పెళ్లి పేరుతో యువకులకు కుచ్చుటోపీ
వరంగల్ లో నిత్య పెళ్లికూతురు
పెళ్లీడు కూతురు ఉన్నా, మాట్రిమోని ద్వారా ఇంకో పెళ్లి
విషయం బయటపడడంతో 8.5 తులాల బంగారంతో పరారైన మహిళ
పోలీసు దర్యాప్తులో బయటపడ్డ కిలాడీ లేడీ మోసాలు
కాకతీయ, వరంగల్ ప్రతినిధి : సమాజంలో మోసాలు నానాటికీ కొత్త రూపాలు సంతరించుకుంటున్నాయి. ముఖ్యంగా పెళ్లి బంధంలో మోసాల సమస్య వ్యాప్తి చెందుతోంది. పెళ్లి అనే పవిత్రమైన బంధాన్ని మోసాలకు ఉపయోగించడం వలన ఏది నాటకం, ఏది వాస్తవం అనే అవగాహన లేని పరిస్థితులలో నేటి సమాజం జీవిస్తుంది. ఇంతకు మించి సామాజిక, న్యాయ సమస్యలు ఉద్రిక్తమవుతున్నాయి. భద్రాద్రి కొత్తగూడెం జిల్లాకు చెందిన నిమిషకవి ఇందిరను వరంగల్ జిల్లా పర్వతగిరి మండలం చౌటపల్లి గ్రామానికి చెందిన మట్టపల్లి దేవేందర్ రావు మ్యారేజ్ బ్యూరో ద్వారా సంబంధం కుదుర్చుకున్నాడు. రూ.4 లక్షలతో ఘనంగా వివాహం చేసుకున్నాడు. పెళ్లి కూతురు కి 8.5 తులాల బంగారం కూడా కానుకగా వరుడే పెట్టాడు. పెళ్లయిన రెండు రోజులకే మహిళ ప్రవర్తనలో తేడా గమనించిన దేవేందర్ రావు, ఆమె ఫోన్ చెక్ చేయడంతో మోసపోయాని గ్రహించాడు. ఆమెకు ఇదివరికే పెళ్లయిందని, ఒక కూతురు కూడా ఉందని గుర్తించి, మహిళను నిలదీయగా, పెళ్లయిన మాట వాస్తవమే కానీ విడాకులు తీసుకున్నాని కప్పిపుచ్చుకునే ప్రయత్నం చేసింది. ఈ విషయంలో ఇరువురి మధ్య గొడవ జరగగా, ఉదయం లేచే సరికి బంగారం, నగదుతో నిత్య పెళ్లి కూతురు కిలాడి లేడీ పారిపోయింది. పెళ్లి పేరుతో తను మోసపోయానని గ్రహించిన పెళ్లి కొడుకు దేవేందర్ రావు తనకు పెళ్లి సంబంధం కుదిర్చిన మ్యారేజ్ బ్యూరో నిర్వాహకులు ,తనను మోసపురిత వివాహం చేసుకొని పారిపోయిన మహిళ, ఆమె తల్లిపై పోలీస్ స్టేషన్ లో ఫిర్యాదు చేయగా నిత్య పెళ్లికూతురు ఇందిరా గురించి ఆరా తీశారు. పోలీసుల దర్యాప్తులో ఇందిరా గతంలో కూడా ఇద్దరు, ముగ్గురు యువకులను ఇదే తరహాలో మోసం చేసినట్లు గుర్తించారు.
