సింగరేణి సంక్షోభానికి కాంగ్రెస్‌దే బాధ్యత

సింగరేణి సంక్షోభానికి కాంగ్రెస్‌దే బాధ్యత
కరెంటు కోతలపై సింగరేణి భవన్‌ వద్ద బీఆర్‌ఎస్‌ ధర్నా
థర్మల్‌ ప్లాంట్లకు బొగ్గు సరఫరా తగ్గిపోయింది
సింగరేణికి రాష్ట్ర ప్రభుత్వం భారీగా బకాయిలు
కేసీఆర్‌ పాలనలో 24 గంటల కరెంటు.. ఇప్పుడు కోతలే
మాజీ మంత్రి కొప్పుల ఈశ్వర్‌

కాక‌తీయ‌, హైదరాబాద్ : కాంగ్రెస్‌ ప్రభుత్వం చేస్తున్న కరెంటు కుట్రలను ప్రజల ముందు బయటపెడతామని మాజీ మంత్రి, టీజీబీకేఎస్‌ గౌరవ అధ్యక్షుడు కొప్పుల ఈశ్వర్‌ అన్నారు. తెలంగాణలో తీవ్ర విద్యుత్‌ కోతలతో ప్రజలు ఇబ్బందులు పడుతున్నారని, పరిశ్రమలకు పవర్‌ హాలిడే ప్రకటించారని విమర్శించారు. రాబోయే యాసంగి, వేసవి పంటలకు కూడా పూర్తిస్థాయిలో విద్యుత్‌ కోతలు విధించే యోచనలో ప్రభుత్వం ఉందని ఆరోపించారు. థర్మల్‌ విద్యుత్‌ ప్లాంట్లకు సింగరేణి నుంచి సరిపడా బొగ్గు సరఫరా కాకపోవడంతో విద్యుత్‌ ఉత్పత్తి పడిపోయిందని కొప్పుల ఈశ్వర్‌ అన్నారు. సింగరేణికి రాష్ట్ర ప్రభుత్వం రూ.52,000 కోట్ల నుంచి రూ.60,000 కోట్ల వరకు బకాయిలు చెల్లించాల్సి ఉందని తెలిపారు. బొగ్గు ఉత్పత్తి తగ్గడం కాంగ్రెస్‌ ప్రభుత్వ వైఫల్యమేనని విమర్శించారు. సింగరేణి అధికారిక గణాంకాల ప్రకారం 2023–24లో 70.02 మిలియన్‌ టన్నులు, 2024–25లో 69.01 మిలియన్‌ టన్నులు, 2025–26లో 58 మిలియన్‌ టన్నుల ఉత్పత్తి నమోదైంది.

24 గంటల విద్యుత్‌ ఎక్కడ?
కేసీఆర్‌ పాలనలో 24 గంటల ఉచిత విద్యుత్‌ అందించామని, ఇప్పుడు కనీసం 6 గంటలు కూడా కరెంటు రాని పరిస్థితి ఏర్పడిందని కొప్పుల ఈశ్వర్‌ అన్నారు. విద్యుత్‌ రంగంలో నెలకొన్న సంక్షోభాన్ని ప్రజలకు వివరించేందుకే పవర్‌ స్టేషన్లు, సింగరేణి భవన్‌ వద్ద నిరసనలు చేపట్టామని తెలిపారు. ఎంపీకి వినతిపత్రం అందించి విద్యుత్‌ కోతలపై ప్రశ్నించినా అధికారులు సరైన సమాధానం ఇవ్వలేకపోయారని ఆగ్రహం వ్యక్తం చేశారు. కొప్పుల ఈశ్వర్‌ అధ్యక్షతన సింగరేణి హెడ్‌ఆఫీస్‌ వద్ద జరిగిన ధర్నాలో మాజీ మంత్రి జీవన్‌ రెడ్డి, కుత్బుల్లాపూర్‌ ఎమ్మెల్యే కేపీ వివేకానంద, ఎమ్మెల్సీలు దాసోజు శ్రవణ్‌, శంభీపూర్‌ రాజు, మాజీ ఎమ్మెల్యే దివాకర్‌ రావు, టీజీబీకేఎస్‌ అధ్యక్షుడు మిర్యాల రాజిరెడ్డి తదితరులు పాల్గొన్నారు.