చేర్యాల మహిళలకు ఎంపీ చామల అండ

చేర్యాల మహిళలకు ఎంపీ చామల అండ
చేర్యాల‌ ప్రాంత అభివృద్దే కాంగ్రెస్ లక్ష్యం
కుట్టుమిషన్లు, కల్యాణలక్ష్మి–షాదీ ముబారక్‌ చెక్కుల పంపిణీలో ఎంపీ చామల
చేర్యాల అభివృద్ధికి ఎంపీ నిధులు కేటాయించాలి : ఎమ్మెల్యే పల్లా

కాకతీయ,చేర్యాల : మహిళలు స్వయం ఉపాధి పొందుతూ ఆర్థికంగా ఎదగాలన్న లక్ష్యంతో కాంగ్రెస్ ప్రభుత్వం అందిస్తున్న సంక్షేమ పథకాలను అర్హులైన ప్రతి ఒక్కరికీ చేరేలా కృషి చేస్తామని భువనగిరి ఎంపీ చామల కిరణ్ కుమార్ రెడ్డి అన్నారు. చేర్యాల పట్టణంలోని రేణుక గార్డెన్‌లో గురువారం చేర్యాల పట్టణంతో పాటు చేర్యాల, కొమురవెల్లి, మద్దూర్‌, దూల్మిట్ట మండలాలకు చెందిన మైనారిటీ మహిళా లబ్ధిదారులకు 56 కుట్టు మిషన్లు,252 కల్యాణలక్ష్మి, షాదీ ముబారక్‌ చెక్కుల పంపిణీ కార్యక్రమం నిర్వహించారు.అలానే చేర్యాల పట్టణంలోని షాదిఖానా ఫంక్షన్ హాల్ డైనింగ్ హాల్ నిర్మాణం కోసం ఎంపీ నిధులనుంచి రూ,10 లక్షల నిధులు మంజూరు చేయగా ఈ కార్యక్రమానికి ముఖ్యఅతిథిగా హాజరైన ఎంపీ చామల కిరణ్ కుమార్ రెడ్డి, ఎమ్మెల్యే పల్లా రాజేశ్వర్ రెడ్డి లబ్ధిదారులకు స్వయంగా చెక్కులు, మహిళలకు కుట్టు మిషన్లు అందజేసీ షాదిఖానా డైనింగ్ హాల్ అభివృద్ధి పనులకు శ్రీకారం చుట్టారు. ఈ సందర్భంగా ఎంపీ మాట్లాడుతూ..మహిళలు ఇతరులపై ఆధారపడకుండా స్వయం ఉపాధి ద్వారా ఆర్థికంగా బలోపేతం కావాలన్నదే ప్రభుత్వ లక్ష్యమని తెలిపారు. కుట్టు మిషన్లను సద్వినియోగం చేసుకుని ఉపాధి అవకాశాలను పెంచుకోవాలని మహిళలకు సూచించారు. చేర్యాల ప్రాంత అభివృద్ధి, ప్రజా సంక్షేమానికి తన వంతు కృషి కొనసాగుతుందని, ప్రాంత అభివృద్ధికి కాంగ్రెస్ పార్టీ రుణపడి ఉంటుందని ఎంపీ చామల కిరణ్ కుమార్ రెడ్డి స్పష్టం చేశారు. ప్రజల అవసరాలను గుర్తించి ప్రభుత్వ పథకాలు, అభివృద్ధి కార్యక్రమాలు మరింత విస్తృతంగా అందేలా కృషి చేస్తానని తెలిపారు.

చేర్యాల అభివృద్ధికి ఎంపీ నిధులు కేటాయించాలి: ఎమ్మెల్యే పల్లా

చేర్యాల ప్రాంత అభివృద్ధికి భువనగిరి ఎంపీ చామల కిరణ్‌కుమార్‌రెడ్డి ఎంపీ నిధులు కేటాయించాలని జనగామ ఎమ్మెల్యే పల్లా రాజేశ్వర్‌రెడ్డి కోరారు. 53 గ్రామాల అభివృద్ధికి పార్టీలకు అతీతంగా ఒక్కో గ్రామానికి రూ.5 లక్షల చొప్పున నిధులు కేటాయించాలని విజ్ఞప్తి చేశారు. అర్హులైన ప్రతి లబ్ధిదారుడికి సంక్షేమ పథకాల ప్రయోజనాలు ఎలాంటి జాప్యం లేకుండా అందించాలని అధికారులను సూచించారు. కల్యాణలక్ష్మి చెక్కుల విషయంలో ఆలస్యం లేకుండా చర్యలు తీసుకుంటున్నామని తెలిపారు.చేర్యాల, తపాస్‌పల్లి, బచ్చన్నపేట, నాగపురి ప్రాంతాల్లోని చెరువులు పూర్తిగా నిండే వరకు నీటిని విడుదల చేయాలని, ఈ విషయంపై అధికారులతో మాట్లాడి చర్యలు తీసుకోవాలని ఎంపీని కోరారు. మహిళలకు ప్రభుత్వ పథకాల ద్వారా స్వయం ఉపాధి అవకాశాలు కల్పించేందుకు కృషి చేయాలని సూచించారు. ఈ కార్యక్రమంలో ప్రజాప్రతినిధులు, అధికారులు, కాంగ్రెస్, బిఆర్ఎస్ నాయకులు, లబ్ధిదారులతో పాటు తదితరులు పాల్గొన్నారు.