పీవో సార్ అక్రమ వసూళ్లపై చర్యలేవీ
అక్రమాలు బయటపడ్డా అధికారి మౌనం ఎందుకు?
కోరేకల్‌ ఇసుక కాంట్రాక్ట‌ర్‌పై విచారణ చేప‌ట్ట‌రెందుకు..?
వీడియోలు బయటపడినా బాధ్యులపై చర్యలేవీ?
మూడు రోజులుగా ఆరా పేరిట అధికారి తాత్సారం
కాంట్రాక్టర్లకు అండగా నిలుస్తున్నారా?
కాకతీయ, తెలంగాణ బ్యూరో: కోరేకల్‌ ఇసుక స్టాక్‌యార్డులో అక్రమ వసూళ్ల ఆరోపణలు వెలుగులోకి వచ్చి మూడు రోజులు దాటినా.. సంబంధిత కరీంనగర్ టీజీఎండీసీ పీవో నుంచి మాత్రం చర్యల జాడ కనిపించడంలేదు. ఒక్కో లారీ నుంచి రూ.3,500 వరకు అదనంగా వసూలు చేస్తున్నారనే ఆరోపణలకు సంబంధించిన వీడియోలు మూడు రోజుల క్రితం బయటపడ్డాయి. వ్యవహారం బహిర్గతమైన వెంటనే విచారణకు ఆదేశించి.. బాధ్యులను గుర్తించి.. అవసరమైతే సంబంధిత సిబ్బందిపై చర్యలు తీసుకోవాల్సిన పీవో.. ‘విచారణ చేస్తున్నాం’ అంటూ సరిపెట్టడంపై అనుమానాలు వ్యక్తమవుతున్నాయి. అక్రమ వసూళ్లపై వీడియో ఆధారాలు బయటకొచ్చినప్పుడు కూడా చర్యలు తీసుకోకపోతే.. పర్యవేక్షణాధికారి బాధ్యత ఏమిటన్న ప్రశ్న తలెత్తుతోంది. అక్రమాలు బయటపడినా పీవో ఎందుకు స్పందించడం లేదు? కాంట్రాక్టర్లను ఎందుకు ప్రశ్నించడం లేదు? బాధ్యులను ఎందుకు పక్కకు తప్పించడం లేదు? అన్న ప్రశ్నలు ఇప్పుడు వినిపిస్తున్నాయి.
కోరేకల్‌ క్వారీపై ఆరోపణలు వస్తే.. పీవో ఏం చేస్తున్నారు?
కరీంనగర్ జిల్లా వీణవంక మండలం కోరేకల్‌ ఇసుక స్టాక్‌యార్డులో లారీదారుల నుంచి అదనపు డబ్బులు వసూలు చేస్తున్నారనే ఆరోపణలు వెలుగులోకి వచ్చాయి. ఒక్కో లారీకి రూ.3,500 వరకు అదనంగా తీసుకుంటున్నట్లు వీడియోల్లో కనిపిస్తున్న దృశ్యాలు బయటకు రావడంతో వ్యవహారం తీవ్ర చర్చకు దారితీసింది. ఇది సాధారణ ఆరోపణ కాదు. ప్రభుత్వ ఇసుక విక్రయ కేంద్రంలో వినియోగదారుడి నుంచి అధికారిక చార్జీలకు మించి డబ్బులు వసూలు చేస్తున్నారనే ఆరోపణ. ఇలాంటి ఆరోపణ బయటపడిన వెంటనే సంబంధిత అధికారి అప్రమత్తం కావాలి. కానీ మూడు రోజులుగా పెద్దగా కదలిక కనిపించకపోవడమే ఇప్పుడు పలు ప్రశ్నలకు కారణమవుతోంది. అక్రమ వసూళ్లకు సంబంధించిన వీడియోలు బయటకు వచ్చిన తర్వాత పీవో చేయాల్సిన మొదటి పని వాటి వాస్తవికతను నిర్ధారించడం. వీడియోలో కనిపిస్తున్న వ్యక్తులు ఎవరు? స్టాక్‌యార్డులో వారి బాధ్యత ఏమిటి? ఎవరెవరికి డబ్బులు ఇచ్చారు? ఎంత మొత్తంలో తీసుకున్నారు? అన్నదానిపై ప్రాథమిక విచారణ జరపవచ్చు. అవసరమైతే సంబంధిత లారీ డ్రైవర్లు, యజమానుల వాంగ్మూలాలు తీసుకోవచ్చు. స్టాక్‌యార్డులోని సీసీ కెమెరా ఫుటేజీని భద్రపరచవచ్చు. కానీ మూడు రోజులు గడిచినా ఈ చర్యల్లో ఏవి చేపట్టారో స్పష్టత లేదు. పీవో విచారణ చేస్తున్నారంటే.. ఎవరిని విచారించారు? ఏం తేలింది? అన్నది చెప్పాల్సిన అవసరం ఉంది. లేదంటే ‘విచారణ’ అన్న పదం కేవలం కాలయాపనకే పరిమితమైందన్న అనుమానాలకు తావివ్వదా?
