పిల్లల ప్రజావాణికి కలెక్టర్ స్పందన!
51 అర్జీలు స్వీకరణ.. సమస్యల పరిష్కారానికి అధికారులకు ఆదేశాలు
విద్యార్థుల ఇబ్బందులను ప్రాధాన్యంగా పరిష్కరించాలి : కలెక్టర్ చాహత్ బాజ్పాయ్
కాకతీయ, హనుమకొండ : విద్యార్థులు ఎదుర్కొంటున్న సమస్యలను సత్వరమే పరిష్కరించేందుకు చర్యలు తీసుకోవాలని కలెక్టర్ చాహత్ బాజ్పాయ్ అధికారులను ఆదేశించారు. బాలల దినోత్సవం సందర్భంగా ఈ నెల 20వ తేదీ వరకు నిర్వహిస్తున్న కార్యక్రమాల్లో భాగంగా సోమవారం కలెక్టర్ కాన్ఫరెన్స్ హాల్లో పిల్లల ప్రజావాణి నిర్వహించారు. మహిళాభివృద్ధి, శిశు సంక్షేమ శాఖ జిల్లా బాలల పరిరక్షణ విభాగం ఆధ్వర్యంలో జరిగిన ఈ కార్యక్రమంలో కలెక్టర్ విద్యార్థుల నుంచి 51 అర్జీలు స్వీకరించి వారి సమస్యలను అడిగి తెలుసుకున్నారు. పాఠశాలల్లో తాగునీరు, వేడినీటి సౌకర్యం కల్పించాలని, నూతన భవనాలు నిర్మించాలని విద్యార్థులు కోరారు. ఆధార్ కార్డులు, కుల ధ్రువీకరణ పత్రాలు మంజూరు చేయాలని, పాఠశాలల సమీపంలోని పాన్ షాపులు, మద్యం దుకాణాల వల్ల ఇబ్బందులు ఎదురవుతున్నాయని ఫిర్యాదు చేశారు. అల్పాహారం, మధ్యాహ్న భోజనం మెనూ ప్రకారం అందించాలని అర్జీలు సమర్పించారు. ప్రతి సమస్యను పరిశీలించి సంబంధిత శాఖల అధికారులు సమన్వయంతో పరిష్కార చర్యలు చేపట్టాలని కలెక్టర్ స్పష్టం చేశారు. జిల్లా సంక్షేమ అధికారి ఎం. విశ్వజ, డీఆర్వో శ్రీనివాస్, జిల్లా విద్యాశాఖ అధికారి ఎల్.వి. గిరిరాజ్ గౌడ్, ఈ-డిస్ట్రిక్ట్ మేనేజర్ శ్రీధర్, బాలరక్షా భవన్ కోఆర్డినేటర్ సి.హెచ్. అవంతి, ఇన్చార్జి డీసీపీఓ ఎస్. ప్రవీణ్కుమార్, చైల్డ్లైన్ కోఆర్డినేటర్ ఎస్. భాస్కర్, వివిధ శాఖల అధికారులు పాల్గొన్నారు.

