విద్యార్థులు చట్టాలపై అవగాహన పెంచుకోవాలి
హక్కులు, బాధ్యతలు తెలుసుకోవడం ప్రతి విద్యార్థి బాధ్యత
సైబర్ నేరాలు, బాలల హక్కులపై అవగాహన అవసరం
కరీంనగర్ జిల్లా ఉపసర్పంచుల ఫోరం అధ్యక్షుడు ఆకుబత్తిని విజయ్కుమార్
కాకతీయ, శంకరపట్నం : కేశవపట్నం ప్రభుత్వ ఉన్నత పాఠశాలలో మండల న్యాయ సేవా సమితి–హుజూరాబాద్ ఆధ్వర్యంలో విద్యార్థులకు న్యాయ విజ్ఞాన సదస్సు నిర్వహించారు. కార్యక్రమంలో కేశవపట్నం ఉపసర్పంచ్, కరీంనగర్ జిల్లా ఉపసర్పంచుల ఫోరం అధ్యక్షుడు ఆకుబత్తిని విజయ్కుమార్ పాల్గొని విద్యార్థులను ఉద్దేశించి మాట్లాడారు. చిన్ననాటి నుంచే హక్కులు, బాధ్యతలు, చట్టాలపై అవగాహన పెంచుకోవాలని సూచించారు. బాలల హక్కులు, బాల్య వివాహాల నిషేధం, వేధింపులు, బుల్లీయింగ్, సైబర్ నేరాలు, సామాజిక మాధ్యమాల వినియోగంపై అవగాహన కల్పించారు. ఇంటర్నెట్ను బాధ్యతాయుతంగా వినియోగించాలని, అపరిచితులతో వ్యక్తిగత వివరాలు, ఓటీపీలు, పాస్వర్డ్లు పంచుకోవద్దని సూచించారు. వేధింపులు, బెదిరింపులు ఎదురైతే భయపడకుండా తల్లిదండ్రులు, ఉపాధ్యాయులు లేదా సంబంధిత అధికారులను ఆశ్రయించాలని తెలిపారు. చట్టం అందరికీ సమానమని, న్యాయం పొందేందుకు న్యాయ సేవా సంస్థలు అందుబాటులో ఉన్నాయని వివరించారు. విద్యార్థులు తమ హక్కులను తెలుసుకోవడంతోపాటు ఇతరుల హక్కులను గౌరవించాలని విజయ్కుమార్ సూచించారు. కార్యక్రమంలో న్యాయ సేవా సమితి ప్రతినిధులు, న్యాయవాదులు దేవయ్య, నరసింహస్వామి, బక్కి అనిల్, పాఠశాల ప్రధానోపాధ్యాయుడు సుభాష్, ఉపాధ్యాయులు, విద్యార్థులు పాల్గొన్నారు.
