సమస్యలు తీరేదెప్పుడు?..
ఉద్యోగుల గళం వినేదెవరు?
పెండింగ్‌ సమస్యల పరిష్కారంపై ఉద్యోగుల్లో ఎదురుచూపులు
రెండో వేతన సవరణ సంఘం నివేదిక అమలుపై స్పష్టత కరువు
పాత పెన్షన్‌ విధానం పునరుద్ధరణపై ఆశలు
2004కు ముందు నోటిఫికేషన్ పొందిన ఉద్యోగులకూ పెన్షన్‌ చిక్కులు
ఆరోగ్య పథకం అమలులో సమస్యలపై ఉద్యోగుల ఆందోళన
ఈ నెల 6న టీజీఈజేఏసీ విస్తృత కార్యవర్గ సమావేశం
ఐదు రోజుల పనివిధానంపైనా చర్చించనున్న టీజీఈజేఏసీ
కాకతీయ,తెలంగాణ బ్యూరో : ఉద్యోగుల సమస్యలు పరిష్కారానికి నోచుకోకపోవడం.. కీలక హామీలు, డిమాండ్లపై స్పష్టత లేకపోవడంతో ఉద్యోగ సంఘాలు మరోసారి సమాలోచనకు సిద్ధమయ్యాయి. వేతన సవరణ నుంచి పెన్షన్‌ విధానం వరకు, ఆరోగ్య పథకం నుంచి పనిదినాల మార్పు వరకు అనేక అంశాలు పెండింగ్‌లో ఉండటంతో తెలంగాణ ఉద్యోగులు, గెజిటెడ్‌ అధికారులు, ఉపాధ్యాయులు, కార్మికులు, పెన్షనర్ల సమస్యలపై చర్చించేందుకు ఈ నెల 6న టీజీఈజేఏసీ విస్తృత కార్యవర్గ సమావేశం నిర్వహించనుంది. సమస్యల పరిష్కారంపై ఉద్యోగ వర్గాల్లో ఎదురుచూపులు కొనసాగుతున్న తరుణంలో ఈ భేటీకి ప్రాధాన్యం ఏర్పడింది. ఇన్నాళ్లుగా పెండింగ్‌లో ఉన్న అంశాలపై మరోసారి చర్చించి, తదుపరి కార్యాచరణను నిర్ణయించాల్సిన పరిస్థితి నెలకొంది. రెండో వేతన సవరణ సంఘం నివేదిక అమలు ఉద్యోగుల ప్రధాన డిమాండ్లలో ఒకటిగా ఉంది. నివేదికను తక్షణమే అమలు చేయాలన్న అంశాన్ని టీజీఈజేఏసీ సమావేశ ఎజెండాలో చేర్చింది. వేతన సవరణకు సంబంధించిన అంశంపై ఉద్యోగులు ఆశగా ఎదురుచూస్తున్నప్పటికీ, నివేదిక అమలుపై స్పష్టత లేకపోవడం వారిలో అసంతృప్తికి కారణమవుతోంది. వేతన సవరణ ఆలస్యం ఉద్యోగుల ఆర్థిక ప్రయోజనాలపై ప్రభావం చూపే అంశం కావడంతో దీనిని ఇకపై కూడా వాయిదా వేయకుండా పరిష్కార దిశగా తీసుకెళ్లాల్సిన అవసరం ఉందన్న అభిప్రాయం ఉద్యోగ వర్గాల్లో ఉంది. ఈ నేపథ్యంలో నివేదిక అమలుకు సంబంధించి సమావేశంలో ఎలాంటి నిర్ణయం తీసుకుంటారన్నది ఆసక్తికరంగా మారింది.
పాత పెన్షన్‌కు మార్పుపై ఎదురుచూపులు
ఉద్యోగుల పదవీ విరమణ అనంతర ఆర్థిక భద్రతకు సంబంధించిన కాంట్రిబ్యూటరీ పెన్షన్‌ విధానం (సీపీఎస్‌) అంశం మరో కీలక సమస్యగా కొనసాగుతోంది. సీపీఎస్‌ నుంచి పాత పెన్షన్‌ విధానానికి మార్పు చేయాలన్న డిమాండ్‌పై సమావేశంలో చర్చించనున్నారు. పదవీ విరమణ తర్వాత స్థిరమైన ఆర్థిక భద్రతపై ఉద్యోగుల్లో ఉన్న ఆందోళనకు పరిష్కారం చూపాల్సిన అవసరం ఉంది. ముఖ్యంగా 2004 సెప్టెంబరు 1కి ముందు నోటిఫికేషన్ పొందినప్పటికీ, ఆ తర్వాత ఉద్యోగంలో చేరిన వారికి సంబంధించిన పెన్షన్‌ అంశాన్ని కూడా ప్రత్యేకంగా చర్చించనున్నారు. ఈ వర్గం ఉద్యోగుల సమస్యపై స్పష్టమైన పరిష్కారం కోసం ఉద్యోగ సంఘాలు మరోసారి దృష్టి సారించనున్నాయి.
