పాకాల సరస్సులో ఇద్దరు చిన్నారులతో కలిసి వివాహిత ఆత్మహత్య
*మృతురాలు గీసుగొండ మండలం ఎలుకుర్తి హవేలీ గ్రామానికి చెందిన ఈరెల్లి మమతగా గుర్తింపు..
*కుటుంబ కలహాలే కారణమని ప్రాథమిక సమాచారం.. భర్త మరో మహిళతో సంబంధం కొనసాగిస్తున్నాడని గ్రామస్తుల ఆరోపణ..
కాకతీయ, గీసుగొండ/ఖానాపూర్:
కుటుంబ కలహాలతో మనస్తాపానికి గురైన ఓ వివాహిత తన ఇద్దరు చిన్న కుమార్తెలతో కలిసి పాకాల సరస్సులో దూకి ఆత్మహత్యకు పాల్పడిన విషాద ఘటన వరంగల్ జిల్లాలో చోటుచేసుకుంది. ఖానాపురం మండలంలోని పాకాల సరస్సులో గీసుగొండ మండలం ఎలుకుర్తి హవేలీ గ్రామానికి చెందిన ఈరెల్లి మమత (30),తన కుమార్తెలు హర్షిణి (4),కావ్య (3)తో కలిసి ప్రాణాలు విడిచారు. భర్త మరో మహిళతో వివాహేతర సంబంధం కొనసాగిస్తున్నాడనే విషయమై భార్యాభర్తల మధ్య తరచూ గొడవలు జరుగుతున్నాయని, ఈ క్రమంలో తీవ్ర మనస్తాపానికి గురైన మమత ఈ అఘాయిత్యానికి పాల్పడినట్లు గ్రామస్తులు చెబుతున్నారు. గ్రామస్తులు తెలిపిన వివరాల ప్రకారం.. ఎలుకుర్తి హవేలీ గ్రామానికి చెందిన ఈరెల్లి సుమన్ సుమారు ఎనిమిదేళ్ల క్రితం హసన్‌పర్తి మండలం బైరాన్‌పల్లికి చెందిన మమతను ప్రేమ వివాహం చేసుకున్నారు. వీరికి ఇద్దరు కుమార్తెలు జన్మించారు.సుమన్ ట్రాక్టర్ డ్రైవర్‌గా పనిచేస్తుండగా, మమత నర్సంపేటలోని ఓ ప్రైవేట్ ఆసుపత్రిలో ఆయాగా పనిచేస్తూ కుటుంబాన్ని పోషించు కుంటున్నారు.ఈ క్రమంలో సుమన్ మరో మహిళతో వివాహేతర సంబంధం కొనసాగిస్తున్నాడని,ఈ విషయమై మమత ప్రశ్నించడంతో దంపతుల మధ్య తరచూ గొడవలు జరుగుతున్నాయని గ్రామస్తులు తెలిపారు. ఈ పరిణామాలతో మనస్తాపానికి గురైన మమత తన ఇద్దరు చిన్నారులతో కలిసి పాకాల సరస్సులో దూకినట్లు పేర్కొన్నారు.సమాచారం అందుకున్న ఖానాపురం ఎస్ఐ రామ్మోహన్ ఘటనాస్థలానికి చేరుకొని వివరాలు సేకరించారు. ఘటనకు సంబంధించిన పూర్తి వివరాలు,ఆత్మహత్య కు దారితీసిన పరిస్థితులపై పోలీసులు దర్యాప్తు చేస్తున్నారు.తల్లితో పాటు ఇద్దరు చిన్నారులు మృతి చెందడంతో ఎలుకుర్తి హవేలీ గ్రామంలో విషాదఛాయలు అలుముకున్నాయి.