రూ.3,500 అదనపు వసూళ్ల వెనుక ఎవరున్నారు?
అదనపు వసూళ్ల ఆరోపణల్లో అసలు తేలాల్సింది కేవలం డబ్బులు ఎవరు తీసుకున్నారన్నది మాత్రమే కాదు. ఆ డబ్బులు ఎవరి సూచనలతో వసూలయ్యాయి? ఈ వ్యవహారం వ్యక్తిగతంగా జరుగుతోందా? లేక వ్యవస్థీకృతంగా సాగుతోందా? అన్నది కూడా బయటపడాలి. ఒక్కో లారీ నుంచి రూ.3,500 వరకు తీసుకుంటున్నారనే ఆరోపణలు నిజమైతే.. రోజుకు ఎన్ని లారీలు వస్తున్నాయి? ఎన్ని లారీల నుంచి అదనపు వసూళ్లు జరిగాయి? మొత్తం ఎంత డబ్బు వసూలైంది? అన్న లెక్క తేల్చడం అధికారులకు పెద్ద కష్టమేమీ కాదు. ఇలాంటి వ్యవహారం కొనసాగుతున్నప్పుడు స్టాక్‌యార్డు పర్యవేక్షణలో ఉన్న అధికారులకు తెలియకుండా ఎలా జరుగుతోంది? తెలిసి ఉంటే ఎందుకు ఆపలేదు? తెలియకపోతే పర్యవేక్షణ వ్యవస్థ ఎంత బలహీనంగా ఉందన్నది తేలాలి.
కాంట్రాక్టర్లను ఎందుకు ప్రశ్నించడం లేదు?
అక్రమ వసూళ్ల ఆరోపణలు బయటపడిన వెంటనే సంబంధిత కాంట్రాక్టర్‌, నిర్వాహకులు, సిబ్బంది పాత్రపై విచారణ జరగాలి. కానీ ఇంతవరకు కాంట్రాక్టర్లపై ఎలాంటి చర్యలు తీసుకున్నారన్నది స్పష్టంగా లేదు. కనీసం వివరణ కోరారా? స్టాక్‌యార్డులో ఆకస్మిక తనిఖీ చేశారా? రికార్డులను పరిశీలించారా? అదనపు వసూళ్ల ఆరోపణలపై లారీ యజమానులు లేదా డ్రైవర్ల నుంచి ఫిర్యాదులు తీసుకున్నారా? అన్నది బయటకు రావాల్సి ఉంది. పీవో పర్యవేక్షణలోనే స్టాక్‌యార్డు నడుస్తున్నప్పుడు.. అక్కడి వ్యవహారాలకు బాధ్యత ఎవరిది? అక్రమ వసూళ్లు జరిగితే కింది స్థాయి సిబ్బందిపై చర్యలు తీసుకోవడం ఒక్కటే సరిపోతుందా? పర్యవేక్షణలో వైఫల్యం ఉంటే దానికి బాధ్యత వహించాల్సింది ఎవరు? అన్న ప్రశ్నలు కూడా తలెత్తుతున్నాయి.
మౌనం కొనసాగితే అనుమానాలు మరింత బలపడవా?
అక్రమ వసూళ్ల ఆరోపణలు బయటపడ్డాయి. వీడియోలు వెలుగులోకి వచ్చాయి. బాధితులను గుర్తించే అవకాశం ఉంది. సీసీ కెమెరాలు, లారీ ఎంట్రీలు, వెయిమెంట్‌ వివరాలు, విక్రయ రికార్డులు వంటి ఆధారాలు ఉన్నాయి. అయినా మూడు రోజులుగా చర్యలు కనిపించకపోవడం వల్ల పీవో తీరుపై అనుమానాలు పెరుగుతున్నాయి. అక్రమ వసూళ్లు జరగలేదంటే వెంటనే విచారణ జరిపి ఆ విషయాన్ని స్పష్టం చేయాలి. జరిగితే బాధ్యులపై చర్యలు తీసుకోవాలి. ఈ రెండింటిలో ఏదో ఒకటి జరగాల్సిందే. ‘విచారణ చేస్తున్నాం’ అంటూ రోజులు గడపడం మాత్రం సమాధానం కాదు. కోరేకల్‌ ఇసుక స్టాక్‌యార్డులో అదనపు వసూళ్ల ఆరోపణలపై పీవో ఇప్పటికైనా స్పష్టమైన చర్యలు తీసుకుంటారా? లేక కాంట్రాక్టర్లపై వస్తున్న ఆరోపణలను పట్టించుకోకుండా మౌనం వహిస్తారా? అన్నదే ఇప్పుడు ప్రధాన ప్రశ్నగా మారింది.
