అక్రమ స్కానింగ్ కేంద్రాలపై దాడులు
రెండు పోర్టబుల్ మిషన్లు సీజ్
అనుమతి లేకుండా లింగ నిర్ధారణ పరీక్షలు – 8 మందిపై కేసులు, పలువురు అదుపులోకి
కాకతీయ, వరంగల్ ప్రతినిధి : వరంగల్ జిల్లాలో అనుమతి లేకుండా నిర్వహిస్తున్న అక్రమ స్కానింగ్ కేంద్రాలపై వైద్య ఆరోగ్య శాఖ అధికారులు కొరడా ఝళిపించారు. జిల్లా వైద్య మరియు ఆరోగ్య శాఖ అధికారి డాక్టర్ బి రాజా రెడ్డి ఆదేశాల మేరకు నెక్కొండ, కాశీబుగ్గ ప్రాంతాల్లో ఆకస్మిక తనిఖీలు నిర్వహించి రెండు పోర్టబుల్ స్కానింగ్ మిషన్లను సీజ్ చేశారు.
నెక్కొండలో ఉపేందర్ ఆసుపత్రిలో దాడి
నెక్కొండలోని ఉపేందర్ ఆసుపత్రిలో అక్రమ స్కానింగ్ కేంద్రం నడుస్తున్నదన్న సమాచారంతో ప్రోగ్రాం అధికారి డాక్టర్ సాజిదా బృందం పోలీస్, రెవెన్యూ అధికారులతో కలిసి తనిఖీ చేశారు.
రిజిస్ట్రేషన్ లేకుండా, అర్హతలు లేని డాక్టర్ పార్థు (బిఏఎంఎస్, ఎండి – ఆయుష్ ) స్కానింగ్ చేస్తూ, లింగ నిర్ధారణ పరీక్షలు చేస్తున్నట్లు గుర్తించారు. మిషన్ ను సీజ్ చేసి స్థానిక పోలీస్ స్టేషన్ లో కేసు నమోదు చేశారు. మిషన్ ను అద్దెకు ఇస్తున్న గణేష్, కేసులను తీసుకువస్తున్న పద్మ ను అదుపులోకి తీసుకుని, వారి వద్ద నుండి మొబైల్ ఫోన్లు, ద్విచక్ర వాహనాన్ని స్వాధీనం చేసుకున్నారు.
కాశీబుగ్గలో ఇంట్లోనే అక్రమ స్కానింగ్
కాశీబుగ్గలోని వివేకానంద కాలనీలో ఇంట్లోనే అక్రమంగా స్కానింగ్ చేస్తున్నట్లు సమాచారం రావడంతో ప్రోగ్రాం అధికారి సయ్యద్ ఇక్తిదార్ అహ్మద్ బృందం ఇంతేజార్ గంజ్ పోలీసులతో కలిసి దాడి చేసింది.
చిర్ర మాధవి అనే స్టాఫ్ నర్స్ తన బంధువు నిరోష తో కలిసి ఎలాంటి అర్హతలు లేకుండా ఇంట్లోనే గర్భిణులకు స్కానింగ్ చేస్తున్నట్లు తేలింది. ఒక పోర్టబుల్ మిషన్ సీజ్ చేశారు. లింగ నిర్ధారణ కోసం గర్భిణులను తీసుకువస్తున్న నిరోష, గణేష్ పై కేసు నమోదు చేశారు. ఈ మిషన్ ను దిలీప్ అనే వ్యక్తి విక్రయించినట్లు ప్రాథమిక విచారణలో తేలింది.
ఆడ శిశువు అని తేలితే అబార్షన్ కు రెఫర్
ఈ దాడుల్లో సంచలన విషయం వెలుగులోకి వచ్చింది. లింగ నిర్ధారణలో ఆడ శిశువు అని తేలిన గర్భిణులను గర్భస్రావం కోసం మహబూబాబాద్ లోని ఆర్ఎంపి మహేందర్ వద్దకు, నెక్కొండలోని డాక్టర్ అంజన్ కుమార్ వద్దకు పంపుతున్నట్లు అధికారులు గుర్తించారు.
నిందితులందరిపై పిసిపి ఎన్ డిటి చట్టం 1994 (గర్భస్థ పూర్వ మరియు గర్భస్థ శిశువు లింగ నిర్ధారణ నిషేధిత చట్టం) ప్రకారం కేసులు నమోదు చేసి దర్యాప్తు చేస్తున్నట్లు పోలీసులు తెలిపారు.
జిల్లాలో అక్రమ స్కానింగ్ కేంద్రాల నిర్వహణ, లింగ నిర్ధారణ పరీక్షలు చట్టవిరుద్ధమని, ఇటువంటి కార్యకలాపాలపై వైద్య ఆరోగ్య, పోలీస్, రెవెన్యూ శాఖల సమన్వయంతో నిరంతరం తనిఖీలు చేస్తామని డిఎంహెచ్ఓ డాక్టర్ రాజా రెడ్డి హెచ్చరించారు.
