బీఆర్ఎస్ పాలనలో విద్యుత్ రంగానికి స్వర్ణయుగం
విద్యుత్ ఉత్పత్తి సామర్థ్యం 7,778 నుంచి 18,567 మెగావాట్లకు
ట్రాన్స్మిషన్, డిస్ట్రిబ్యూషన్ వ్యవస్థను భారీగా విస్తరించాం
గరిష్ఠ డిమాండ్ 6,666 నుంచి 15,497 మెగావాట్లకు పెరిగింది
కాంగ్రెస్ పాలనలో థర్మల్ ప్లాంట్లకు బొగ్గు సరఫరా నిలిపివేత
రైతులకు కనీసం 7 గంటల కరెంట్ కూడా ఇవ్వడం లేదు
ఎత్తిపోతల మోటార్లను నిలిపివేసిన కాంగ్రెస్ ప్రభుత్వం
మాజీ వ్యవసాయశాఖ మంత్రి సింగిరెడ్డి నిరంజన్రెడ్డి
కాకతీయ, హైదరాబాద్ : బీఆర్ఎస్ పాలనలో తెలంగాణ విద్యుత్ రంగానికి స్వర్ణయుగం వచ్చిందని, పటిష్టమైన ప్రణాళికతో విద్యుత్ ఉత్పత్తి, ట్రాన్స్మిషన్, డిస్ట్రిబ్యూషన్ వ్యవస్థలను విస్తరించి రాష్ట్ర ఆర్థిక వ్యవస్థ, వ్యవసాయం, పరిశ్రమలు, గృహ వినియోగదారులకు మెరుగైన విద్యుత్ సరఫరా అందించామని మాజీ వ్యవసాయశాఖ మంత్రి సింగిరెడ్డి నిరంజన్రెడ్డి అన్నారు. పదేళ్లలో నిర్మించిన విద్యుత్ వ్యవస్థను కాంగ్రెస్ ప్రభుత్వం మూడేళ్లలో విధ్వంసం చేస్తోందని విమర్శించారు. 2014 జూన్ 2న తెలంగాణ ఏర్పడినప్పుడు రాష్ట్ర విద్యుత్ ఉత్పత్తి సామర్థ్యం 7,778 మెగావాట్లు ఉండగా, 2023 నాటికి 18,567 మెగావాట్లకు పెంచామని నిరంజన్రెడ్డి తెలిపారు. థర్మల్ విద్యుత్ సామర్థ్యాన్ని 4,426 నుంచి 9,582 మెగావాట్లకు, జల విద్యుత్ను 2,158 నుంచి 2,518 మెగావాట్లకు, సౌర విద్యుత్ను 74 నుంచి 5,347 మెగావాట్లకు పెంచామని పేర్కొన్నారు. గరిష్ఠ డిమాండ్ 6,666 నుంచి 15,497 మెగావాట్లకు, గరిష్ఠ దినసరి వినియోగం 124 నుంచి 298 మిలియన్ యూనిట్లకు పెరిగిందన్నారు. తలసరి విద్యుత్ వినియోగం 1,196 నుంచి 2,140 యూనిట్లకు చేరిందని తెలిపారు. తెలంగాణ విద్యుత్ రంగానికి సంబంధించిన అధికారిక నియంత్రణ సంస్థ గణాంకాల్లోనూ 2022–23 నాటికి గరిష్ఠ డిమాండ్ 15,497 మెగావాట్లుగా నమోదైంది.
ట్రాన్స్మిషన్, డిస్ట్రిబ్యూషన్ విస్తరణ
విద్యుత్ ట్రాన్స్మిషన్ వ్యవస్థను కూడా భారీగా విస్తరించామని నిరంజన్రెడ్డి అన్నారు. 400 కేవీ సబ్స్టేషన్లను 6 నుంచి 30కు, 220 కేవీ సబ్స్టేషన్లను 51 నుంచి 103కు, 132 కేవీ సబ్స్టేషన్లను 176 నుంచి 251కు పెంచామని తెలిపారు. ఈహెచ్టీ సబ్స్టేషన్లు 233 నుంచి 384కు, ఈహెచ్టీ లైన్ల పొడవు 16,378 కిలోమీటర్ల నుంచి 28,131 కిలోమీటర్లకు, ట్రాన్స్ఫర్మేషన్ సామర్థ్యం 14,973 ఎంవీఏ నుంచి 38,941 ఎంవీఏకు పెంచామని చెప్పారు. 33 కేవీ సబ్స్టేషన్లు, పవర్ ట్రాన్స్ఫార్మర్లు, డిస్ట్రిబ్యూషన్ ట్రాన్స్ఫార్మర్ల సంఖ్యను కూడా గణనీయంగా పెంచామని తెలిపారు. అయితే అధికారిక తెలంగాణ విద్యుత్ నియంత్రణ సంస్థ గణాంకాల్లో 2023 మార్చి నాటికి 400 కేవీ సబ్స్టేషన్లు 25, 220 కేవీ సబ్స్టేషన్లు 101, 132 కేవీ సబ్స్టేషన్లు 250గా నమోదయ్యాయి.
కాంగ్రెస్ పాలనపై విమర్శలు
కాంగ్రెస్ ప్రభుత్వం అధికారంలోకి వచ్చిన తర్వాత థర్మల్ విద్యుత్ కేంద్రాలకు అవసరమైన బొగ్గు సరఫరా చేయకుండా వాటిని ప్రైవేట్ సంస్థలకు ధారాదత్తం చేసే కుట్ర చేస్తోందని నిరంజన్రెడ్డి విమర్శించారు. బీఆర్ఎస్ పాలనలో పటిష్టమైన ప్రణాళికతో ఏర్పాటు చేసిన విద్యుత్ వ్యవస్థను మూడేళ్లలోనే దెబ్బతీస్తున్నారని ఆరోపించారు. కనీసం రైతులకు 7 గంటల కరెంట్ కూడా ఇవ్వకుండా ఇబ్బందులకు గురిచేస్తున్నారని అన్నారు. కరెంట్ బిల్లులు చెల్లించాల్సి వస్తుందనే ఉద్దేశంతో ఎత్తిపోతల పథకాల మోటార్లను నిలిపివేశారని విమర్శించారు.
రాష్ట్రంలో విద్యుత్ సరఫరా వ్యవస్థను బలోపేతం చేసి వ్యవసాయం, పరిశ్రమలు, గృహ అవసరాలకు నిరంతర విద్యుత్ అందించేలా బీఆర్ఎస్ ప్రభుత్వం చర్యలు చేపట్టిందని నిరంజన్రెడ్డి తెలిపారు. ప్రస్తుతం రైతులు, పరిశ్రమలు ఎదుర్కొంటున్న విద్యుత్ సమస్యలకు కాంగ్రెస్ ప్రభుత్వమే బాధ్యత వహించాలని డిమాండ్ చేశారు. విద్యుత్ రంగంపై ప్రభుత్వం వాస్తవ పరిస్థితులను ప్రజలకు వెల్లడించాలని కోరారు.
