చెరిగిపోని ఉద్యమ ముద్ర… పెద్ది
కాకతీయ, తెలంగాణ బ్యూరో : తెలంగాణ ఉద్యమ చరిత్రలో కొన్ని పేర్లు కాలగర్భంలో కలిసిపోవు. పోరాటం గురించి మాట్లాడినప్పుడల్లా, ఉద్యమ జెండా రెపరెపలాడినప్పుడల్లా గుర్తుకొచ్చే నాయకుల్లో పెద్ది సుదర్శన్ రెడ్డి ఒకరు. ఉమ్మడి వరంగల్ జిల్లాలో ఉద్యమం ఉవ్వెత్తున ఎగిసిపడిన రోజుల్లో ఆయన పేరు ఒక వ్యక్తిని మాత్రమే సూచించేది కాదు… ఉద్యమానికే ప్రతీకగా మారింది. రాస్తారోకో అయినా, బంద్ అయినా, దీక్ష అయినా, జైలు భరో కార్యక్రమం అయినా… ముందుండేది పెద్ది. ఉద్యమం ఎక్కడ ఉంటే అక్కడ ఆయన కనిపించేవారు. అందుకే ఉద్యమ సహచరులు ప్రేమగా “ఉద్యమంలో సకలం అతనే” అని చెప్పుకునేవారు.
కేసీఆర్‌కు నమ్మకమైన ఉద్యమ సహచరుడు
పార్టీ ఆవిర్భావం నుంచి తెలంగాణ రాష్ట్రం ఏర్పడే వరకు కేసీఆర్ వెంట నీడలా నడిచిన నాయకుల్లో పెద్ది సుదర్శన్ రెడ్డి ఒకరు. ఉమ్మడి వరంగల్ జిల్లా టీఆర్ఎస్ అధ్యక్షుడిగా దాదాపు 8 సంవత్సరాలు బాధ్యతలు నిర్వహించడం ఆయనపై పార్టీ అధినేతకు ఉన్న విశ్వాసానికి నిదర్శనం. ఉద్యమ వ్యూహాల అమలు నుంచి గ్రామస్థాయి పార్టీ నిర్మాణం వరకు కేసీఆర్ అప్పగించిన ప్రతి బాధ్యతను నిబద్ధతతో నిర్వర్తించారు. ఉద్యమంలో వరంగల్ జిల్లాకు సంబంధించిన ప్రతి కీలక పరిణామంలో పెద్ది పాత్ర ఉండేదని పార్టీ నాయకులు గుర్తుచేసుకుంటున్నారు.
ఉద్యమకారులకు పెద్ద దిక్కు
తెలంగాణ ఉద్యమం కేవలం సభలు, సమావేశాలతో ముందుకు సాగలేదు. వేలాది మంది కార్యకర్తల త్యాగాలు, అంకితభావంతో బలపడింది. ఆ కార్యకర్తలకు ధైర్యం చెప్పే పెద్దన్నగా పెద్ది సుదర్శన్ రెడ్డి నిలిచారు. ఎక్కడ ఉద్యమకారులపై కేసులు నమోదైనా, ఎక్కడ అరెస్టులు జరిగినా, ఎక్కడ నిరసనలు జరిగినా ముందుగా చేరేది ఆయనే. ఉద్యమంలో ఇబ్బందులు ఎదుర్కొంటున్న కార్యకర్తలకు అండగా నిలిచి, వారిలో ధైర్యం నింపిన నాయకుడిగా ఆయనకు ప్రత్యేక గుర్తింపు లభించింది.
కనకనలాడిన ఉద్యమ జ్వాల
తెలంగాణ ఉద్యమం ఉద్ధృతంగా సాగిన ప్రతి దశలో పెద్ది సుదర్శన్ రెడ్డి ఉత్సాహం ఏమాత్రం తగ్గలేదు. పోలీసులు కేసులు పెట్టినా, నాన్-బెయిలబుల్ కేసులతో వేధించినా, జైలు నిర్బంధాలు ఎదురైనా వెనక్కి తగ్గలేదు. ఉద్యమమే తన శ్వాసగా, తెలంగాణే తన లక్ష్యంగా భావించి చివరి వరకు పోరాట పంథాను వీడలేదు. అందుకే ఉద్యమ కాలమంతా కనకనలాడిన జ్వాలగా పెద్ది పేరు తెలంగాణ చరిత్రలో చెరిగిపోని ముద్రగా నిలిచిపోయింది.
