సైన్స్ పై మక్కువ పెంచుకోవాలి

సైన్స్ పై మక్కువ పెంచుకోవాలి
విద్యార్థుల‌కు కలెక్టర్ సత్య శారద పిలుపు
సైన్స్‌ఫెయిర్‌ను సంద‌ర్శించిన క‌లెక్ట‌ర్‌..ఎగ్జిబిట్ల సంద‌ర్శ‌న‌
రెండో రోజు సైన్స్ ఫెయిర్ కు పోటెత్తిన విద్యార్థులు

కాకతీయ, వరంగల్ ప్రతినిధి : విద్యార్థి దశ నుండే సైన్స్ పై మక్కువ పెంచుకోవాలని వ‌రంగ‌ల్ జిల్లా క‌లెక్ట‌ర్ స‌త్య శార‌ద సూచించారు.విద్యార్థులు సైన్స్ ఫెయిర్ స్ఫూర్తితో మున్ముందు మరిన్ని ఉత్తమమైన ప్రాజెక్టులు రూపొందించాలని, పాఠశాల స్థాయి నుండి సైన్స్ పై మక్కువ పెంచుకోవాలని తెలిపారు. ప్రతి పాఠశాలలో సైన్స్ ల్యాబ్ ను ఉపాధ్యాయులు ఉపయోగించుకోవాలని, విద్యార్థులు నూతన ఆవిష్కరణల వైపు దృష్టి సారించేలా కృషి చేయాలని కలెక్టర్ కోరారు. వరంగల్ ఉర్సు గుట్ట తాళ్ల పద్మావతి ఇంటర్నేషనల్ పాఠశాలలో జరుగుతున్న ఇన్స్పైర్ అవార్డ్స్ మనక్ మరియు ఆర్ బీవీపీ సైన్స్ ఎగ్జిబిషన్ కి రెండో రోజు కలెక్టర్ డాక్టర్ సత్య శారద ముఖ్య అతిథిగా హాజర‌య్యారు. ఇన్స్పైర్ సైన్స్ ఎగ్జిబిషన్‌ను సందర్శించి విద్యార్థుల ప్రాజెక్టులను ఒక్కొక్కటిగా పరిశీలిస్తూ అభినందనలు తెలిపారు. జిల్లాలోని 85 ప్రభుత్వ, ప్రైవేట్, గురుకుల, కస్తూర్బా, టెక్నికల్ పాఠశాలల నుంచి 6000 మంది విద్యార్థులు పాల్గొన్నారు. వెయ్యికి పైగా ఇతరులు వీక్షించారు. సైన్స్‌పై విద్యార్థుల ఆసక్తి, ప్రయోగ పరిజ్ఞానం, సృజనాత్మకత చూసి సందర్శకులు ముచ్చటపడ్డారు. అటవీశాఖ మరియు జిల్లా గ్రామీణాభివృద్ధి శాఖ ఆధ్వర్యంలో స్టాల్స్ ఏర్పాటు చేశారు.జీవవిజ్ఞానం, పర్యావరణ సంరక్షణ, నీటి నిర్వహణ, పునర్వినియోగ శక్తులు, వ్యవసాయ యాంత్రీకరణ, సుస్థిర అభివృద్ధి, రోబోటిక్స్, టెక్నాలజీ ఆధారిత పరిష్కారాలు వంటి విభాగాల్లో విద్యార్థులు సరికొత్త నమూనాలు ప్రదర్శించారు. కార్య‌క్ర‌మంలో జిల్లా విద్యాశాఖ అధికారి రంగయ్య నాయుడు త‌దిత‌రులు పాల్గొన్నారు.