విద్యార్థులకు 21 రకాల వస్తువులు వంద శాతం అందాలి
ఎంఆర్‌సీల్లో ఐటీడీఏ పీఓ లెనిన్ వత్సల్ టోప్పో తనిఖీలు
కాకతీయ, ఏటూరునాగారం: హాస్టల్ విద్యార్థులకు అందించాల్సిన 21 రకాల అవసర వస్తువుల పంపిణీని వంద శాతం పూర్తి చేయాలని ఐటీడీఏ పీఓ లెనిన్ వత్సల్ టోప్పో అధికారులను ఆదేశించారు. గురువారం ఏటూరునాగరం, తాడ్వాయి మండలాల్లోని మండల వనరుల కేంద్రాలను (ఎంఆర్‌సీ) సందర్శించిన ఆయన ఎస్సీ, ఎస్టీ, బీసీ వర్గాల హాస్టల్ విద్యార్థులకు పంపిణీ చేస్తున్న వస్తువుల రికార్డులను తనిఖీ చేశారు. యూనిఫాం వస్త్రాలు, ఐడీ కార్డులు, బెల్టులు, బ్లాక్‌షూస్‌, వైట్‌షూస్‌, సాక్సులు, ట్రాక్‌షూస్‌, స్కూల్‌ బ్యాగులు, బెడ్‌షీట్లు, ప్లేట్లు, గ్లాసులు, ట్రంక్‌ బాక్సులు, దుప్పట్లు, నైట్‌ డ్రెస్‌లు తదితర 21 రకాల వస్తువుల పంపిణీ వివరాలను పరిశీలించారు. ప్రతి విద్యార్థికి నిర్దేశించిన వస్తువులన్నీ అందాయో లేదో రికార్డులతో సరిపోల్చి ధ్రువీకరించాలని, అర్హులైన విద్యార్థులందరికీ అన్ని వస్తువులు అందేలా చర్యలు తీసుకోవాలని స్పష్టం చేశారు. పంపిణీలో ఎలాంటి లోటుపాట్లకు తావివ్వకుండా అధికారులు నిరంతరం పర్యవేక్షించాలని సూచించారు. ఈ తనిఖీల్లో ఏటూరునాగరం మండల విద్యాశాఖ అధికారి మల్లయ్య, తాడ్వాయి మండల విద్యాశాఖ అధికారి శ్రీనివాస్ పాల్గొన్నారు.
