వెయ్యి గ్రామాలు దాటిన భూ రీసర్వే!

వెయ్యి గ్రామాలు దాటిన భూ రీసర్వే!
2,720 గ్రామాల్లో సమగ్ర సర్వేకు శ్రీకారం
ఇప్పటికే 416 గ్రామాల్లో ప్రక్రియ పూర్తి
భూ యజమానుల అభ్యంతరాలకు తప్పనిసరిగా అవకాశం
చిన్న పొరపాటుకూ తావులేకుండా సర్వే నిర్వహణ
భూదార్‌ కేటాయింపును వేగవంతం చేయాలి
రెవెన్యూ మంత్రి పొంగులేటి శ్రీనివాసరెడ్డి ఆదేశం

కాకతీయ, తెలంగాణ బ్యూరో : తరతరాలుగా పరిష్కారానికి నోచుకోని భూ సమస్యలకు శాశ్వత పరిష్కారం చూపే లక్ష్యంతో రాష్ట్ర ప్రభుత్వం చేపట్టిన సమగ్ర భూ రీసర్వే వెయ్యి గ్రామాల మైలురాయిని దాటింది. ఇప్పటివరకు 416 గ్రామాల్లో సర్వే ప్రక్రియ పూర్తయింది. భూ యజమానులకు స్పష్టమైన హక్కులు, కచ్చితమైన సరిహద్దులు కల్పించడమే ఈ కార్యక్రమంలో అత్యంత ప్రాధాన్యమని రాష్ట్ర రెవెన్యూ, గృహనిర్మాణ, సమాచార పౌర సంబంధాల శాఖ మంత్రి పొంగులేటి శ్రీనివాసరెడ్డి స్పష్టం చేశారు. సర్వేలో చిన్న పొరపాటు కూడా భవిష్యత్తులో మరో భూ వివాదానికి కారణం కాకూడదని, ప్రతి దశలో పారదర్శకత, శాస్త్రీయత, కచ్చితత్వం పాటించాలని అధికారులను ఆదేశించారు. భూ యజమానుల అభిప్రాయాలు, అభ్యంతరాలకు పూర్తి ప్రాధాన్యమివ్వాలని సూచించారు. రాష్ట్రవ్యాప్తంగా మొత్తం 10,954 రెవెన్యూ గ్రామాలు ఉండగా, తొలి దశలో హైదరాబాద్‌ మినహా మిగిలిన 32 జిల్లాల్లో జిల్లాకు 70 గ్రామాల చొప్పున ఎంపిక చేశారు. నక్షాలు అందుబాటులో లేని గ్రామాలను కూడా కలుపుకొని మొత్తం 2,720 గ్రామాల్లో రీసర్వే నిర్వహిస్తున్నారు. ఇప్పటివరకు వెయ్యి గ్రామాల్లో సర్వే మైలురాయిని దాటగా, 416 గ్రామాల్లో ప్రక్రియ పూర్తయినట్లు మంత్రి వెల్లడించారు. సుమారు 125 సంవత్సరాల తర్వాత రాష్ట్రంలో సమగ్ర భూ సర్వేకు ముఖ్యమంత్రి రేవంత్‌రెడ్డి నాయకత్వంలోని ప్రజా ప్రభుత్వం శ్రీకారం చుట్టిందని, ఈ చారిత్రక కార్యక్రమాన్ని విజయవంతం చేసేందుకు అధికారులు అంకితభావంతో పనిచేయాలని సూచించారు.

