ఎల్‌నినో దెబ్బ..

ఎల్‌నినో దెబ్బ..
తెలంగాణలో తీవ్ర‌ వర్షాభావం
ఆగస్టులో 38 శాతం లోటు.. మూడు నెలల్లో 17 శాతం తక్కువ వ‌ర్షం
గతేడాదితో పోలిస్తే ఏకంగా 64 శాతం తగ్గిన వర్షపాతం
మధ్య, దక్షిణ తెలంగాణ జిల్లాల్లో తీవ్ర వర్షాభావం
హైదరాబాద్‌ పరిధిలోనూ సాధారణం కంటే 22 శాతం తక్కువ
బంగాళాఖాతంలోని వాతావరణ వ్యవస్థల ప్రభావం అంతంతే
సెప్టెంబరు వర్షాలపైనే రైతుల ఆశలు

కాకతీయ, తెలంగాణ బ్యూరో : ఎల్‌నినో ప్రభావం తెలంగాణను వెంటాడుతోంది. వర్షాకాలంలో కీలకమైన ఆగస్టు నెలలోనే వానలు ముఖం చాటేయడంతో రాష్ట్రం తీవ్ర వర్షాభావ పరిస్థితుల్లోకి జారుకుంది. సాధారణంగా ఈ నెలలో కురవాల్సిన వర్షంలో భారీ లోటు ఏర్పడింది. గతేడాదితో పోలిస్తే ఈసారి ఆగస్టులో నమోదైన వర్షపాతం ఏకంగా 64 శాతం తగ్గిపోవడం ఆందోళన కలిగిస్తోంది. జూన్‌ నుంచి ఆగస్టు వరకు మూడు నెలల కాలంలోనూ సాధారణ వర్షపాతం కంటే 17 శాతం తక్కువ వర్షం నమోదైంది. బంగాళాఖాతంలో ఏర్పడిన వాతావరణ వ్యవస్థలు తెలంగాణపై ఆశించిన స్థాయిలో ప్రభావం చూపకపోవడం, ఎల్‌నినో ప్రభావం కొనసాగడం వర్షాభావానికి ప్రధాన కారణాలుగా వాతావరణ శాఖ పేర్కొంది. తెలంగాణ డెవలప్‌మెంట్‌ ప్లానింగ్‌ సొసైటీ గణాంకాల ప్రకారం.. ఆగస్టులో రాష్ట్రంలో సాధారణంగా 215.8 మిల్లీమీటర్ల వర్షపాతం నమోదుకావాల్సి ఉండగా, ఈసారి కేవలం 134.5 మిల్లీమీటర్లు మాత్రమే కురిసింది. దీంతో నెలవారీ వర్షపాత లోటు 38 శాతంగా నమోదైంది. వర్షాకాలం ప్రారంభమైన జూన్‌లో 12 శాతం లోటు నమోదుకాగా, జులైలో కేవలం 1 శాతం లోటు మాత్రమే ఉంది. అయితే ఆగస్టులో మాత్రం పరిస్థితి ఒక్కసారిగా దిగజారింది. గతేడాది ఆగస్టుతో పోలిస్తే ఈసారి వర్షాభావం మరింత స్పష్టంగా కనిపించింది. 2025 ఆగస్టులో రాష్ట్రవ్యాప్తంగా 378.5 మిల్లీమీటర్ల వర్షపాతం నమోదైంది. 2026 ఆగస్టులో మాత్రం 134.5 మిల్లీమీటర్ల వర్షమే కురిసింది. అంటే గతేడాదితో పోలిస్తే దాదాపు 64 శాతం తక్కువ వర్షపాతం నమోదైంది. వర్షాకాలంలో కొంతకాలం పొడివాతావరణం తర్వాత భారీ వర్షాలు కురవడం సాధారణమే అయినప్పటికీ, ఈసారి ఆగస్టులో ఆశించిన స్థాయిలో వర్షాలు లేకపోవడంతో వర్షాభావ పరిస్థితులు తీవ్రమయ్యాయి.

