కన్నెపల్లి ర్యాంప్‌లో అదనపు వ‌సూళ్లు
కాసుల దందాకు టీజీఎండీసీ అధికారుల అండ!
ఆదివారం ఒక్కో లారీకి రూ.2,500 చొప్పున వసూలు
డబ్బులివ్వని లారీ యజమానుల వాహ‌నాలు పక్కకు
తప్పేమీ లేదన్నట్లుగా అధికారుల స‌మాధానం
అక్రమాలకు క్షేత్ర‌స్థాయి అధికారుల ప్ర‌త్య‌క్ష మ‌ద్ద‌తు
కాకతీయ, తెలంగాణ బ్యూరో / భూపాలపల్లి : ఇసుక ర్యాంపుల్లో పారదర్శకంగా కార్యకలాపాలు నిర్వహించాల్సిన బాధ్యతను పర్యవేక్షణ సంస్థలు విస్మరిస్తున్నాయా? ప్రభుత్వ నిబంధనల ప్రకారం జరగాల్సిన ఇసుక లోడింగ్‌ ప్రక్రియలో అదనపు వసూళ్లకు అవకాశం కల్పిస్తున్నారా? అంటే అవున‌నే స‌మాధాన‌మే వ‌స్తోంది. జయశంకర్ భూపాలపల్లి జిల్లాలోని కన్నెపల్లి ఇసుక ర్యాంప్‌ నుంచి వెలువడుతున్న ఫిర్యాదులు.. అధికారుల స‌మాధానాలు కూడా అక్ర‌మాల‌ను బ‌హిర్గ‌తం చేస్తున్నాయి. జయశంకర్ భూపాలపల్లి జిల్లా మ‌హ‌దేవ్‌పూర్ మండ‌లంలోని కన్నెపల్లి ఇసుక ర్యాంప్‌లో అదనపు వసూళ్ల వ్యవహారంపై టీజీఎండీసీ అధికారులు విస్తుగొల్పేలా ఉంది. గ‌త కొద్దిరోజులుగా ఇసుక ర్యాంపుల్లో అదనపు వసూళ్ల ప‌ర్వంతో లారీ యజమానులు వేద‌న‌కు గుర‌వుతున్నారు. ఒక్కో లారీకి లోడింగ్‌ ఛార్జీల పేరుతో రూ.2,500 అదనంగా డిమాండ్‌ చేస్తున్నారని లారీ యజమానులు వాపోతున్నారు. ఈ క్ర‌మంలోనే ఆదివారం సైతం కన్నెపల్లి ఇసుక ర్యాంపులో అదనపు వసూళ్లకు తెగ‌బ‌డ్డారు. అడిగిన మొత్తం చెల్లించకపోతే లారీలను పక్కకు నిలిపి ఇసుక లోడింగ్‌ చేయకుండా ఇబ్బందులకు పాల్ప‌డ్డారు. ఈ ఆరోపణలపై టీజీఎండీసీలోని ఓ అధికారిణి వివ‌ర‌ణ కోరే ప్ర‌య‌త్నం చేయ‌గా.. వ‌సూళ్లు చేప‌ట్ట‌డం త‌ప్పేం కాద‌న్న‌ట్లుగా స‌మాధాన ఇవ్వ‌డం విశేషం. కాంట్రాక్ట‌ర్ల‌కు ఏ స్థాయిలో అధికారి స‌హ‌క‌రిస్తున్నాడో.. ఆయ‌న సంభాష‌ణ‌లోనే స్పష్టమవుతోంది.
