చందుర్తిలో బెల్ట్ దందా జోరు
ఎక్సైజ్ ఉక్కుపాదం ఎక్కడ?
దాడులు చేస్తున్నా.. అక్రమ మద్యం ఆగేదెప్పుడు?
బంద్ వేళ అడ్డగోలు ధరలతో అమ్మకాలా?
సరఫరా మూలాలపై ఎక్సైజ్ నజర్ ఎక్కడ?
కాకతీయ, చందుర్తి : రాజన్న సిరిసిల్ల జిల్లా చందుర్తి మండలంలో బెల్ట్ షాపుల వ్యవహారం మరోసారి చర్చనీయాంశంగా మారింది. గ్రామాల్లో యథేచ్ఛగా అక్రమ మద్యం విక్రయాలు సాగుతున్నాయనే ఆరోపణలు వినిపిస్తున్నాయి. కొన్ని గ్రామాల్లో వీధికో బెల్ట్ షాప్ ఉన్నట్లు స్థానికులు చెబుతుండగా.. కిరాణా దుకాణాలు, చికెన్ సెంటర్లలోనూ మద్యం విక్రయాలు జరుగుతున్నాయనే ఫిర్యాదులు వస్తున్నాయి. వినాయక చవితి సందర్భంగా మద్యం దుకాణాలకు డ్రైడే నిబంధనలు అమల్లో ఉన్న సమయంలోనూ కొందరు బెల్ట్ షాపుల నిర్వాహకులు అధిక ధరలకు మద్యం విక్రయిస్తున్నారనే ఆరోపణలు ఉన్నాయి. బీర్పై రూ.30 నుంచి రూ.50 వరకు, క్వార్టర్ సీసాపై రూ.10 నుంచి రూ.30 వరకు అదనంగా వసూలు చేస్తున్నట్లు ఫిర్యాదులు వినిపిస్తున్నాయి. అయితే వీటికి అధికారిక నిర్ధారణ అవసరం. కొన్ని గ్రామాల్లో నాలుగైదు బెల్ట్ షాపులు నడుస్తున్నాయనే స్థానికుల ఆరోపణలున్నాయి. ఎక్సైజ్ అధికారులు అప్పుడప్పుడు తనిఖీలు, దాడులు చేస్తున్నా అక్రమ మద్యం విక్రయాలకు పూర్తిస్థాయిలో అడ్డుకట్ట పడటం లేదనే విమర్శలు వ్యక్తమవుతున్నాయి. బెల్ట్ షాపులకు మద్యం సరఫరా చేస్తున్న మూలాలపైనా దృష్టి పెట్టాలని స్థానికులు కోరుతున్నారు. ఇప్పటివరకు ఎన్ని దాడులు జరిగాయి? ఎంత మద్యం స్వాధీనం చేసుకున్నారు? ఎన్ని కేసులు నమోదయ్యాయి? అనే వివరాలను ఎక్సైజ్ శాఖ వెల్లడించాల్సి ఉంది. అధికారులపై ‘మామూళ్ల’ ఆరోపణలు కూడా వినిపిస్తున్నప్పటికీ వాటికి ఆధారాలు, అధికారిక నిర్ధారణ అవసరం. ఉన్నతాధికారులు ఆకస్మిక తనిఖీలు నిర్వహించి వాస్తవాలను వెలుగులోకి తేవాలని స్థానికులు కోరుతున్నారు.