రెవెన్యూ రికార్డుల పరిశీలన తర్వాతే క్షేత్రస్థాయి సర్వే

గ్రామంలో సర్వే ప్రారంభించే ముందు అక్కడి రెవెన్యూ రికార్డులను పూర్తిస్థాయిలో పరిశీలించాలని మంత్రి ఆదేశించారు. రికార్డుల్లో నమోదైన భూముల విస్తీర్ణం, యాజమాన్య హక్కులు, సరిహద్దుల వివరాలను క్షుణ్ణంగా తనిఖీ చేసిన తర్వాతే వాటి ఆధారంగా క్షేత్రస్థాయిలో సర్వే చేపట్టాలని స్పష్టం చేశారు. సర్వే పూర్తయిన అనంతరం సంబంధిత భూ యజమానులకు తప్పనిసరిగా నోటీసులు జారీ చేయాలని, నమోదైన వివరాలను పరిశీలించుకునేందుకు తగిన సమయం ఇవ్వాలని సూచించారు. ఏవైనా అభ్యంతరాలు, అభిప్రాయాలు ఉంటే నమోదు చేసుకునే అవకాశం కల్పించి, వాటిని నిబంధనల ప్రకారం క్షుణ్ణంగా పరిశీలించి పరిష్కరించాలని ఆదేశించారు. సర్వే విధానం, నోటీసుల జారీ, అభ్యంతరాల నమోదు, పరిష్కార ప్రక్రియపై గ్రామస్థాయిలో రైతులు, భూ యజమానులకు విస్తృతంగా అవగాహన కల్పించాలని మంత్రి సూచించారు. సర్వే ప్రక్రియపై ఎలాంటి అపోహలు, అనుమానాలు లేకుండా అధికారులు పారదర్శకంగా వ్యవహరించాలన్నారు. కేవలం ప్రభుత్వ రికార్డుల నవీకరణకే సర్వే పరిమితం కాకూడదని, ప్రతి భూ యజమానికి తన భూమిపై స్పష్టమైన హక్కులు, కచ్చితమైన హద్దులు కల్పించడమే ప్రధాన లక్ష్యంగా ఉండాలని పేర్కొన్నారు. క్షేత్రస్థాయిలో గుర్తించే చిన్నచిన్న లోపాలను వెంటనే సరిదిద్దాలని, ఒక్క తప్పిదం కూడా భవిష్యత్తులో వివాదానికి దారితీయకుండా జాగ్రత్తలు తీసుకోవాలని ఆదేశించారు.

భూదార్‌ కేటాయింపునకు చర్యలు

రీసర్వే పూర్తయిన గ్రామాల్లో ప్రతి భూమికి ఆధార్‌ తరహాలో ప్రత్యేక గుర్తింపు కల్పించే భూదార్‌ నంబర్‌ కేటాయింపు ప్రక్రియను వేగవంతం చేయాలని మంత్రి ఆదేశించారు. భూముల విస్తీర్ణం, హక్కులు, సరిహద్దులకు సంబంధించిన స్పష్టమైన రికార్డులు అందుబాటులోకి తీసుకురావాలన్నారు. తరతరాలుగా ఒక తరం నుంచి మరో తరానికి బదిలీ అవుతున్న భూ సమస్యలకు ఈ సమగ్ర సర్వే ద్వారా శాశ్వత ముగింపు పలకాలని స్పష్టం చేశారు. భవిష్యత్తు తరాలకు భూ వివాదాలు లేని తెలంగాణను అందించడమే ప్రభుత్వ లక్ష్యమని పేర్కొన్నారు. రీసర్వే పురోగతి, క్షేత్రస్థాయిలో ఎదురవుతున్న సమస్యలు, సర్వే నిర్వహణలో తీసుకోవాల్సిన జాగ్రత్తలపై బుధవారం జిల్లా కలెక్టర్లు, అదనపు కలెక్టర్లు, ఆర్డీవోలు, సర్వే శాఖ సహాయ సంచాలకులతో ప్రత్యేక వీడియో కాన్ఫరెన్స్‌ నిర్వహించాలని మంత్రి నిర్ణయించారు. జిల్లా వారీగా పురోగతిని సమీక్షించి, తదుపరి కార్యాచరణపై ఆదేశాలు ఇవ్వనున్నారు. మంగళవారం సచివాలయంలో రెవెన్యూ ఉన్నతాధికారులతో నిర్వహించిన సమీక్షలో మంత్రి క్షేత్రస్థాయిలో సర్వే సిబ్బందితో ఫోన్‌లో మాట్లాడి అక్కడి పరిస్థితులను తెలుసుకున్నారు. ఈ సమావేశంలో రెవెన్యూ శాఖ కార్యదర్శి డి.ఎస్‌. లోకేష్‌కుమార్‌, భూ సర్వే, భూ రికార్డుల కమిషనర్‌ రాజీవ్‌గాంధీ హనుమంతు, సంయుక్త సంచాలకురాలు ప్రసన్నలక్ష్మి తదితరులు పాల్గొన్నారు.