద్ది పోషించిన పాత్రను కేసీఆర్ పలుమార్లు ప్రస్తావించేవారని పార్టీ నాయకులు గుర్తు చేసుకుంటున్నారు. ఉద్యమ కాలం నుంచి చివరి వరకు పార్టీ కోసం అంకితభావంతో పనిచేసిన నాయకుడి మరణం బీఆర్ఎస్‌కు తీరని లోటని వారు అంటున్నారు.

ఏడుస్తున్న ఓరుగల్లు… మౌనంగా నర్సంపేట

ఆగస్టు 6, 1974న జన్మించిన పెద్ది సుదర్శన్ రెడ్డి…గురువారం అర్ధరాత్రి తర్వాత కన్నుమూశారు. కానీ ఆయన వెళ్లిపోయింది ఒక మనిషి మాత్రమే. ఆయన జ్ఞాపకాలు… ఆయన నడిచిన దారులు… ఆయన పలికిన మాటలు… ఆయన చేసిన పోరాటాలు ఈ నేలపై చిరస్థాయిగా మిగిలిపోతాయి. ఈ రోజు నర్సంపేటలో కనిపిస్తున్న ప్రతి కన్నీటి చుక్క వెనుక ఒక జ్ఞాపకం ఉంది. ఒకప్పుడు వారి ఇంటి గుమ్మం వద్ద నిలబడి ధైర్యం చెప్పిన నాయకుడి జ్ఞాపకం… ఉద్యమంలో భుజం భుజం కలిపి నడిచిన సహచరుడి జ్ఞాపకం… కష్టకాలంలో చేయూతనిచ్చిన మనిషి జ్ఞాపకం. రాజకీయాలు పదవులను ఇస్తాయి… ప్రజల ప్రేమను కాదు. పెద్ది సుదర్శన్ రెడ్డి పదవితో కాదు… మనసుతో ప్రజలను గెలుచుకున్నారు. అందుకే ఆయన అంతిమయాత్రకు వచ్చినవారు కేవలం ఒక పార్టీ కార్యకర్తలు కాదు… అన్ని వర్గాల ప్రజలు. వారు వీడ్కోలు చెప్పింది ఒక మాజీ ఎమ్మెల్యేకు కాదు… తమ ఇంటి పెద్దకు.

ఒక నాయకుడు చనిపోతే ఒక స్థానం ఖాళీ అవుతుంది…
ఒక ఉద్యమ యోధుడు చనిపోతే ఒక యుగం ముగుస్తుంది…
ఒక మంచి మనిషి చనిపోతే వేల హృదయాలు అనాథలవుతాయి…

పెద్ది సుదర్శన్ రెడ్డి వెళ్లిపోయారు… కానీ తెలంగాణ ఉద్యమ చరిత్రలో ఆయన వేసిన అడుగుల ముద్రలు చెరిగిపోవు. నర్సంపేట ప్రజల హృదయాల్లో ఆయన వెలిగించిన నమ్మక దీపం ఆరిపోదు. గులాబీ జెండా రెపరెపలాడిన ప్రతిసారి… తెలంగాణ ఉద్యమాన్ని తలుచుకున్న ప్రతిసారి… ఓరుగల్లు గడ్డపై ప్రజల పెదవులపై ఒకే పేరు వినిపిస్తూనే ఉంటుంది…

“పెద్ది… నిన్ను మరవదు ఈ గడ్డ.”

– క‌న్నీటితో నీ మిత్రుడు
కిర‌ణ్ గౌడ్ అరెల్లి
ఉత్త‌రం కాక‌తీయ ఎడిట‌ర్‌
-7396604266