ప్రజావాణి దరఖాస్తులు వెంటనే పరిష్కరించాలి
పెండింగ్‌లో ఉంచకుండా చర్యలు తీసుకోవాలి
ప్రజావాణిలో 28 దరఖాస్తుల స్వీకరణ
అధికారులకు కలెక్టర్ బోర్ఖడే హేమంత్‌ సహదేవరావు ఆదేశం
కాకతీయ, ములుగు : ప్రజావాణిలో అందిన దరఖాస్తులను క్షుణ్ణంగా పరిశీలించి, సమస్యల పరిష్కారానికి సత్వర చర్యలు తీసుకోవాలని ములుగు జిల్లా కలెక్టర్ బోర్ఖడే హేమంత్‌ సహదేవరావు అధికారులను ఆదేశించారు. దరఖాస్తులను పెండింగ్‌లో ఉంచకుండా, అవసరమైన చోట క్షేత్రస్థాయిలో పరిశీలన జరిపి నిబంధనల ప్రకారం పరిష్కరించాలని స్పష్టం చేశారు. సోమవారం జిల్లా సమీకృత కలెక్టరేట్‌ సమావేశ మందిరంలో నిర్వహించిన ప్రజావాణిలో ప్రజల నుంచి దరఖాస్తులు స్వీకరించి, వారి సమస్యలను అడిగి తెలుసుకున్నారు. ప్రతి దరఖాస్తుపై అధికారులు ప్రత్యేక శ్రద్ధ చూపాలని, పరిష్కారానికి తీసుకున్న చర్యలను సంబంధిత దరఖాస్తుదారులకు తెలియజేయాలని కలెక్టర్ సూచించారు. ఈ కార్యక్రమంలో మొత్తం 28 దరఖాస్తులు అందాయి. వీటిలో భూ సమస్యలకు సంబంధించి 9, ఇందిరమ్మ ఇళ్ల కోసం 2, పింఛన్లకు సంబంధించి 3, ఇతర సమస్యలపై 14 దరఖాస్తులు ఉన్నాయి. కార్యక్రమంలో అదనపు కలెక్టర్లు సి.హెచ్‌. మహేందర్‌ జి, సంపత్‌ రావు, జిల్లా రెవెన్యూ అధికారి రవికుమార్‌, వివిధ శాఖల అధికారులు పాల్గొన్నారు.
