బాలల భద్రతపై అవగాహన పెంచుకోవాలి
పోక్సో కేసుల్లో కఠినంగా శిక్షలు అమలు చేస్తాం
చేర్యాల జడ్జి బానోత్ శ్రీరామ్
కాకతీయ,చేర్యాల : బాలల భద్రత, హక్కుల పరిరక్షణపై ప్రతి ఒక్కరూ అవగాహన కలిగి ఉండాలని చేర్యాల న్యాయస్థాన న్యాయమూర్తి బానోత్ శ్రీరామ్ అన్నారు. సుప్రీంకోర్టు ఆదేశాల మేరకు సురక్షిత్ బచ్పన్ అభియాన్‌లో భాగంగా చేర్యాల కోర్టు పరిధిలోని కస్తూరిబా బాలికల కళాశాలలో నిర్వహించిన సురక్ష అవగాహన కార్యక్రమంలో ఆయన పాల్గొని, పోక్సో చట్టంపై విద్యార్థినులకు అవగాహన కల్పించారు.ఈ సందర్భంగా జడ్జి బానోత్ శ్రీరామ్ మాట్లాడుతూ.. బాలలపై లైంగిక వేధింపులకు పాల్పడే వారిపై చట్టప్రకారం కఠిన చర్యలు తీసుకుంటామని తెలిపారు. బాలల రక్షణకు పోక్సో చట్టం కల్పిస్తున్న హక్కులు, నిబంధనలపై ప్రతి ఒక్కరూ అవగాహన పెంచుకోవాలని సూచించారు. బాలలపై జరిగే వేధింపులను గుర్తించినప్పుడు సంబంధిత అధికారులకు సమాచారం అందించాలని పేర్కొన్నారు.ఈ కార్యక్రమంలో సీఐ బానోత్ రమేష్ నాయక్, ఎస్ఐ అపూర్వ రెడ్డి,బార్ అసోసియేషన్ అధ్యక్షుడు వీరమల్లయ్య, ప్రధాన కార్యదర్శి మెరుగు రమేష్, సీనియర్ న్యాయవాది భూమిగారి మనోహర్, న్యాయవాదులు పొన్నం సురేష్, నల్గొండ సంతోష్, గుస్కా వెంకటేష్, నీరటి రాజలింగం, బైరగోని ప్రసాద్, రామకృష్ణారెడ్డి, ఆంజనేయులు, సాగర్ కళాశాల అధ్యాపకులు, విద్యార్థులు తదితరులు పాల్గొన్నారు.
