కోనోకార్పస్ చెట్లను తొలగించాలి
మౌలిక వసతులకు నష్టం.. పర్యావరణానికి ముప్పు
అధికారులు వెంటనే స్పందించి తగిన చర్యలు చేపట్టాలి
చేర్యాల పట్టణ వాసుల నుంచి పెరుగుతున్న డిమాండ్
వారం రోజుల్లో తొలగిస్తాం : మున్సిపల్ కమిషనర్ నాగేందర్
కాకతీయ,చేర్యాల : చేర్యాల పట్టణంలోని జాతీయ రహదారి డివైడర్ మధ్యలో వేగంగా పెరుగుతున్న కోనోకార్పస్ చెట్లు ప్రజలకు ఇబ్బందులు కలిగిస్తున్నాయని చేర్యాల పట్టణ ప్రజల నుంచి డిమాండ్ పెరుగుతోంది. ఈ చెట్ల వేర్లు భవనాల పునాదులు, రోడ్లు, డ్రైనేజీ వ్యవస్థలకు నష్టం కలిగించే అవకాశం ఉందని ఆందోళన వ్యక్తం చేస్తున్నారు.అలాగే, ఈ చెట్ల నుంచి విడుదలయ్యే పరాగకణాల కారణంగా కొందరికి అలర్జీలు, శ్వాస సంబంధిత సమస్యలు ఎదురవుతున్నాయని స్థానిక నివాసితులు చెబుతున్నారు. పర్యావరణ నిపుణులు మాత్రం చెట్ల తొలగింపులో జాగ్రత్తలు పాటిస్తూ, అవసరమైతే స్థానిక జాతులకు చెందిన ప్రత్యామ్నాయ మొక్కలను నాటాలని సూచిస్తున్నారు.
అధికారులు వెంటనే స్పందించి తగిన చర్యలు చేపట్టాలి
ఇటీవల కొన్ని రాష్ట్రాలు కోనోకార్పస్ చెట్ల నాటకాన్ని పరిమితం చేయడం లేదా నిషేధించడం వంటి చర్యలు చేపట్టి వెంటనే చెట్లను తొలగించి, వాటి స్థానంలో వేప, రావి, కానుగ, బాదం వంటి స్థానిక వృక్ష జాతులను నాటాలని పర్యావరణ ప్రేమికులు సూచిస్తున్నారు.ప్రజల ఆరోగ్యం, పర్యావరణ పరిరక్షణ, పట్టణ అభివృద్ధి అంశాలను దృష్టిలో ఉంచుకుని ప్రభుత్వం స్పష్టమైన విధానాన్ని ప్రకటించాలని స్థానికులు డిమాండ్ చేస్తున్నారు. కోనోకార్పస్ చెట్ల వల్ల కలుగుతున్న సమస్యలపై మున్సిపల్ అధికారులు వెంటనే స్పందించి తగిన చర్యలు చేపట్టాలని ప్రజలు కోరుతున్నారు. ఈ చెట్ల వేర్లు భూమి లోపలికి చాలా దూరం విస్తరించి, డ్రైనేజీ పైపులు, తాగునీటి లైన్లు, టెలికామ్ కేబుల్స్, మరియు భవనాల పునాదులను దెబ్బతీస్తాయి. ఇవి భూగర్భ జలాలను విపరీతంగా పీల్చుకుంటాయి. పక్షులు కూడా వీటిపై వాలవు కాబట్టి జీవవైవిధ్యానికి ఇవి ఏమాత్రం ఉపయోగపడవు.
చర్యలు తీసుకుంటాం : సుంచు నాగేందర్, చేర్యాల మున్సిపల్ కమిషనర్
పట్టణ పరిధిలోని రహదారులు, పార్కులు, ఇతర ప్రదేశాలలో ఉన్న కోనో కార్పస్ చెట్లను ప్రజల పిర్యాదుల మేరకు వారం రోజుల్లో తొలగించే విదంగా చర్యలు తీసుకుంటాం తొలగింపు అనంతరం ప్రత్యామ్నాయ మొక్కల నాటే కార్యక్రమాలు చేపడతాం. పర్యావరణ పరిరక్షణలో భాగంగా స్థానిక వాతావరణానికి అనుకూలమైన స్వదేశీ జాతుల మొక్కలను నాటేందుకు మున్సిపాలిటీ ప్రోత్సహిస్తోంది. నగరాన్ని పచ్చదనంతో అభివృద్ధి చేయడంతో పాటు పర్యావరణ సమతుల్యతను కాపాడేందుకు అన్ని చర్యలు తీసుకుంటాం
