2028 ఎన్నికల్లో బీసీల రాజకీయ సునామీ!
ఓటు యుద్ధంతో రాజ్యాధికారం సాధిస్తాం
ప్రాతినిధ్యం కల్పించని పార్టీలకు రాజకీయంగా బుద్ధి చెబుతాం
బీసీ కులగణన కోసం దేశవ్యాప్త ఉద్యమం అవసరం
బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌ గౌడ్‌
కాకతీయ, హైదరాబాద్ : ఓటు అనే ఆయుధంతో బీసీలంతా ఐక్యంగా నిలిస్తే వచ్చే ఎన్నికల్లో బీసీలే పాలకులవుతారని బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌ గౌడ్‌ అన్నారు. 2028 ఎన్నికల్లో బీసీలు రాజకీయ సునామీ సృష్టిస్తారని, రాజకీయ ప్రాతినిధ్యం కల్పించని పార్టీలకు తగిన గుణపాఠం చెబుతామని హెచ్చరించారు. శుక్రవారం హైదరాబాద్‌లోని సుందరయ్య విజ్ఞాన కేంద్రం దొడ్డి కొమరయ్య హాల్‌లో కనకాల శ్యాం కుర్మ అధ్యక్షతన జరిగిన బీసీ యువజన సంఘం రాష్ట్ర విస్తృతస్థాయి సమావేశంలో ఆయన మాట్లాడారు. జనాభాలో 60 శాతం ఉన్న బీసీలకు అసెంబ్లీ, పార్లమెంటులో తగిన రాజకీయ ప్రాతినిధ్యం లేకపోవడం అన్యాయమని జాజుల శ్రీనివాస్‌ గౌడ్‌ అన్నారు. బీసీల ఓట్లతో అధికారంలోకి వస్తున్న పార్టీలు వారికి సీట్లు కేటాయించడం లేదని, కులగణన చేపట్టి జనాభా దామాషా ప్రకారం రిజర్వేషన్లు కల్పించడం లేదని విమర్శించారు. యువత ఇప్పటి నుంచే రాజకీయ చైతన్యంతో ఓటు యుద్ధానికి సిద్ధం కావాలని పిలుపునిచ్చారు. రాష్ట్ర ప్రభుత్వ సలహాదారు, మాజీ ఎంపీ వి.హనుమంతరావు మాట్లాడుతూ బీసీల్లో రోజురోజుకూ రాజకీయ చైతన్యం పెరుగుతోందన్నారు. ఈ చైతన్యాన్ని విస్మరించే పార్టీలు అధికారంలోకి రావడానికి వీలులేదని పేర్కొన్నారు. బీసీ కులగణన కోసం దేశవ్యాప్త ఉద్యమం చేపట్టాలని పిలుపునిచ్చారు. మాజీ స్పీకర్‌, ప్రస్తుత శాసనమండలిలో బీఆర్‌ఎస్‌ పక్షనేత సిరికొండ మధుసూదనాచారి మాట్లాడుతూ బీసీలు రాజకీయాల్లో యాచించే స్థాయి నుంచి శాసించే స్థాయికి ఎదగాలని, అన్ని పార్టీలు బీసీ ముఖ్యమంత్రి రావాలని కోరుకుంటున్న ప్రజల ఆకాంక్షను గుర్తించాలని అన్నారు.
బీసీ యువజన సంఘం రాష్ట్ర అధ్యక్షుడిగా ఈడిగ శ్రీనివాస్‌
సమావేశంలో బీసీ యువజన సంఘం రాష్ట్ర అధ్యక్షుడిగా ఈడిగ శ్రీనివాస్‌ గౌడ్‌ను జాజుల శ్రీనివాస్‌ గౌడ్‌ నియమించారు. తాండూరు పట్టణం రెడ్డిగణపురం గ్రామానికి చెందిన శ్రీనివాస్‌ గౌడ్‌ విద్యార్థి దశ నుంచి 15 ఏళ్లుగా బీసీ ఉద్యమంలో క్రియాశీలకంగా పనిచేస్తున్నారని, జిల్లా అధ్యక్షుల సూచన మేరకు ఈ నియామకం చేపట్టినట్లు తెలిపారు. ఈ సందర్భంగా శ్రీనివాస్‌ గౌడ్‌ మాట్లాడుతూ రాష్ట్ర అధ్యక్ష పదవిని అలంకారంగా కాకుండా బాధ్యతగా స్వీకరిస్తున్నానని, గ్రామస్థాయి నుంచి సంఘాన్ని బలోపేతం చేసి బీసీల రాజకీయ అధికార సాధనకు కృషి చేస్తానన్నారు. సమావేశంలో గుజ్జ కృష్ణ, కుందారం గణేష్‌ చారి, కుల్కచర్ల శ్రీనివాస్‌ ముదిరాజ్‌, తాటికొండ విక్రమ్‌ గౌడ్‌, రావులకోల్‌ నరేష్‌ ప్రజాపతి, గొడుగు మహేష్‌ యాదవ్‌, పిట్ల శ్రీధర్‌, ఉప్పరి శేఖర్‌ సగర, కాటేపల్లి వీరస్వామి, కౌల జగన్నాథం, చంద్రశేఖర్‌ గౌడ్‌, డాక్టర్‌ రామాదేవి, పానుగంటి విజయ్‌, జాజుల లింగం గౌడ్‌, గూడూరు భాస్కర్‌ మేరు, కొప్పుల చందు గౌడ్‌, బూడిద మల్లికార్జున్‌ యాదవ్‌, తారకేశ్వరి, సంధ్యారాణి, గోద వరుణ్‌ కుమార్‌ గౌడ్‌, గౌతమి, స్వర్ణ గౌడ్‌, ఇంద్రం రజక, గజ్జెల సత్యరాజ్‌ గౌడ్‌, లక్ష్మణ్‌, సిద్ధాంతం శ్యామల, గుంటి మహేష్‌, దేవిక, శ్రావణి, పద్మావతి తదితరులు పాల్గొన్నారు.
