ఎమ్మెల్సీ ఖాళీలు.. ఆశావహుల కన్ను!
మూడు గవర్నర్‌ కోటా స్థానాల కోసం కాంగ్రెస్‌లో తీవ్ర పోటీ
పద్మశాలి హామీతో వేడెక్కిన రాజకీయ సమీకరణాలు
ముదిరాజ్‌, మున్నూరు కాపు, యాదవ వర్గాల నుంచి ప్రయత్నాలు
ఈరవత్రి అనిల్‌, చరణ్‌ కౌశిక్‌ యాదవ్‌ పేర్లపై చర్చ
సత్తు మల్లేశం, నీలం మధు, ఆరెపల్లి మోహన్‌ ఆశలు
బ్రాహ్మణ కోటాలో హర్కర వేణుగోపాల్‌, కె. దయాసాగర్‌
డిసెంబరులో ఎంపికకు కాంగ్రెస్ నాయకత్వం కసరత్తు
నామినేటెడ్‌ పదవులు, గ్రాడ్యుయేట్‌ ఎన్నికలతో ముడిపడిన లెక్కలు
కాకతీయ, తెలంగాణ బ్యూరో : తెలంగాణ శాసనమండలిలో మూడు గవర్నర్‌ కోటా ఎమ్మెల్సీ స్థానాలు ఖాళీ కావడంతో అధికార కాంగ్రెస్ పార్టీలో ఆశావహుల రాజకీయ ప్రయత్నాలు ముమ్మరమయ్యాయి. గోరటి వెంకన్న, బసవరాజు సారయ్య, బొగ్గారపు దయానంద్‌ పదవీకాలం శ‌నివారంతో ముగిసింది. ఈ స్థానాలను దక్కించుకునేందుకు పలువురు నాయకులు తమ ప్రయత్నాలను వేగవంతం చేశారు. పార్టీ కోసం దీర్ఘకాలంగా పనిచేసిన నాయకులకు గుర్తింపు కల్పించడం, సామాజిక వర్గాలకు తగిన ప్రాతినిధ్యం ఇవ్వడం, ప్రాంతీయ సమతుల్యత పాటించడం వంటి అంశాలు ఎంపికలో కీలకంగా మారనున్నాయి. మూడు స్థానాల్లో రెండు వెనుకబడిన తరగతులకు, మరో స్థానం బ్రాహ్మణ సామాజిక వర్గానికి కేటాయించాలనే ప్రతిపాదన ప్రధానంగా చర్చకు వస్తోంది. అయితే ఎస్సీ వర్గానికి ప్రాతినిధ్యం కల్పించాలనే డిమాండ్‌ కూడా ఉండటంతో తుది కూర్పుపై ఉత్కంఠ నెలకొంది.
పద్మశాలి హామీతో మొదలైన పోటీ
మూడు స్థానాల్లో ఒకదాన్ని పద్మశాలి సామాజిక వర్గానికి కేటాయిస్తామని ముఖ్యమంత్రి రేవంత్‌రెడ్డి సిరిసిల్ల బహిరంగ సభలో ప్రకటించడం ఈ పోటీకి మరింత ప్రాధాన్యం తెచ్చింది. ఈ వర్గం నుంచి మాజీ బాల్కొండ ఎమ్మెల్యే ఈరవత్రి అనిల్‌కుమార్‌, కొండా లక్ష్మణ్‌ బాపూజీ కుటుంబానికి చెందిన పున్న కైలాష్‌ పేర్లు ప్రధానంగా వినిపిస్తున్నాయి. పద్మశాలి వర్గానికి ఇచ్చిన హామీ అమలైతే ఈ ఇద్దరిలో ఎవరికీ అవకాశం దక్కుతుందనే చర్చ పార్టీ వర్గాల్లో సాగుతోంది. మరోవైపు నల్గొండ జిల్లా కాంగ్రెస్ నాయకత్వంలో చురుకుగా ఉన్న చరణ్‌ కౌశిక్‌ యాదవ్‌ పేరు కూడా బీసీ కోటాలో ప్రస్తావనకు వస్తోంది. సామాజిక వర్గానికి ఇచ్చిన హామీతో పాటు పార్టీకి చేసిన సేవలు, రాజకీయ అనుభవం, ప్రాంతీయ సమీకరణాలను పరిగణనలోకి తీసుకుని నాయకత్వం నిర్ణయం తీసుకోవాల్సి ఉంటుంది.