లోడింగ్‌ దగ్గరే అదనపు భారం
కన్నెపల్లి ర్యాంప్‌లో ఆదివారం ఒక్కో లారీకి రూ.2,500 చొప్పున అదనంగా వసూలు చేశారని లారీ యజమానులు చెబుతున్నారు. అదనపు వసూళ్లకు స‌హ‌క‌రించని లారీలను పక్కకు పెట్టిన దృశ్యాల వీడియో కూడా కాకతీయకు చేరింది. అధికారుల‌కు ఫిర్యాదు చేసినా పట్టించుకోవడం లేదని లారీ యజమానులు వాపోతున్న ఆడియో కూడా కాకతీయకు చిక్కింది. అదనపు వ‌సూళ్ల‌తో త‌మ‌కు ద‌క్కాల్సిన కాసింత శ్ర‌మ‌ను..లాభాన్నికూడా క్వారీ య‌జ‌మానులే లాగేసుకుంటున్నార‌ని, టీజీఎండీసీ అధికారుల‌కు, ఉన్న‌తాధికారుల‌కు ఎన్ని వంద‌ల సార్లు ఫిర్యాదులు చేసినా ప‌ట్టించుకున్న పాపాన పోవ‌డం లేదంటూ ఆవేదన వ్యక్తం చేస్తున్నారు. ఇసుక కొనుగోలు, రవాణా, వాహన నిర్వహణ ఖర్చులతో ఇప్పటికే ఇబ్బందులు పడుతున్న తమపై ఈ అదనపు భారం మోపడం అన్యాయమని వాపోతున్నారు. అడిగిన డబ్బులు ఇవ్వలేమని చెప్పిన వాహనాలకు లోడింగ్‌ నిలిపివేస్తున్నారని ఆరోపిస్తున్నారు. ఫలితంగా లారీలు గంటల తరబడి వేచి ఉండాల్సి వస్తోందని, వాహనాల పని సమయం వృథా అవడంతో పాటు అదనపు నిర్వహణ ఖర్చులు పెరుగుతున్నాయని పేర్కొంటున్నారు.
ఫిర్యాదులపై స్పందన ఏదీ?
అదనపు వ‌సూళ్ల‌పై ఎన్నిమార్లు ఫిర్యాదు చేసినా ఫలితం కనిపించడం లేదని లారీ యజమానులు వాపోతున్నారు. ఫిర్యాదులు అందినప్పుడు క్షేత్రస్థాయిలో తనిఖీలు నిర్వహించి, వసూళ్లకు సంబంధించిన రికార్డులను పరిశీలించి, బాధ్యులపై చర్యలు తీసుకోవాల్సిన అధికారులు స్పందించడం లేదని విమర్శిస్తున్నారు. అయితే అధికారులు ఉద్దేశపూర్వకంగా నిర్లక్ష్యం చేస్తున్నార‌నేది స్పష్టమవుతోంది. నిబంధనల ప్రకారం బిల్లులు చెల్లించిన లారీ యజమానుల నుంచి ఇసుక రైజింగ్‌ కాంట్రాక్టర్లు మళ్లీ అదనపు వసూళ్లకు పాల్పడుతున్నారనే విమర్శలు వెల్లువెత్తుతున్నాయి. ఈ వ్యవహారంపై అధికార యంత్రాంగం పట్టించుకోవడం లేదని, అక్రమాలు జరుగుతున్నా ప్రత్యక్షంగా చూస్తూ మిన్నకుండిపోతోందని లారీ యజమానులు ఆవేదన వ్యక్తం చేస్తున్నారు. ఓవర్‌లోడ్‌, నకిలీ వేబిల్లులు, రాత్రివేళల్లో ఇసుక రవాణా, నదీ గర్భంలో యథేచ్ఛగా తవ్వకాలు వంటి అంశాలు ఇసుక ర్యాంపుల వద్ద తరచూ చర్చకు వస్తున్నాయి. ఇన్ని ఫిర్యాదులు, విమర్శలు వినిపిస్తున్నా వాటిపై సమగ్ర తనిఖీలు, పారదర్శక విచారణ జరుగుతున్నాయా అన్న ప్రశ్నలు తలెత్తుతున్నాయి. అధికార యంత్రాంగం, ప్రజాప్రతినిధుల అండ ఉందనే విమర్శల నేపథ్యంలో, అక్రమాలపై ప్రశ్నించేవారి ఆరోపణలుగా కొట్టిపారేస్తున్నారనే అభిప్రాయాలు వ్యక్తమవుతున్నాయి. ఇసుక రవాణా, లోడింగ్‌ ఛార్జీలు, వేబిల్లులు, తవ్వకాలపై సంబంధిత అధికారులు క్షేత్రస్థాయిలో తనిఖీలు నిర్వహించి వాస్తవాలను వెల్లడించాలని స్థానికులు కోరుతున్నారు.
