అక్షర చిట్ ఫండ్స్ డైరెక్టర్ అరెస్ట్..
బెంగళూరు విమానాశ్రయంలో నాటకీయ అరెస్ట్..
అమెరికాకు పారిపోతుండగా అదుపులోకి..
పెట్టుబడిదారుల నుంచి లక్షల సేకరణ ఆరోపణలు..
సుబేదారి పోలీసుల ప్రత్యేక బృందం ఆపరేషన్..
కోర్టులో హాజరు.. రిమాండ్ విధింపు..
ఆర్థిక లావాదేవీలపై లోతైన దర్యాప్తు..
మరిన్ని బాధితులు వెలుగులోకి వచ్చే అవకాశం..
కాకతీయ, వరంగల్ బ్యూరో : వరంగల్ నగరానికి చెందిన అక్షర చిట్ ఫండ్స్ డైరెక్టర్ పేరాల శ్రీవిద్యను సుబేదారి పోలీసులు అరెస్ట్ చేశారు. 2022లో నమోదైన చిట్ ఫండ్ మోసం కేసులో ఆమె ప్రధాన నిందితురాలిగా ఉన్నారు. కొంతకాలంగా పోలీసులకు దొరకకుండా తప్పించుకుని తిరుగుతుండగా, విశ్వసనీయ సమాచారం ఆధారంగా పోలీసులు బెంగళూరు విమానాశ్రయంలో అదుపులోకి తీసుకున్నారు. అమెరికాకు వెళ్లేందుకు సిద్ధమవుతున్న సమయంలోనే ఆమెను పట్టుకున్నట్లు పోలీసులు వెల్లడించారు.
2022లో నమోదు అయిన కేసు.. పెట్టుబడిదారుల ఫిర్యాదులు..
2022లో సుబేదారి పోలీస్ స్టేషన్ లో శ్రీవిద్యపై మోసం కేసు నమోదైంది. చిట్ ఫండ్ పేరుతో అధిక లాభాల హామీ ఇచ్చి పలువురు పెట్టుబడిదారుల నుంచి లక్షల రూపాయలు సేకరించినట్లు ఆరోపణలు ఉన్నాయి. గడువు పూర్తైన తర్వాత డబ్బులు చెల్లించకుండా కార్యాలయాన్ని మూసివేసి పరారైనట్లు బాధితులు ఫిర్యాదు చేశారు. ఈ మేరకు పోలీసులు కేసు నమోదు చేసి దర్యాప్తు ప్రారంభించారు.
పరారీలో నిందితురాలు.. ప్రత్యేక బృందాల గాలింపు..
కేసు నమోదు అయిన తర్వాత శ్రీవిద్య కొంతకాలం వరంగల్‌లోనే ఉండి, అనంతరం ఇతర ప్రాంతాలకు వెళ్లినట్లు పోలీసులు గుర్తించారు. ఆమె విదేశాలకు పారిపోయే ప్రయత్నం చేస్తున్నారన్న సమాచారంతో లుక్‌అవుట్ నోటీసులు జారీ చేసినట్లు తెలిసింది. బెంగళూరు వెళ్లి అక్కడి నుంచి అమెరికాకు వెళ్లేందుకు ప్రయత్నిస్తున్న సమయంలోనే ఆమెను అదుపులోకి తీసుకున్నారు. అరెస్టు అనంతరం శనివారం రాత్రి ఆమెను వరంగల్‌కు తీసుకువచ్చి కోర్టులో హాజరుపరచగా, న్యాయమూర్తి రిమాండ్ విధించారు. అనంతరం ఆమెను నర్సంపేట జైలు కు తరలించారు. కేసు దర్యాప్తు కొనసాగుతోందని పోలీసులు తెలిపారు.
ఆర్థిక లావాదేవీలపై లోతైన దర్యాప్తు..
అక్షర చిట్ ఫండ్స్ సంస్థకు సంబంధించిన బ్యాంకు ఖాతాలు, ఆస్తులు, లావాదేవీలపై పోలీసులు సమగ్ర విచారణ చేపట్టినట్లు సమాచారం. బాధితుల నుంచి ఇంకా ఫిర్యాదులు రావచ్చని భావిస్తున్న పోలీసులు, ఎవరైనా మోసపోయి ఉంటే ముందుకు వచ్చి ఫిర్యాదు చేయాలని సూచించారు. సంస్థలో ఇతర భాగస్వాములు లేదా సహకరించిన వ్యక్తులు ఉన్నారా అన్న కోణంలో కూడా దర్యాప్తు కొనసాగుతోంది. శ్రీవిద్య అరెస్ట్‌తో బాధితుల్లో కొంత ఊరట కనిపిస్తున్నప్పటికీ, తమ డబ్బులు తిరిగి వస్తాయా అనే ఆందోళన వ్యక్తమవుతోంది. పోలీసుల దర్యాప్తు పూర్తయ్యాక తదుపరి చట్టపరమైన చర్యలు చేపడతామని అధికారులు తెలిపారు. కేసు పురోగతిపై స్థానికంగా ఆసక్తి నెలకొంది.
