టీజీపీఎస్సీ పరీక్షలకు పకడ్బందీ ఏర్పాట్లు చేయాలి

టీజీపీఎస్సీ పరీక్షలకు పకడ్బందీ ఏర్పాట్లు చేయాలి
రెండు రోజుల్లో 3,650 మంది అభ్యర్థులు హాజరు
ఐదు కేంద్రాల్లో పరీక్షల నిర్వహణ
అధికారులకు కలెక్టర్‌ చాహత్‌ బాజ్‌పాయ్‌ ఆదేశాలు

కాకతీయ, హనుమకొండ : టీజీపీఎస్సీ ఆధ్వర్యంలో ఈ నెల 12, 13 తేదీల్లో నిర్వహించనున్న డిప్యూటీ ఎడ్యుకేషనల్‌ ఆఫీసర్‌, గెజిటెడ్‌ హెడ్‌మాస్టర్‌ గ్రేడ్‌–1 పరీక్షలకు పకడ్బందీ ఏర్పాట్లు చేయాలని హనుమకొండ కలెక్టర్‌ చాహత్‌ బాజ్‌పాయ్‌ అధికారులను ఆదేశించారు. మంగళవారం కలెక్టరేట్‌లో వివిధ శాఖల అధికారులతో నిర్వహించిన సమన్వయ సమావేశంలో పరీక్షల ఏర్పాట్లపై సమీక్షించారు. రెండు రోజుల పాటు జరిగే పరీక్షలకు రోజుకు 1,825 మంది చొప్పున మొత్తం 3,650 మంది హాజరుకానున్నట్లు కలెక్టర్‌ తెలిపారు. ఉదయం 10 నుంచి మధ్యాహ్నం 12.30 గంటల వరకు, మధ్యాహ్నం 2.30 నుంచి సాయంత్రం 5 గంటల వరకు పరీక్షలు నిర్వహించనున్నట్లు వెల్లడించారు. వడ్డేపల్లిలోని అయాన్‌ డిజిటల్‌ జోన్‌, ములుగు క్రాస్‌రోడ్‌లోని శ్రీ గాయత్రి డిగ్రీ అండ్‌ పీజీ కళాశాల, భీమారం రామారంలోని మోక్షిత్‌ కంప్యూటర్స్‌, గోపాల్‌పూర్‌లోని ఎన్‌ఎస్‌ గ్లోబల్‌ టెక్నాలజీస్‌, హసన్‌పర్తి చింతగట్టు సమీపంలోని నోబెల్‌ టెక్నాలజీ అండ్‌ సొల్యూషన్స్‌లో కేంద్రాలు ఏర్పాటు చేసినట్లు తెలిపారు. కేంద్రాల్లో తాగునీరు, విద్యుత్‌, ఇతర మౌలిక వసతులు కల్పించాలని, పోలీసు బందోబస్తు ఏర్పాటు చేయాలని ఆదేశించారు. వైద్య ఆరోగ్య, విద్యుత్‌, ఆర్టీసీ శాఖలు సమన్వయంతో పనిచేసి పరీక్షలను ప్రశాంతంగా నిర్వహించాలని స్పష్టం చేశారు. ఈ సమావేశంలో జిల్లా వైద్య ఆరోగ్యశాఖ అధికారి డాక్టర్‌ అప్పయ్య, పోలీస్‌ ఇన్‌స్పెక్టర్‌ చంద్రమోహన్‌, ఆర్టీసీ డీఎం ధరమ్‌సింగ్‌, కలెక్టరేట్‌ పరిపాలన అధికారి గౌరీశంకర్‌, చీఫ్‌ సూపరింటెండెంట్లు, డిపార్ట్‌మెంటల్‌ అధికారులు, ఫ్లయింగ్‌ స్క్వాడ్‌ అధికారులు, కేంద్రాల ప్రతినిధులు పాల్గొన్నారు.