కాకతీయ ఎఫెక్ట్
లక్ష్మీపురం మార్కెట్ లో కదిలిన యంత్రాంగం
రోడ్డు ఆక్రమించిన 14 మంది అక్రమార్కులకు నోటీసులు
తడకల షెడ్లు తొలగించకుంటే సీజ్ కు హెచ్చరిక
కాకతీయ, వరంగల్ ప్రతినిధి: కాకతీయ దినపత్రిక కథనాలతో లక్ష్మీపురం కూరగాయల మార్కెట్ లో అధికార యంత్రాంగం కదిలింది. రహదారిని ఆక్రమించి అక్రమంగా తడకల షెడ్లు వేసుకున్న 14 మంది వ్యాపారులను అధికారులు గుర్తించి గురువారం నోటీసులు జారీ చేశారు. ఎన్నో ఏళ్లుగా మోడల్ కూరగాయల మార్కెట్ ముందు రోడ్డుపై ఇరువైపులా అక్రమంగా తడకల షెడ్లు వేసి, రోడ్లనే గోదాములుగా, రోడ్లనే దుకాణాలుగా మార్చి ఒకవైపు మార్కెట్ ఆదాయానికి గండి కొడుతున్నారు. మరోవైపు ట్రాఫిక్ జామ్ తో కూరగాయలు కొనడానికి వచ్చే మహిళలు, వృద్ధులు, వాహనదారులు నిత్యం ఇక్కట్లు పడుతున్నారు. ఈ విషయాన్ని గమనించిన కాకతీయ దినపత్రిక “మోడల్ మార్కెట్ లో అక్రమాల జాతర” అంటూ కథనాన్ని ప్రచురించింది. దీంతో మార్కెట్ పాలకవర్గం సీరియస్ గా తీసుకుని తడకలు తీసివేయాలని అధికారులకు హుకుం జారీ చేసింది. అధికారులు అక్రమార్కులకు రోడ్లపై వేసుకున్న తడకల షెడ్లను తొలగించాలని తెలిపారు. ఈ విషయంపై అక్రమార్కులు పాలకవర్గాన్ని, మార్కెట్ కార్యదర్శిని కలిసి వినాయక చవితి పండగ తర్వాత తొలగిస్తామని చెప్పి, తొలగించకుండా యథావిధిగా కొనసాగిస్తుండగా, “మోడల్ మార్కెట్ లో మాట తప్పిన అక్రమార్కులు” శీర్షికన కాకతీయ దినపత్రికలో మరో కథనం ప్రచురితమైంది. దీంతో స్పందించిన వ్యవసాయ మార్కెట్ కమిటీ ఉన్నత శ్రేణి కార్యదర్శి శ్రీనివాస్ మంగళవారం సర్కులర్ జారీ చేశారు.
సర్కులర్ లోని హెచ్చరిక ఇదే..
లక్ష్మీపురం మార్కెట్లో హోల్ సేల్ వ్యాపారం కోసం 99 షాపులు, రిటైల్ వ్యాపారుల పోషణ కోసం 8×8, 6×6, 4×4 అడుగుల ప్లాట్లు కేటాయించినప్పటికీ, కొందరు కమిషన్ ఏజెంట్లు (అడ్తీ) మరియు రిటైల్ వ్యాపారులు నిబంధనలకు విరుద్ధంగా మార్కెట్ వెలుపల రహదారికి ఇరువైపులా ఎటువంటి అనుమతి లేకుండా తడకల షెడ్లు వేసుకుని వ్యాపారం చేస్తున్నారు. వాటి ముందు టమాటా వాహనాల పార్కింగ్ తో వినియోగదారులు, ఇతర వ్యాపారులు, ప్రజల రాకపోకలకు తీవ్ర ఇబ్బందులు కలుగుతున్నాయి. ఇది మార్కెట్ చట్టం, లైసెన్సు నిబంధనల ఉల్లంఘన. కావున అనధికారిక తడకల షెడ్లను వెంటనే తొలగించాలి. లేనిపక్షంలో సంబంధిత షాపు/ప్లాట్ ను మార్కెట్ కమిటీ స్వాధీనం చేసుకుని, నిబంధనల ప్రకారం చర్యలు తీసుకుంటామని హెచ్చరించారు.
ఇంతవరకు నోటీసుల వరకు బాగానే ఉంది. కానీ కేవలం నోటీసులకే పరిమితం కాకుండా, రోడ్డుకు ఇరువైపులా ఉన్న తడకల షెడ్లను తొలగించి చూపిస్తేనే వాహనదారులకు, ప్రజలకు ఇబ్బందులు తొలగుతాయని ప్రజలు కోరుతున్నారు.
