నిరుద్యోగుల కన్నీళ్లు తెలిసిన వాడిని!

నిరుద్యోగుల కన్నీళ్లు తెలిసిన వాడిని!
పారాచూట్ లీడర్‌ను కాదు..ఆద‌రించండి
13 ఏళ్లుగా నిరుద్యోగుల మధ్యే నా ప్రయాణం
ఎన్నికలప్పుడే సమస్యలు గుర్తుకొచ్చే వారికి పట్టభద్రులే బుద్ధి చెబుతారు!
నాలుగు గోడల మధ్య నిరుద్యోగుల కన్నీటి వ్యథలను చూశా
ప్రత్యర్థులపై మెండేం కిరణ్ కుమార్ నిప్పులు
వ‌రంగ‌ల్ పట్టభద్రుల ఆత్మీయ సమ్మేళనంలో ఘాటు వ్యాఖ్యలు

కాక‌తీయ‌, హ‌న్మ‌కొండ : స్వలాభం కోసం ఎన్నికల సమయంలో ప్రత్యక్షమై పట్టభద్రుల ఓట్లు పొందాలని చూసే పారాచూట్ నాయకుడిని తాను కాదని, 13 ఏళ్లుగా నిరుద్యోగ యువత మధ్య ఉంటూ వారి సమస్యలు, ఆవేదనలు, కన్నీళ్లను ప్రత్యక్షంగా చూసిన వ్యక్తినని నల్గొండ– వరంగల్– ఖమ్మం జిల్లాల పట్టభద్రుల ఎమ్మెల్సీ స్వతంత్ర అభ్యర్థి మెండేం కిరణ్ కుమార్ స్పష్టం చేశారు. కోట్ల రూపాయల లాభాలు, వ్యాపార టర్నోవర్లు సంపాదించే కాంగ్రెస్, బీఆర్ఎస్ అభ్యర్థులకు నిరుద్యోగుల కుటుంబాల్లోని కన్నీటి వ్యథలు కనిపించవని, ఉద్యోగాల కోసం ఏళ్ల తరబడి ఎదురుచూస్తూ ఎన్నో ఆశలు, కలలతో జీవిస్తున్న యువత వేదన తనకు తెలుసని అన్నారు. ఎన్నికలు వచ్చినప్పుడే నిరుద్యోగులు, పట్టభద్రుల సమస్యలు గుర్తుకొచ్చే నాయకులకు ఈసారి పట్టభద్రులే తమ ఓటుతో బుద్ధి చెబుతారని ఘాటుగా వ్యాఖ్యానించారు. హన్మకొండలోని గోకుల్ నగర్ డాక్టర్ బి.ఆర్. అంబేద్కర్ భవన్‌లో శుక్రవారం మెండేం కిరణ్ కుమార్ ఆధ్వర్యంలో పట్టభద్రుల ఆత్మీయ సమ్మేళనం, ఓటర్ ఎన్‌రోల్‌మెంట్ మేళా నిర్వహించారు. ఈ కార్యక్రమానికి వేలాది మంది పట్టభద్రులు హాజరయ్యారు. ఈ సందర్భంగా కిరణ్ కుమార్ మాట్లాడారు.

నిరుద్యోగుల‌కు ఆశ‌లు చూపుతున్న‌రు..

అధికార, ప్రతిపక్ష పార్టీల అభ్యర్థులు ఎన్ఆర్ఐలుగా విదేశాల్లో ఉంటూ కోట్లాది రూపాయల సంపద కూడబెట్టుకుని, ఇప్పుడు ఆ ఆర్థిక బలాన్ని నిరుద్యోగుల ఆశలకు పెట్టుబడిగా వెదజల్లి ఎన్నికల్లో గెలవాలని చూస్తున్నారని విమర్శించారు. తాను మాత్రం సామాన్య మధ్యతరగతి కుటుంబం నుంచి వచ్చిన వ్యక్తినని, నిరుద్యోగుల కష్టాలను, వారి కుటుంబాల ఆర్థిక పరిస్థితులను, ఉద్యోగం సాధించాలన్న వారి తపనను దగ్గరగా అర్థం చేసుకున్నానని తెలిపారు. నిరుద్యోగుల బాధలను కేవలం ప్రసంగాలకే పరిమితం చేయకుండా రైట్ చాయిస్ అకాడమీ ద్వారా వారి ఉద్యోగ కలలను నిజం చేసే దిశగా రేయింబవళ్ళు శ్రమించానని పేర్కొన్నారు. విదేశాల్లో సంపాదించిన కోట్ల రూపాయలతో నిరుద్యోగుల ఆశలను కొనలేరని, వారి జీవితాల్లో మార్పు తీసుకొచ్చే కార్యాచరణ, నిరంతర ప్రజా సంబంధాలే నాయకత్వానికి అసలైన కొలమానాలని స్పష్టం చేశారు. తన 13 ఏళ్ల ప్రయాణం పదవులు, రాజకీయ ప్రయోజనాల చుట్టూ తిరగలేదని, నిరుద్యోగుల సమస్యలు, వారి భవిష్యత్తు కోసమే సాగిందని అన్నారు. ఉద్యోగాల కోసం ఎదురుచూస్తూ కుటుంబాల బాధ్యతలు మోస్తున్న యువత మనోవేదనను ప్రత్యక్షంగా చూశానని, నాలుగు గోడల మధ్య వారు పడే కన్నీటి కష్టాలు తనకు తెలుసునని పేర్కొన్నారు. ఎన్నికల సమయంలో మాత్రమే నిరుద్యోగుల సమస్యలను ప్రస్తావించి, ఆ తర్వాత వారిని విస్మరించే నాయకుల మాటలను పట్టభద్రులు నమ్మే పరిస్థితిలో లేరని అన్నారు.

ఈ ఎన్నిక రాజకీయ పలుకుబడికి వేదిక కావొద్దు

పట్టభద్రుల ఎన్నికలు డబ్బు, ఆర్భాటాలు, రాజకీయ పలుకుబడికి వేదిక కాకూడదని, నిరుద్యోగుల భవిష్యత్తు, పట్టభద్రుల హక్కులు, ఉద్యోగ అవకాశాల కోసం నిరంతరం పనిచేసే నాయకత్వాన్ని గుర్తించాలని కిరణ్ కుమార్ కోరారు. ఈ సమ్మేళనంలో పట్టభద్రులతో ఆత్మీయంగా మమేకమై వారి అభిప్రాయాలను తెలుసుకోవడంతో పాటు, అర్హులైన పట్టభద్రులందరూ ఎమ్మెల్సీ ఓటర్లుగా నమోదు కావాలనే లక్ష్యంతో ప్రత్యేక ఓటర్ ఎన్‌రోల్‌మెంట్ కార్యక్రమాన్ని నిర్వహించారు. వేలాది మంది పట్టభద్రులు స్వచ్ఛందంగా పాల్గొనడంతో కార్యక్రమం ఉత్సాహభరితంగా సాగింది. ఈ కార్యక్రమం లో నిరుద్యోగ జేఏసీ నేతలు చెర్రీ ప్రవీణ్, నవీన్ పట్నాయక్, బాలకోటి, మిత్ర, స్మార్ట్ ప్రవీణ్, శింబు, కాకతీయ యూనివర్సిటీ విద్యార్థి నాయకులు అభిరామ్, చందు, ఖజురో పాల్గొన్నారు