నెలంతా తీవ్ర హెచ్చుతగ్గులు

ఆగస్టు నెలలో వర్షపాతం తీవ్ర అస్థిరతకు లోనైంది. నెల ప్రారంభంలోనే లోటు 40 శాతానికి పైగా ఉండగా, ఆగస్టు 3 నాటికి అది 49 శాతానికి చేరుకుంది. ఆ తర్వాత కురిసిన వర్షాలతో ఆగస్టు 4 నాటికి రాష్ట్రం 13 శాతం మిగులు వర్షపాతం నమోదైన స్థితికి చేరింది. కానీ ఈ ఊరట ఎక్కువకాలం నిలవలేదు. ఆగస్టు 5 నాటికి మళ్లీ 2 శాతం లోటులోకి వెళ్లిన రాష్ట్రం, ఆ తర్వాత క్రమంగా మరింత వెనుకబడింది. ఆగస్టు 22 నాటికి వర్షపాత లోటు 39 శాతానికి చేరగా, నెలాఖరుకు 38 శాతం లోటుతో ఆగస్టు ముగిసింది. బంగాళాఖాతంలో ఆగస్టులో మొత్తం మూడు వాతావరణ వ్యవస్థలు ఏర్పడినా తెలంగాణకు పెద్దగా ప్రయోజనం కలగలేదు. అవన్నీ వాయువ్య బంగాళాఖాతంలో కేంద్రీకృతమై ఉత్తర ఒడిశా, దాని పరిసర ప్రాంతాల మీదుగా పయనించాయి. తెలంగాణ ఈ వ్యవస్థల ప్రభావ పరిధి అంచుల్లో ఉండటంతో విస్తారంగా వర్షాలు కురిసే పరిస్థితి ఏర్పడలేదు. ఉత్తర తెలంగాణలోని కొన్ని జిల్లాల్లో మోస్తరు వర్షాలు కురిసినా, మధ్య, దక్షిణ తెలంగాణ జిల్లాల్లో తీవ్ర వర్షాభావం నెలకొంది.

మూడు నెలల్లోనూ లోటే

జూన్‌ నుంచి ఆగస్టు వరకు మూడు నెలల కాలంలో రాష్ట్రంలో సాధారణంగా 573.5 మిల్లీమీటర్ల వర్షపాతం నమోదుకావాల్సి ఉంది. కానీ ఈసారి 473.8 మిల్లీమీటర్లు మాత్రమే నమోదయ్యాయి. దీంతో మూడు నెలల వర్షపాత లోటు 17 శాతంగా ఉంది. జూన్‌, జులైలో పరిస్థితి కొంతమేర సాధారణంగానే కనిపించినా, ఆగస్టులో వర్షాలు భారీగా తగ్గిపోవడంతో మొత్తం వర్షాకాల లోటు పెరిగింది. వర్షాభావ ప్రభావం గ్రామీణ ప్రాంతాలకే పరిమితం కాలేదు. పట్టణ ప్రాంతాల్లోనూ సాధారణ వర్షపాతానికి, నమోదైన వర్షపాతానికి మధ్య భారీ వ్యత్యాసం కనిపించింది. గ్రేటర్‌ హైదరాబాద్‌ మున్సిపల్‌ కార్పొరేషన్‌, సైబరాబాద్‌ మున్సిపల్‌ కార్పొరేషన్‌, మల్కాజిగిరి మున్సిపల్‌ కార్పొరేషన్‌ పరిధిలో జూన్‌ నుంచి ఆగస్టు మధ్య సాధారణంగా 459.7 మిల్లీమీటర్ల వర్షపాతం నమోదుకావాల్సి ఉంది. అయితే 359.6 మిల్లీమీటర్లు మాత్రమే నమోదైంది. దీంతో ఈ ప్రాంతాల్లో 22 శాతం లోటు నమోదైంది. ఆగస్టు వర్షాభావం వ్యవసాయ రంగంపై ప్రభావం చూపే అవకాశం ఉండటంతో సెప్టెంబరు వర్షాలు అత్యంత కీలకంగా మారాయి. ఇప్పటికే వర్షాల కోసం ఎదురుచూస్తున్న రైతులకు ఆగస్టు తీవ్ర నిరాశ మిగిల్చింది. తక్కువ వర్షపాతం కారణంగా సాగునీటి లభ్యత, పంటల పరిస్థితి, జలాశయాల్లోకి వచ్చే నీటి ప్రవాహం వంటి అంశాలపై ప్రభావం పడే అవకాశం ఉంది. వర్షాలు కురవాల్సిన సమయంలో పొడివాతావరణం కొనసాగడంతో భూగర్భ జలాలపైనా ప్రభావం చూపే పరిస్థితి ఏర్పడుతోంది. మొత్తంగా వర్షాకాలంలో కీలకమైన ఆగస్టు నెల తెలంగాణకు తీవ్ర నిరాశనే మిగిల్చింది. ఎల్‌నినో ప్రభావం, బంగాళాఖాతంలోని వాతావరణ వ్యవస్థలు తెలంగాణ వైపు బలంగా కదలకపోవడం కలిసి వర్షపాతాన్ని దెబ్బతీశాయి. ఆగస్టు నెలలో 38 శాతం లోటు, జూన్‌ నుంచి ఆగస్టు వరకు 17 శాతం లోటు నమోదవడం పరిస్థితి తీవ్రతను చాటుతోంది. మరోవైపు గతేడాదితో పోలిస్తే ఆగస్టులో ఏకంగా 64 శాతం తక్కువ వర్షపాతం నమోదైంది. ఇక మిగిలిన వర్షాకాలంలో సెప్టెంబరు వర్షాలు ఏ మేరకు కురుస్తాయన్నదే తెలంగాణ వ్యవసాయ రంగానికి కీలకంగా మారింది.