ముదిరాజ్‌, మున్నూరు కాపు వర్గాల నుంచి ప్రయత్నాలు
మరో ఎమ్మెల్సీ స్థానాన్ని ముదిరాజ్‌ సామాజిక వర్గానికి కేటాయించాలనే డిమాండ్‌ కూడా కాంగ్రెస్‌లో బలంగా వినిపిస్తోంది. ఈ వర్గం నుంచి మెదక్‌ ఎంపీ అభ్యర్థిగా పోటీ చేసిన నీలం మధు పేరు చర్చలో ఉంది. పార్టీ నాయకత్వంతో సంప్రదింపులు జరుపుతూ ఎమ్మెల్సీ అవకాశం కోసం ప్రయత్నిస్తున్నట్లు తెలుస్తోంది. మరోవైపు మున్నూరు కాపు సామాజిక వర్గానికి తగిన ప్రాతినిధ్యం కల్పించాలనే వాదన కూడా ముందుకొస్తోంది. కరీంనగర్‌ జిల్లా పరిషత్‌ మాజీ చైర్మన్‌ సత్తు మల్లేశం ఈ వర్గం నుంచి ఆశావహుడిగా ఉన్నారు. ముఖ్యమంత్రి రేవంత్‌రెడ్డితో ఆయనకు ఉన్న రాజకీయ సాన్నిహిత్యం కూడా ఈ ప్రయత్నాలకు ప్రాధాన్యం తెస్తోంది. పద్మశాలి, ముదిరాజ్‌, మున్నూరు కాపు, యాదవ వర్గాల నుంచి వస్తున్న డిమాండ్ల మధ్య రెండు బీసీ స్థానాల కేటాయింపు కాంగ్రెస్ నాయకత్వానికి కీలకంగా మారనుంది.
ఎస్సీ వర్గం నుంచి ఆరెపల్లి మోహన్‌, దొమ్మాటి సాంబయ్య
మూడు స్థానాల్లో ఒకదాన్ని ఎస్సీ సామాజిక వర్గానికి కేటాయించాలనే ప్రతిపాదన కూడా పార్టీ వర్గాల్లో వినిపిస్తోంది. ఈ కోణంలో మాజీ ఎమ్మెల్యే, ప్రభుత్వ విప్‌గా పనిచేసిన ఆరెపల్లి మోహన్‌ పేరు చర్చకు వచ్చింది. సర్పంచ్‌ స్థాయి నుంచి రాజకీయ ప్రస్థానం ప్రారంభించి జడ్పీటీసీ, జిల్లా పరిషత్‌ చైర్మన్‌, ఎమ్మెల్యే స్థాయికి ఎదిగిన ఆయనకు రాజకీయ అనుభవం ఉంది. వరంగల్‌కు చెందిన దొమ్మాటి సాంబయ్య పేరు కూడా ఎస్సీ వర్గం నుంచి ఎమ్మెల్సీ ఆశావహుడిగా ప్రస్తావనకు వస్తోంది. ఖమ్మం ప్రాంతానికి చెందిన మానవతా రాయ్‌ పేరు కూడా ఈ కోణంలో చర్చలో ఉంది. అయితే రెండు బీసీ స్థానాలు, ఒక బ్రాహ్మణ స్థానం అనే ప్రతిపాదన అమలైతే ఎస్సీ వర్గానికి అవకాశం కల్పించడం మరో రాజకీయ సర్దుబాటుపై ఆధారపడి ఉంటుంది.
బ్రాహ్మణ కోటాలో హర్కర, దయాసాగర్‌
మూడో స్థానాన్ని అగ్రవర్ణ సామాజిక వర్గానికి కేటాయించే ప్రతిపాదనలో బ్రాహ్మణ వర్గానికి ప్రాధాన్యం ఇవ్వాలనే ఆలోచన కూడా ఉంది. ఈ కోణంలో ప్రభుత్వ సలహాదారు హర్కర వేణుగోపాల్‌రావు, మాజీ వరంగల్‌ అసెంబ్లీ అభ్యర్థి కె. దయాసాగర్‌ పేర్లు ప్రధానంగా వినిపిస్తున్నాయి. బీమా రంగంలో పార్టీ బాధ్యతలు నిర్వహిస్తున్న పవన్‌ మల్లాది కూడా ఎమ్మెల్సీ అవకాశం కోసం ప్రయత్నిస్తున్నట్లు చర్చ జరుగుతోంది. గాంధీభవన్‌ వ్యవహారాల్లో బాధ్యతలు నిర్వహిస్తున్న కుమార్‌రావు పేరు కూడా రాజకీయ వర్గాల్లో ప్రస్తావనకు వస్తోంది. బ్రాహ్మణ సామాజిక వర్గానికి మండలిలో ప్రాతినిధ్యం కల్పించాలనే వాదనకు గతంలో ఇతర పార్టీల నుంచి లభించిన ప్రాతినిధ్యం కూడా నేపథ్యంగా నిలుస్తోంది. అయితే ఈ స్థానాన్ని ఏ వర్గానికి కేటాయించాలనే అంశంపై తుది నిర్ణయం ఇంకా వెలువడలేదు.