ఆరోగ్య పథకం అమలుపై అసంతృప్తి
ఉద్యోగులు, వారి కుటుంబ సభ్యులకు వైద్య భద్రత కల్పించాల్సిన ఆరోగ్య పథకం అమలును సమర్థవంతంగా నిర్వహించాలన్న అంశం కూడా సమావేశంలో ప్రాధాన్యం పొందనుంది. పథకం కాగితాలకే పరిమితం కాకుండా ఉద్యోగులకు అవసరమైన సమయంలో వైద్య సేవలు అందేలా చూడాల్సిన అవసరం ఉంది. పథకం అమలులో ఎదురవుతున్న సమస్యలను గుర్తించి, వాటి పరిష్కారానికి తీసుకోవాల్సిన చర్యలపై టీజీఈజేఏసీ చర్చించనుంది. ఉద్యోగుల ఆరోగ్య భద్రతకు సంబంధించిన అంశం కావడంతో దీనిపై సమావేశంలో ఎలాంటి అభిప్రాయాలు వ్యక్తమవుతాయో చూడాలి. ఎల్‌నినో ప్రభావం నేపథ్యంలో రాష్ట్రంలో వారానికి ఐదు రోజుల పనివిధానం అమలు చేసే అంశాన్ని కూడా సమావేశంలో చర్చించనున్నారు. ఉద్యోగుల పనివేళలు, పని పరిస్థితులకు సంబంధించి ఈ ప్రతిపాదనపై కార్యవర్గ సభ్యులు తమ అభిప్రాయాలను వెల్లడించనున్నారు. ఇది ప్రస్తుతం చర్చకు ప్రతిపాదించిన అంశమే. సాధ్యాసాధ్యాలు, అమలుకు సంబంధించిన విధానంపై సమావేశంలో సమాలోచన జరగనుంది.
కార్యాచరణపై ఆసక్తి
ఉద్యోగుల సమస్యలు ఒక్కొక్కటిగా పరిష్కారమవుతాయని ఆశిస్తున్న తరుణంలో కీలక అంశాలు ఇంకా పెండింగ్‌లో ఉండటంతో టీజీఈజేఏసీ విస్తృత సమావేశం ఏర్పాటు చేయడం ప్రాధాన్యం సంతరించుకుంది. సమస్యలను మరోసారి చర్చించడం మాత్రమే కాకుండా, వాటి పరిష్కారానికి ఎలాంటి కార్యాచరణ చేపట్టాలన్న దానిపై కూడా సమావేశం దృష్టి సారించాల్సి ఉంది. హైదరాబాద్‌ నాంపల్లిలోని గృహకల్ప సముదాయంలోని టీజీఓ భవన్‌లో ఈ నెల 6న ఉదయం 10.30 గంటలకు చైర్మన్‌ మరం జగదీశ్వర్‌ అధ్యక్షతన సమావేశం జరగనుంది. కేంద్ర విస్తృత కార్యవర్గ సభ్యులు, జిల్లా టీజీఈజేఏసీ శాఖల చైర్మన్లు, కన్వీనర్లు, అనుబంధ సంఘాల అధ్యక్షులు, ప్రధాన కార్యదర్శులు తప్పనిసరిగా హాజరుకావాలని ప్రధాన కార్యదర్శి ఏలూరి శ్రీనివాసరావు నవంబర్‌ 3న జారీ చేసిన సర్క్యులర్‌లో కోరారు. ఉద్యోగుల సమస్యలపై జరిగే ఈ భేటీ ఎలాంటి నిర్ణయాలకు వేదిక అవుతుందో, పెండింగ్‌ డిమాండ్ల పరిష్కారానికి ఎలాంటి దిశానిర్దేశం చేస్తుందో వేచి చూడాలి.
