గ్రామ సమస్యల పరిష్కారమే లక్ష్యంగా మండల సమావేశాలు
అధికారులు సమన్వయంతో పనిచేయాలి
ఆత్మ కమిటీ చైర్మన్ చిటమట రఘు
కాకతీయ, ఏటూరునాగారం: గ్రామాల్లోని సమస్యలను గుర్తించి, సత్వర పరిష్కారం చూపేందుకే కాంగ్రెస్ ప్రభుత్వం మండల సర్వసభ్య సమావేశాలు నిర్వహిస్తోందని ములుగు జిల్లా ఆత్మ కమిటీ చైర్మన్ చిటమట రఘు అన్నారు. మంత్రి సీతక్క ఆదేశాల మేరకు ఏటూరునాగరం మండల పరిషత్‌ కార్యాలయంలో నిర్వహించిన ప్రజా పాలన–ప్రగతి పాలన మండల సర్వసభ్య సమావేశంలో ఆయన పాల్గొన్నారు. మండల పరిషత్‌ అభివృద్ధి అధికారి శ్రీనివాస్‌ అధ్యక్షతన జరిగిన సమావేశానికి తహసీల్దార్‌ గుర్రం జగదీష్‌ హాజరయ్యారు. నాలుగు గంటలపాటు సాగిన సమావేశంలో గ్రామాల సమస్యలు, తాగునీరు, సాగునీరు, వ్యవసాయం, విద్యుత్‌ సరఫరాపై చర్చించారు. ఎల్‌నినో ప్రభావం నేపథ్యంలో నీటిని పొదుపుగా వినియోగించేలా రైతులకు అవగాహన కల్పించాలని, ఆరుతడి పంటల సాగును ప్రోత్సహించాలని సూచించారు. పశువులకు నీటి కొరత రాకుండా నీటి తొట్టెలు ఏర్పాటు చేయడంతో పాటు, ఇంటి కుంటలు, పంట కుంటలు, ఇంకుడు గుంతల ద్వారా వర్షపు నీటిని నిల్వ చేసుకోవాలని తెలిపారు. విద్యుత్‌ వృథాను అరికట్టేలా చర్యలు తీసుకోవాలన్నారు. గ్రామాల్లోని సమస్యలను సర్పంచులు, గ్రామ కార్యదర్శులు సమావేశంలో అధికారుల దృష్టికి తీసుకురావాలని చిటమట రఘు సూచించారు. సంబంధిత శాఖల అధికారులు సమస్యలను నిర్లక్ష్యం చేయకుండా సత్వరం పరిష్కరించాలని, సమన్వయంతో పనిచేసి మండల అభివృద్ధికి తోడ్పడాలని స్పష్టం చేశారు. సమావేశంలో వివిధ శాఖల అధికారులు, సర్పంచులు, గ్రామ కార్యదర్శులు పాల్గొన్నారు.
