నిర్లక్ష్యం వీడండి.. బూత్ స్థాయికి వెళ్లండి
ఓటర్ల జాబితా సవరణపై శ్రేణులు దృష్టి పెట్టాలి
18 ఏళ్లు నిండిన ప్రతి ఒక్కరికీ ఓటు హక్కు కల్పించడమే లక్ష్యం
టీపీసీసీ ఉపాధ్యక్షురాలు హనుమాండ్ల ఝాన్సీ రెడ్డి
రాయపర్తిలో పార్టీ ముఖ్య నేతలు, కార్యకర్తలతో కీలక సమీక్షా సమావేశం
కాకతీయ, రాయపర్తి : ప్రత్యేక ఓటరు జాబితా సవరణ (ఎస్ఐఆర్) కార్యక్రమంపై రాయపర్తి మండలంలో కాంగ్రెస్ పార్టీ శ్రేణులతో టీపీసీసీ ఉపాధ్యక్షురాలు హనుమాండ్ల ఝాన్సీ రెడ్డి శనివారం ఒక కీలక సమీక్షా సమావేశం నిర్వహించారు. పార్టీ భవిష్యత్తుకు ఈ ఓటర్ల సవరణ ప్రక్రియ ఎంతో కీలకమని, ఎక్కడ ఎలాంటి నిర్లక్ష్యానికి తావు లేకుండా ప్రతి ఒక్క కార్యకర్త, నాయకుడు బాధ్యతగా పనిచేసి ఈ కార్యక్రమాన్ని విజయవంతం చేయాలని ఆమె పిలుపునిచ్చారు. క్షేత్రస్థాయిలో కష్టపడి పనిచేసే వారికి భవిష్యత్తులో పార్టీలో తగిన గుర్తింపు ఉంటుందని ఆమె ఇచ్చిన భరోసా కాంగ్రెస్ శ్రేణుల్లో సరికొత్త నమ్మకాన్ని నింపింది. ఆమె పిలుపునకు స్పందించిన క్యాడర్ అంతా ఒక్కసారిగా అలర్ట్ అయి, తక్షణమే బూత్ స్థాయికి వెళ్లి పనిచేసేందుకు సమాయత్తమవుతున్నారు.
బూత్ లెవెల్ అధికారులతో సమన్వయం చేసుకోవాలి
ఈ సందర్భంగా హనుమాండ్ల ఝాన్సీ రెడ్డి మాట్లాడుతూ.. ఓటర్ల సవరణ ప్రక్రియను ఏమాత్రం తేలికగా తీసుకోకుండా అత్యంత ప్రతిష్టాత్మకంగా భావించాలని కార్యకర్తలకు సూచించారు. కాంగ్రెస్ పార్టీ బూత్ స్థాయి ఏజెంట్లు స్థానికంగా ఉండే ప్రభుత్వ బూత్ లెవెల్ అధికారులతో పూర్తి స్థాయిలో సమన్వయం చేసుకుంటూ.. అర్హులైన ప్రతి ఒక్కరి పేర్లు ఓటర్ల జాబితాలో ఉండేలా జాగ్రత్తలు తీసుకోవాలన్నారు. ప్రజాస్వామ్యంలో ఓటు హక్కు అత్యంత శక్తివంతమైన ఆయుధమని, దాన్ని ప్రతి ఒక్కరూ పొందేలా చూడాల్సిన బాధ్యత మనపై ఉందన్నారు. ముఖ్యంగా 18 ఏళ్లు నిండిన ప్రతి యువతీ యువకుడు ఓటరుగా నమోదయ్యేలా ప్రత్యేక చొరవ చూపాలని ఝాన్సీ రెడ్డి స్పష్టం చేశారు. ప్రతి కార్యకర్త తమకు కేటాయించిన పోలింగ్ బూత్ పరిధిలోని ప్రతీ ఇంటిని వ్యక్తిగతంగా సందర్శించాలని, ఓటర్ల వివరాలను క్షుణ్ణంగా సరిచూసుకుంటూ నిరంతరం స్థానిక ప్రజలకు అందుబాటులో ఉండాలని ఆదేశించారు. అనర్హుల ఓట్లను తొలగించడం, కొత్త ఓట్ల నమోదు, తప్పుల సవరణ వంటి అంశాలపై నిరంతరం నిఘా ఉంచాలన్నారు. ఈ ముఖ్యమైన సమీక్షా సమావేశంలో రాయపర్తి మండల కాంగ్రెస్ పార్టీ ముఖ్య నాయకులు, వివిధ గ్రామాల సర్పంచులు, వార్డు సభ్యులు, మాజీ సర్పంచులు, అనుబంధ సంఘాల ప్రతినిధులు మరియు పెద్ద సంఖ్యలో కార్యకర్తలు పాల్గొన్నారు.
