జనగామ అభివృద్ధికి రూ.40 కోట్లకు పైగా పనులు
పారిశుధ్యానికి పెద్దపీట.. రూ.1.77 కోట్లతో వాహనాలు
54 మందికి నియామక పత్రాలు అందజేత
మురుగు నీటి శుద్ధి ప్లాంట్కు రూ.38 కోట్లతో శ్రీకారం
విద్య, వైద్య, మౌలిక వసతుల పనులకు శంకుస్థాపనలు
జనగామ అభివృద్ధికి ప్రాధాన్యమిస్తున్నాం
రాష్ట్ర గృహ నిర్మాణం, రెవెన్యూ, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి
కాకతీయ, జనగామ : జనగామ జిల్లా అభివృద్ధికి రూ.40 కోట్లకు పైగా విలువైన పలు అభివృద్ధి పనులకు రాష్ట్ర గృహ నిర్మాణం, రెవెన్యూ, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి శనివారం శ్రీకారం చుట్టారు. జనగామ మున్సిపల్ కార్యాలయంలో జ్యోతి ప్రజ్వలనతో కార్యక్రమాన్ని ప్రారంభించిన మంత్రి.. పారిశుధ్యం, విద్య, వైద్యం, మౌలిక వసతులకు సంబంధించిన పనులకు శంకుస్థాపనలు చేశారు. జనగామ మున్సిపాలిటీకి రూ.1.77 కోట్ల విలువైన 16 చెత్త సేకరణ ఆటోలు, ఒక జేసీబీని మంత్రి జెండా ఊపి ప్రారంభించారు. మున్సిపాలిటీలో పనిచేసేందుకు ఎంపికైన 30 మంది శానిటరీ వర్కర్లు, 20 మంది డ్రైవర్లు, నలుగురు ఎలక్ట్రీషియన్లు కలిపి 54 మందికి నియామక పత్రాలు అందజేశారు. రూ.2 కోట్లతో చేపట్టనున్న డంపింగ్ యార్డు షెడ్, మెషినరీ పనులకు, రూ.38 కోట్లతో నిర్మించనున్న మురుగు నీటి శుద్ధి ప్లాంట్కు శంకుస్థాపన చేశారు.
తహసీల్దార్ కార్యాలయం.. పాఠశాలల్లో పనులు
తరిగొప్పుల మండలంలో రూ.2.25 కోట్లతో నిర్మించనున్న తహసీల్దార్ కార్యాలయ భవనానికి శంకుస్థాపన చేశారు. బచ్చన్నపేట మండలం కట్కూర్ జెడ్పీహెచ్ఎస్, ఎంపీపీఎస్ పాఠశాలల్లో రూ.38.75 లక్షలతో చేపట్టనున్న మరమ్మతులు, పునరుద్ధరణ పనులకు శిలాఫలకాలను ఆవిష్కరించారు. పోచన్నపేట ఎంపీపీఎస్లో రూ.24 లక్షలు, రామచంద్రాపురం ఎంపీపీఎస్లో రూ.23 లక్షలు, జనగామలోని కోర్టు సమీపంలోని జెడ్పీ ఉన్నత పాఠశాల బాలికల విభాగంలో రూ.20 లక్షలతో అదనపు తరగతి గదుల నిర్మాణానికి శ్రీకారం చుట్టారు. జిల్లాలోని 12 కేజీబీవీలు, 15 పీఎం శ్రీ పాఠశాలలు, 28 జెడ్పీహెచ్ఎస్ బాలికల పాఠశాలల్లో రూ.1,92,31,996 వ్యయంతో అవుట్డోర్ బాస్కెట్బాల్ కోర్టుల నిర్మాణ పనులను ప్రారంభించారు. విద్యార్థులకు విద్యతోపాటు క్రీడా వసతులు అందుబాటులోకి తీసుకురావడంలో భాగంగా ఈ పనులు చేపట్టారు. జనగామ ప్రభుత్వ జనరల్ ఆసుపత్రి ఆవరణలో రూ.19.25 లక్షలతో అంతర్గత సీసీ రోడ్డు నిర్మాణానికి శంకుస్థాపన చేశారు. చంపక్ హిల్స్లోని మాతా-శిశు ఆసుపత్రిలో రూ.7.35 లక్షలతో ఆక్సిజన్ ప్లాంట్కు 50 మీటర్ల సీసీ రోడ్డు, పార్కింగ్ ప్రాంతంలో గ్రావెల్ నింపడం, సెప్టిక్ ట్యాంక్ నుంచి డ్రెయిన్ వరకు పైప్ డ్రెయిన్ ఏర్పాటుకు సంబంధించిన పనులను ప్రారంభించారు. జనగామ ఐడీఓసీ వద్ద రూ.10 లక్షలతో పార్కింగ్ టైల్స్, ఫెన్సింగ్, రూ.31 లక్షలతో కలెక్టరేట్ భవనానికి ప్రహరీ గోడ నిర్మాణ పనులకు శిలాఫలకాలు ఆవిష్కరించారు. కార్యక్రమంలో జనగామ ఎంపీ చామల కిరణ్కుమార్రెడ్డి, ఎమ్మెల్యే పల్లా రాజేశ్వర్రెడ్డి, జిల్లా కలెక్టర్ సందీప్కుమార్ ఝా, డీసీపీ రాజ మహేంద్ర నాయక్, మున్సిపల్ చైర్పర్సన్ కడకంచి బాలమణి, మున్సిపల్ కమిషనర్ రాజశేఖర్రెడ్డి, ప్రజాప్రతినిధులు, అధికారులు పాల్గొన్నారు.
