అటవీ శాఖలో అధికారి పెత్తనం!

అటవీ శాఖలో అధికారి పెత్తనం!
వివాదాస్పద వ్యవహారశైలితో సిబ్బందిలో కలవరం
రెండు డివిజన్ల బాధ్యతలు.. పర్యవేక్షణపై ప్రశ్నలు
ఆరు నెలల్లో వరుస సస్పెన్షన్లు.. క్షేత్రస్థాయి అధికారులపై ఒత్తిడి
ఎఫ్‌డీవో వెంకటేశ్వరరావు తీరుపై ఉద్యోగ వర్గాల్లో అసంతృప్తి

కాకతీయ, తెలంగాణ బ్యూరో : మహబూబాబాద్‌ జిల్లా అటవీ శాఖలో అధికారుల మధ్య సమన్వయ లోపం, ఉన్నతాధికారి వ్యవహారశైలి, వరుస సస్పెన్షన్లతో ఉద్యోగ వర్గాల్లో ఆందోళన వ్య‌క్త‌మ‌వుతోంది. రెండు డివిజన్ల బాధ్యతలు నిర్వహిస్తున్న ఎఫ్‌డీవో వెంకటేశ్వరరావు తీరుపై క్షేత్రస్థాయి సిబ్బందిలో అసంతృప్తి వ్యక్తమవుతోంది. విధుల నిర్వహణలో తగిన మార్గదర్శకాలు, పర్యవేక్షణ, సమన్వయం కొరవడుతున్నాయని.. మరోవైపు చిన్నపాటి ఘటనలకు కూడా కింది స్థాయి అధికారులే బాధ్యత వహించాల్సి వస్తోందని ఉద్యోగులు వాపోతున్నారు. మహబూబాబాద్‌ జిల్లాలో మహబూబాబాద్‌, గూడూరు రెండు అటవీ డివిజన్లు ఉన్నాయి. మహబూబాబాద్‌ ఎఫ్‌డీవోగా పనిచేస్తున్న వెంకటేశ్వర‌రావు గూడూరు డివిజన్‌ ఇన్‌చార్జి బాధ్యతలూ నిర్వహిస్తున్నారు. గూడూరు, కొత్తగూడ, గంగారం, బయ్యారం రేంజ్‌ల పరిధిలో జిల్లాలోని సుమారు 85 నుంచి 90 శాతం అటవీ ప్రాంతం ఉంది. విస్తారమైన అటవీ ప్రాంతం, కీలకమైన కోర్‌ ఫారెస్ట్‌ పరిధి పర్యవేక్షణ బాధ్యతలు ఒకే అధికారి వద్ద ఉండటంతో క్షేత్రస్థాయిలో సమన్వయం, పర్యవేక్షణ గాడి త‌ప్పంద‌న్న విమ‌ర్శ‌లు వినిపిస్తున్నాయి. విధుల నిర్వహణలో స్పష్టమైన ఆదేశాలు, మార్గదర్శకాలు లేకపోవడం వల్లే కొన్ని సందర్భాల్లో కింది స్థాయి అధికారులు ఇబ్బందులు ఎదుర్కొంటున్నారని ఉద్యోగ వర్గాల్లో చర్చ జరుగుతోంది.

వరుస సస్పెన్షన్లతో కలవరం

గత ఆరు నెలల్లో గూడూరు పరిధిలో చోటుచేసుకున్న ఘటనల్లో న‌లుగురు అధికారులు సస్పెన్షన్‌కు గురయ్యారు. ఇటీవల మామిడి తోటల నరికివేత, కలప అక్రమ రవాణా వ్యవహారంలో డిప్యూటీ రేంజ్‌ ఆఫీసర్‌తోపాటు మరో ముగ్గురిపై చర్యలు తీసుకున్నారు. ఈ ఘటనలో క్షేత్రస్థాయి అధికారుల బాధ్యత ఎంత? పర్యవేక్షణ స్థాయిలో తీసుకోవాల్సిన చర్యలు ఏమిటి? అనే అంశాలపై ఉద్యోగ వర్గాల్లో చర్చ సాగుతోంది. ఒకవైపు అటవీ అక్రమాల నియంత్రణలో కింది స్థాయి సిబ్బందిపై చర్యలు తీసుకుంటుండగా, మరోవైపు ఉన్నతాధికారుల పర్యవేక్షణ బాధ్యతలపైనా సమీక్ష జరగాలనే అభిప్రాయాలు వ్యక్తమవుతున్నాయి.

వేధింపులంటూ ఉద్యోగుల ఆవేదన

ఎఫ్‌డీవో వెంకటేశ్వరరావు వ్యవహారశైలిపై బీట్‌ ఆఫీసర్లు, సెక్షన్‌ ఆఫీసర్లు, రేంజ్‌ ఆఫీసర్లతోపాటు మినిస్టీరియల్‌ సిబ్బంది కూడా అసంతృప్తితో ఉన్నట్లు ఉద్యోగ వర్గాలు చెబుతున్నాయి. ఫోన్లు పరిశీలించడం,ఉన్న‌తాధికారుల‌తో కింది స్థాయి సిబ్బంది ట‌చ్‌లో ఉండొద్దు హెచ్చరించడం, తమపై విచారణ జరుగుతోందని భయపెట్టడం వంటి చర్యలకు పాల్పడుతున్నారనే ఆరోపణలు వినిపిస్తున్నాయి. ఉద్యోగుల వ్యక్తిగత వ్యవహారాలపై ఆరా తీస్తూ, విధుల విషయంలో ఒత్తిడి పెంచుతున్నారనే ఆవేదన వ్యక్తమవుతోంది. ఈ పరిస్థితుల్లో క్షేత్రస్థాయి సిబ్బంది స్వేచ్ఛగా విధులు నిర్వహించలేకపోతున్నారని, ఏ చిన్న పొరపాటు జరిగినా సస్పెన్షన్‌ వేటు తప్పదనే భయంతో పనిచేయాల్సి వస్తోందని ఉద్యోగ వర్గాలు పేర్కొంటున్నాయి. రెండు డివిజన్ల బాధ్యతలు నిర్వహిస్తున్న ఎఫ్‌డీవో పనితీరు, పర్యవేక్షణ విధానం, క్షేత్రస్థాయి సిబ్బందితో వ్యవహరిస్తున్న తీరుపై ఉన్నతాధికారులు సమీక్షించాలని ఉద్యోగ వర్గాలు కోరుతున్నాయి. వరుస సస్పెన్షన్లకు దారితీసిన ఘటనల్లో కింది స్థాయి అధికారుల పాత్రతోపాటు ఉన్నతాధికారుల ఆదేశాలు, పర్యవేక్షణ బాధ్యతలను కూడా పరిశీలించాలని సూచిస్తున్నాయి. ప్రధాన అటవీ సంరక్షణాధికారి, రాష్ట్ర ప్రధాన అటవీ సంరక్షణాధికారి స్థాయి అధికారులు జోక్యం చేసుకుని సమగ్ర విచారణ చేపడితేనే వాస్తవాలు వెలుగులోకి వస్తాయని అభిప్రాయపడుతున్నారు. సిబ్బందికి స్పష్టమైన మార్గదర్శకాలు, విధి నిర్వహణలో భరోసా కల్పించకపోతే అటవీ సంరక్షణ బాధ్యతలు నిర్వహించే క్షేత్రస్థాయి ఉద్యోగులపై ఒత్తిడి మరింత పెరిగే ప్రమాదం ఉందనే ఆందోళన వ్యక్తమవుతోంది.