డిసెంబరులో ఎంపిక.. ముందుగా నామినేటెడ్‌ పదవుల భర్తీ
మూడు గవర్నర్‌ కోటా ఎమ్మెల్సీ స్థానాలకు అభ్యర్థుల ఎంపికను డిసెంబరు రెండో లేదా మూడో వారానికి వాయిదా వేయాలనే ఆలోచనలో కాంగ్రెస్ నాయకత్వం ఉన్నట్లు తెలుస్తోంది. ముందుగా ప్రభుత్వ కార్పొరేషన్లు, కమిషన్లు, ఇతర నామినేటెడ్‌ పదవుల భర్తీపై స్పష్టత తీసుకువచ్చిన తర్వాత ఎమ్మెల్సీ అభ్యర్థులను ఖరారు చేయాలనే కార్యాచరణ కొనసాగుతోంది. డిసెంబరు 7తో కాంగ్రెస్ ప్రభుత్వం మూడేళ్లు పూర్తి చేసుకోనున్న నేపథ్యంలో పార్టీ కోసం పనిచేసిన వందలాది మంది నాయకులు పదవుల కోసం ఎదురుచూస్తున్నారు. ఎమ్మెల్సీ అవకాశం దక్కని ఆశావహులకు కార్పొరేషన్లు, ఇతర నామినేటెడ్‌ పదవుల్లో సర్దుబాటు చేసే అంశం కూడా పరిశీలనలో ఉంది. ఈ క్రమంలో ఒకరికి పదవి కేటాయిస్తే మరొక వర్గంలో అసంతృప్తి తలెత్తకుండా సామాజిక, ప్రాంతీయ సమతుల్యత పాటించడం నాయకత్వానికి కీలకంగా మారింది.
ఐదు ఎమ్మెల్సీ స్థానాలతో ముడిపడిన రాజకీయ లెక్కలు
గవర్నర్‌ కోటాలో ఖాళీ అయిన మూడు స్థానాలతో పాటు 2027 మార్చిలో నల్గొండ–వరంగల్‌–ఖమ్మం, మహబూబ్‌నగర్‌–రంగారెడ్డి–హైదరాబాద్‌ గ్రాడ్యుయేట్‌ నియోజకవర్గాల్లో మరో రెండు ఎమ్మెల్సీ స్థానాలకు ఎన్నికలు జరగనున్నాయి. ఈ రెండు స్థానాల కోసం కూడా కాంగ్రెస్‌లో పలువురు నాయకులు ప్రయత్నాలు చేస్తున్నారు. నల్గొండ–వరంగల్‌–ఖమ్మం స్థానం కోసం రామిరెడ్డి సర్వోత్తమ్‌రెడ్డి, పొంగులేటి ప్రసాద్‌రెడ్డి, పి. కైలాష్‌ వంటి పేర్లు చర్చలో ఉన్నాయి. మహబూబ్‌నగర్‌–రంగారెడ్డి–హైదరాబాద్‌ స్థానం కోసం సామా రామ్మోహన్‌రెడ్డి, శివసేనారెడ్డి, సునీతా మహేందర్‌రెడ్డి, బి. వేణుగోపాల్‌రెడ్డి, గౌరీ సతీష్‌ తదితరులు ఆసక్తి చూపుతున్నట్లు తెలుస్తోంది. ఈ రెండు స్థానాలకు ఎన్నికల ద్వారా సభ్యులను ఎన్నుకోనుండగా, గవర్నర్‌ కోటాలోని మూడు స్థానాలకు నామినేషన్‌ ప్రక్రియ ద్వారా సభ్యులను నియమిస్తారు. వేర్వేరు విధానాల్లో భర్తీ అయ్యే ఈ ఐదు స్థానాలనూ సామాజిక, ప్రాంతీయ, రాజకీయ సమీకరణాల కోణంలో కాంగ్రెస్ నాయకత్వం పరిశీలిస్తోంది. మొత్తంగా మూడు ఎమ్మెల్సీ స్థానాలు కాంగ్రెస్‌లో కొత్త రాజకీయ కదలికలకు కేంద్రంగా మారాయి. పద్మశాలి వర్గానికి ముఖ్యమంత్రి ఇచ్చిన హామీ, బీసీ వర్గాల నుంచి వస్తున్న ప్రాతినిధ్య డిమాండ్లు, ఎస్సీ వర్గం ఆశలు, బ్రాహ్మణ సామాజిక వర్గం నుంచి సాగుతున్న ప్రయత్నాలు ఎంపిక ప్రక్రియను ఆసక్తికరంగా మార్చాయి. పార్టీకి చేసిన సేవలు, రాజకీయ అనుభవం, సామాజిక ప్రాతినిధ్యం, ప్రాంతీయ సమతుల్యత మధ్య సమన్వయం సాధించాల్సిన బాధ్యత అధిష్ఠానంపై ఉంది. ఎమ్మెల్సీ పదవులతో పాటు నామినేటెడ్‌ నియామకాలు, రాబోయే గ్రాడ్యుయేట్‌ ఎమ్మెల్సీ ఎన్నికలను దృష్టిలో పెట్టుకుని కాంగ్రెస్ నాయకత్వం తీసుకునే నిర్ణయాలు రాష్ట్ర రాజకీయాల్లో తదుపరి సమీకరణాలకు దిశానిర్దేశం చేయనున్నాయి.
