బంగ్లాదేశ్ హైకమిషన్ వద్ద ఉద్రిక్తత
హిందువులపై దాడులను ఖండిస్తూ వీహెచ్పీ భారీ నిరసన
కాకతీయ, నేషనల్ డెస్క్ : ఢిల్లీలోని బంగ్లాదేశ్ రాయబార కార్యాలయం (హైకమిషన్) వద్ద ఉద్రిక్త వాతావరణం నెలకొంది. బంగ్లాదేశ్లో హిందువులపై జరుగుతున్న దాడులు, ఆస్తుల విధ్వంసాన్ని ఖండిస్తూ విశ్వ హిందూ పరిషత్ (వీహెచ్పీ) కార్యకర్తలు భారీ సంఖ్యలో హైకమిషన్ కార్యాలయం వద్దకు చేరుకుని నిరసన చేపట్టారు. ఉదయం నుంచి హైకమిషన్ పరిసర ప్రాంతాల్లో వీహెచ్పీ కార్యకర్తలు గుమికూడారు. బంగ్లాదేశ్లో మైనారిటీల భద్రతపై కేంద్ర ప్రభుత్వం తక్షణమే జోక్యం చేసుకోవాలని, అక్కడి హిందువులకు రక్షణ కల్పించేలా చర్యలు తీసుకోవాలని డిమాండ్ చేశారు. నినాదాలు చేస్తూ ముందుకు సాగిన నిరసనకారులు హైకమిషన్ కార్యాలయం లోపలికి వెళ్లేందుకు ప్రయత్నించడంతో పరిస్థితి ఒక్కసారిగా ఉద్రిక్తంగా మారింది.
బారికేడ్లు తోసిన కార్యకర్తలు
నిరసనకారులు ఏర్పాటు చేసిన బారికేడ్లను తోసుకుంటూ ముందుకు వెళ్లేందుకు యత్నించడంతో భద్రతా సిబ్బంది అప్రమత్తమయ్యారు. కొంతసేపు ఉద్రిక్త పరిస్థితి నెలకొనగా, హైకమిషన్ భద్రతకు ఎలాంటి ముప్పు తలెత్తకుండా పోలీసులు కఠినంగా వ్యవహరించారు. సమాచారం అందుకున్న వెంటనే ఢిల్లీ పోలీసులు అదనపు బలగాలను అక్కడికి తరలించారు. హైకమిషన్ పరిసర ప్రాంతాల్లో భారీగా పోలీసు బందోబస్తు ఏర్పాటు చేశారు. వీహెచ్పీ కార్యకర్తలను నిలువరించి, పరిస్థితిని అదుపులోకి తీసుకొచ్చేందుకు ప్రయత్నించారు. కొంతమంది కార్యకర్తలను అక్కడి నుంచి తొలగించినట్లు తెలుస్తోంది. విదేశీ రాయబార కార్యాలయాల భద్రత అత్యంత సున్నితమైన అంశం కావడంతో, ఎలాంటి అవాంఛనీయ ఘటనలు చోటుచేసుకోకుండా భద్రతా బలగాలు అప్రమత్తంగా వ్యవహరిస్తున్నాయి. పరిస్థితిని పూర్తిగా నియంత్రణలోకి తెచ్చేందుకు పోలీసులు నిరంతరం పర్యవేక్షణ కొనసాగిస్తున్నారు.
ఈ ఘటన దేశ రాజధానిలో చర్చనీయాంశంగా మారింది. బంగ్లాదేశ్లో మైనారిటీల భద్రత అంశం మరోసారి తెరపైకి రావడంతో, కేంద్ర ప్రభుత్వం ఎలాంటి చర్యలు తీసుకుంటుందన్నదానిపై రాజకీయ, సామాజిక వర్గాల్లో ఆసక్తి నెలకొంది.
