వైద్య విద్యలో ప్రీతి ప్రతిభ
ఎండీ కమ్యూనిటీ మెడిసిన్‌లో నాలుగో ర్యాంకు
నాగ్‌పూర్‌ ప్రభుత్వ వైద్య కళాశాలలో చదువు
చేర్యాల వైద్య విద్యార్థిని డాక్టర్‌ పోగుల ప్రీతికి అరుదైన ఘనత
కాకతీయ, చేర్యాల : వైద్య విద్యలో చేర్యాల పట్టణానికి చెందిన డాక్టర్‌ పోగుల ప్రీతి ప్రతిభ చాటుకున్నారు. ఎండీ కమ్యూనిటీ మెడిసిన్‌ పరీక్షల్లో విశ్వవిద్యాలయ స్థాయిలో నాలుగో ర్యాంకు సాధించారు. నాగ్‌పూర్‌ ప్రభుత్వ వైద్య కళాశాలలో వైద్య విద్యను అభ్యసించిన ఆమె, మహారాష్ట్ర ఆరోగ్య శాస్త్రాల విశ్వవిద్యాలయం విడుదల చేసిన ఫలితాల్లో ఈ ఘనత సాధించారు. చేర్యాలకు చెందిన బీఆర్‌ఎస్‌ సీనియర్‌ నాయకుడు, మార్కెట్‌ కమిటీ మాజీ డైరెక్టర్‌ కర్రోల్ల ఎలీషా మనుమరాలు ప్రీతి ఈ విజయం సాధించడంతో కుటుంబ సభ్యులు, బంధువులు ఆనందం వ్యక్తం చేస్తున్నారు. తన విజయానికి సహకరించిన విభాగాధిపతి, అధ్యాపకులు, సీనియర్లు, జూనియర్లకు ఆమె కృతజ్ఞతలు తెలిపారు. కుటుంబ సభ్యుల ప్రోత్సాహం తన విజయానికి తోడ్పడిందన్నారు. ప్రజారోగ్యంపై ఆసక్తితో కమ్యూనిటీ మెడిసిన్‌ను ఎంచుకున్నానని ప్రీతి తెలిపారు. వ్యాధుల నివారణపై ప్రజల్లో అవగాహన కల్పిస్తూ, మెరుగైన ఆరోగ్య సేవలు అందించడమే తన లక్ష్యమని పేర్కొన్నారు. ఆమె సాధించిన విజయంపై పలువురు అభినందనలు తెలిపారు.
