వాలీబాల్ లో సత్తా చాటిన మంద నందిని
ల్యాబార్తి ముద్దు బిడ్డకు జాతీయ స్థాయి పిలుపు
కాకతీయ, వరంగల్ ప్రతినిధి : చిన్న గ్రామం నుంచి జాతీయ స్థాయి క్రీడా వేదికకు ల్యాబార్తి గ్రామానికి చెందిన మంద నందిని ఎంపికైంది. వర్ధన్నపేట మండలం ల్యాబార్తి గ్రామ పాఠశాల పూర్వ విద్యార్థిని, వెంకట్రావు కుమార్తె అయిన నందిని జాతీయ స్థాయి వాలీబాల్ పోటీల్లో పాల్గొనే తెలంగాణ బాలికల జట్టుకు ఎంపికై గ్రామానికి గుర్తింపు తీసుకొచ్చింది. తెలంగాణ సాంఘిక సంక్షేమ బాలికల చింతకుంట గురుకుల కళాశాలలో ఇంటర్‌ మొదటి సంవత్సరం చదువుతున్న ఆమె నవంబర్‌ 5, 6, 7 తేదీల్లో గోదావరిఖనిలో జరిగిన రాష్ట్రస్థాయి పాఠశాలల వాలీబాల్ పోటీల్లో 17 ఏళ్ల విభాగంలో ప్రతిభ కనబరిచింది. దీంతో జాతీయ జట్టులో చోటు దక్కించుకుంది. ఇప్పటికే మూడుసార్లు రాష్ట్రస్థాయి పోటీల్లో పాల్గొన్న అనుభవం ఆమెకు ఉంది.
రాజస్థాన్‌లో జాతీయ పోటీలు
డిసెంబర్‌ 10 నుంచి 16 వరకు రాజస్థాన్‌లోని సికర్‌లో జాతీయస్థాయి వాలీబాల్ పోటీలు జరగనున్నాయి. నందిని ఎంపిక విషయాన్ని ల్యాబార్తి పాఠశాల ప్రధానోపాధ్యాయురాలు లింగం శైలజ, వ్యాయామ ఉపాధ్యాయుడు జలగం రఘువీర్‌ వెల్లడించారు. నందినితోపాటు ఆమెను క్రీడల్లో ప్రోత్సహించిన రఘువీర్‌ను తెలంగాణ రాష్ట్ర వాలీబాల్ అసోసియేషన్‌ అధ్యక్షుడు గజ్జెల్ల రమేష్‌బాబు, గ్రామ సర్పంచ్‌ మన్నూరు శారద సోము, ఉప సర్పంచ్‌ సంకినేని గంగరాజు, చింతకుంట గురుకుల కళాశాల ప్రిన్సిపాల్‌ ఏ.లక్ష్మి, అధ్యాపకులు, ఉపాధ్యాయులు, గ్రామస్తులు అభినందించారు. ఈ కార్యక్రమంలో అమ్మ ఆదర్శ కమిటీ చైర్మన్‌ పబ్బోజు సునీత, పీడీ సుష్మా, హౌస్‌ టీచర్‌ మాధురి, పీఈటీ సుజాత, కోచ్‌ బి.సతీష్‌, ఎం.వెంకటేశం తదితరులు పాల్గొన్నారు.
