గ్రామ ప్రజల ఆరోగ్యం కోసమే హెల్త్ క్యాంప్
చిన్ననాగారం సర్పంచ్ చెడుపాక సుజాత యాకయ్య
177 మందికి వైద్య పరీక్షలు.. ఉచిత మందుల పంపిణీ
కాకతీయ, ఇనుగుర్తి: గ్రామ ప్రజల ఆరోగ్యం కోసమే ఉచిత వైద్య శిబిరం ఏర్పాటు చేయించినట్లు సర్పంచ్ చెడుపాక సుజాత యాకయ్య తెలిపారు. మంగళవారం ఇనుగుర్తి మండలం చిన్ననాగారంలో సేవ్ యువర్ లివర్ ఫౌండేషన్, సాయిరాం హాస్పిటల్స్ సహకారంతో ఉచిత వైద్య శిబిరం, మందుల పంపిణీ నిర్వహించారు. సర్పంచ్ చెడుపాక సుజాత యాకయ్య, ఎంపీడీవో పార్థసారధి, వార్డు సభ్యులు శిబిరాన్ని ప్రారంభించారు. గ్రామంలోని పేదలు వివిధ రుగ్మతలతో ఇబ్బందులు పడుతున్న నేపథ్యంలో ఖమ్మం నుంచి వైద్య నిపుణులు వచ్చి సేవలందించడం అభినందనీయమని సర్పంచ్ తెలిపారు. సేవ్ యువర్ లివర్ ఫౌండేషన్, సాయిరాం హాస్పిటల్స్ ఆధ్వర్యంలో ఉచిత వైద్య శిబిరాలు నిర్వహించడం అభినందనీయమని ఎంపీడీవో పార్థసారధి అన్నారు. సుమారు 25 మంది వైద్యులు, నర్సులు, ల్యాబ్ టెక్నీషియన్లు, ఫార్మసిస్టులు సేవలందించారని తెలిపారు. వివిధ వ్యాధులతో బాధపడుతున్న 177 మందికి వైద్య సేవలు అందించి, పరీక్షల అనంతరం ఉచిత మందులు పంపిణీ చేసినట్లు ఫౌండేషన్ డైరెక్టర్ గెడ్డం సామ్యూల్ తెలిపారు. డాక్టర్ ప్రశాంతి, డాక్టర్ పవన్, వైద్య సిబ్బంది సేవలందించారు. మాజీ సర్పంచ్ బైరు చిన్న బాలయ్య, వార్డు సభ్యులు నిడిగంటి చంద్రమౌళి, మునిగంటి సరిత రాజు, చెడుపాక అలివేలు వెంకన్న, బైరు నాగన్న, కొయ్యడి యాదగిరి, బత్తిని రాములు గౌడ్, పెదగోని వెంకటయ్య, బైరు యాకయ్య తదితరులు పాల్గొన్నారు.
