వెలుగుమట్లలో పేదల ముసుగులో భూమాఫియా!
నిరుపేదల ఇళ్ల స్థలాల ఆశలతో అక్రమ వసూళ్లు
సర్వే నంబర్లు 147, 148, 149లో ఆక్రమణలు
హైకోర్టు, సీసీఎల్ఏ ఆదేశాలతోనే తొలగింపులు
మిగిలిన దరఖాస్తులనూ పరిశీలించి అర్హులకు స్థలాలు : మంత్రి తుమ్మల
కాకతీయ, ఖమ్మం : వెలుగుమట్ల భూదాన్‌ భూముల వ్యవహారంలో పేదల పేరుతో కొందరు అక్రమార్కులు భూమాఫియాగా ఏర్పడి, నిరుపేదలను మోసం చేశారని రాష్ట్ర వ్యవసాయ శాఖ మంత్రి తుమ్మల నాగేశ్వరరావు వెల్లడించారు. ఇళ్ల స్థలాలు ఇప్పిస్తామంటూ అమాయకుల నుంచి అక్రమంగా డబ్బులు వసూలు చేసి, భయానక పరిస్థితులు సృష్టించారని తెలిపారు. అర్హులైన పేదలకు అన్యాయం జరగకుండా ప్రభుత్వం చర్యలు తీసుకుంటుందని స్పష్టం చేశారు. ఖమ్మం అర్బన్‌ మండలం వెలుగుమట్ల భూదాన్‌ భూముల్లో మిగిలిన అర్హులకు ఇళ్ల స్థలాలు కేటాయించాలని కోరుతూ హైకోర్టు విశ్రాంత న్యాయమూర్తి జస్టిస్‌ చంద్రకుమార్‌ మంగళవారం మంత్రి తుమ్మలను కలిశారు. ఈ సందర్భంగా భూముల ఆక్రమణలు, ప్రభుత్వ యంత్రాంగం చేపట్టిన చర్యలు, అధికారిక రికార్డుల్లోని వివరాలను మంత్రి ఆయనకు వివరించారు.
పోలీసులూ వెళ్లలేని పరిస్థితి సృష్టించారు
సర్వే నంబర్లు 147, 148, 149లో భారీగా అక్రమ ఆక్రమణలు జరిగాయని మంత్రి తెలిపారు. పేదల పేరుతో కొందరు వ్యక్తులు సమాంతర వ్యవస్థను ఏర్పాటు చేసుకుని, ఇళ్ల స్థలాల ఆశ చూపి డబ్బులు వసూలు చేశారని పేర్కొన్నారు. చివరకు పోలీసులు సైతం అక్కడికి వెళ్లలేని విధంగా భయానక పరిస్థితులు సృష్టించారని వివరించారు. హైకోర్టు, భూ పరిపాలన ప్రధాన కమిషనర్‌ 2023లో జారీ చేసిన ఆదేశాల మేరకే రెవెన్యూ యంత్రాంగం ఆక్రమణల తొలగింపు చర్యలు చేపట్టిందన్నారు. ప్రభుత్వ చర్యలు పేదలకు వ్యతిరేకం కాదని, ప్రభుత్వ భూములను అక్రమార్కుల నుంచి కాపాడేందుకేనని స్పష్టం చేశారు. మంత్రి అధికారిక రికార్డులు, ఆధారాలతో వివరాలు వెల్లడించడంతో వెలుగుమట్లలో జరిగిన పరిణామాలపై జస్టిస్‌ చంద్రకుమార్‌ విస్మయం వ్యక్తం చేసినట్లు తెలిసింది. అక్కడి అక్రమాలు, భూమాఫియా కార్యకలాపాల గురించి తనకు పూర్తి సమాచారం తెలియలేదని, కొందరు తప్పుడు వివరాలిచ్చి తనను తప్పుదోవ పట్టించారని ఆవేదన వ్యక్తం చేసినట్లు సమాచారం. క్షేత్రస్థాయి విచారణలో అర్హులుగా గుర్తించిన పేదలకు ఇప్పటికే నివాస స్థలాలు, ఇందిరమ్మ ఇళ్లు కేటాయించడంతోపాటు మౌలిక సదుపాయాలు కల్పిస్తున్నామని తుమ్మల తెలిపారు. మిగిలిన దరఖాస్తులను కూడా సమగ్రంగా పరిశీలించి నిజమైన అర్హులకు స్థలాలు కేటాయిస్తామని హామీ ఇచ్చారు. పేదల సంక్షేమం ప్రభుత్వ బాధ్యతని, వారి ఆశలను ఆసరాగా చేసుకుని మోసాలకు పాల్పడేవారిని ఉపేక్షించబోమని స్పష్టం చేశారు.
