కాకతీయ, తెలంగాణ బ్యూరో: కాంగ్రెస్ సీనియర్ నాయకుడు, మాజీ పార్లమెంట్ సభ్యుడు మధు యాష్కీ గౌడ్ అస్వస్థతకు గురయ్యారు. ఈ సంఘటన మంగళవారం మధ్యాహ్నం సెక్రటేరియట్‌లో చోటుచేసుకుంది. మధు యాష్కీ మంత్రి శ్రీధర్ బాబు ఛాంబర్‌లో చర్చల నిమిత్తం ఉన్న సమయంలో అకస్మాత్తుగా తల తిరగడం, అస్వస్థతకు గురవడంతో కుర్చీ నుండి కింద పడిపోయారు.
ఈ పరిస్థితిని గమనించిన మంత్రి శ్రీధర్ బాబు తక్షణమే సిబ్బందిని అప్రమత్తం చేసి, వైద్యులను సంప్రదించారు. వెంటనే అక్కడే ప్రాథమిక చికిత్స అందించగా, తరువాత ఆయనను అత్యవసరంగా సమీపంలోని ప్రైవేట్ ఆసుపత్రికి తరలించారు. ప్రస్తుతం ఆయన ఆరోగ్యంపై వైద్యులు పరిశీలనలు చేస్తున్నారు. మధు యాష్కీ గౌడ్ హఠాత్తుగా కుప్పకూలిన విషయం తెలిసి కాంగ్రెస్ నేతలు, కార్యకర్తలు ఆందోళన వ్యక్తం చేస్తున్నారు. ఆయన త్వరగా కోలుకోవాలని ఆకాంక్షిస్తూ పలువురు పార్టీ నేతలు ఆసుపత్రికి చేరుకుంటున్నారు.
గత కొన్ని రోజులుగా మధు యాష్కీ పార్టీ కార్యక్రమాల్లో చురుకుగా పాల్గొంటూ, ముఖ్యంగా తెలంగాణలో కాంగ్రెస్ బలోపేతానికి కృషి చేస్తున్నారు. ఆయన అకస్మాత్తుగా అస్వస్థతకు గురవడం కాంగ్రెస్ శ్రేణుల్లో కలవరం కలిగించింది. వైద్యుల ప్రకారం, మధు యాష్కీ గౌడ్‌కు బీపీ, షుగర్ లేదా హృదయ సంబంధిత సమస్యల కారణంగా తాత్కాలిక అస్వస్థత కలిగివుండవచ్చని ప్రాథమికంగా భావిస్తున్నారు. అయితే, పూర్తి వైద్య నివేదిక వెలువడిన తర్వాత మాత్రమే స్పష్టత వస్తుందని ఆసుపత్రి వర్గాలు చెబుతున్నాయి.
ప్రస్తుతం ఆయన ఆరోగ్యం స్థిరంగా ఉందని వైద్యులు చెబుతుండగా, కాంగ్రెస్ నేతలు, అభిమానులు ఆయన ఆరోగ్యంపై ఆత్రుతగా సమాచారం కోసం ఎదురుచూస్తున్నారు.
