ఆయన పదవి చేపట్టకపోయినా చంపేస్తారు
రాజీవ్‌ మాటలతో గుండె పగిలింది!
ఇందిరా హత్య జరిగిన రోజును గుర్తుచేసుకున్న సోనియా గాంధీ
ప్రధాని పదవి వద్దని రాజీవ్‌ను వేడుకున్నానని వెల్లడి
తన ఆత్మకథ ‘బిలాంగింగ్‌: ఏ జర్నీ ఆఫ్‌ లవ్‌’లో కీలక విషయాలు
1984 అక్టోబర్‌ 31 నాటి భయానక ఘటనల ప్రస్తావన
రాహుల్‌, ప్రియాంకల ఆవేదనను పంచుకున్న కాంగ్రెస్‌ నేత
పుస్తక ప్రచురణ, సెన్సార్‌షిప్‌ వివాదంపైనా స్పందన
కాకతీయ, నేష‌న‌ల్ డెస్క్ : “ప్రధాని పదవి చేపడితే మీ ప్రాణాలకు ప్రమాదం పొంచి ఉంది.. దయచేసి ఆ పదవి వద్దు” అని రాజీవ్‌ గాంధీని వేడుకున్నానని కాంగ్రెస్‌ పార్లమెంటరీ పార్టీ అధినేత్రి సోనియా గాంధీ వెల్లడించారు. ఇందిరా గాంధీ హత్య జరిగిన రోజే రాజీవ్‌ను ప్రధానిగా ప్రమాణ స్వీకారం చేయాలని కోరిన సందర్భాన్ని గుర్తుచేసుకుంటూ, ఆ మాట వినగానే గుండెల్లో కత్తి దించినట్లయిందని తన వేదనను వివరించారు. అయితే తాను పదవి చేపట్టకపోయినా తనను ఎలాగైనా చంపేస్తారని రాజీవ్‌ బదులిచ్చినట్లు తెలిపారు. భారత రాజకీయ చరిత్రలో కీలకమైన ఈ పరిణామాలతో పాటు తన జీవితంలోని వ్యక్తిగత విషాదాలను త్వరలో విడుదల కానున్న ఆత్మకథ ‘బిలాంగింగ్‌: ఏ జర్నీ ఆఫ్‌ లవ్‌’లో సోనియా గాంధీ పంచుకున్నారు. 1984 అక్టోబర్‌ 31న జరిగిన ఘటనలను సోనియా తన పుస్తకంలో వివరించారు. ఇందిరా గాంధీ తన నివాసమైన 1, సఫ్దర్‌జంగ్‌ రోడ్‌లోని కార్యాలయానికి బయలుదేరిన కొద్దిసేపటికే తాను గదికి తిరిగి వచ్చానని తెలిపారు. స్నానానికి సిద్ధమవుతున్న సమయంలో వరుసగా పేలుళ్లలాంటి శబ్దాలు వినిపించాయని, అవి టపాసుల శబ్దాల్లా అనిపించినా ఏదో తేడా కనిపించిందని పేర్కొన్నారు. అంతలో పిల్లల నానీ ఒంగ్ము భయంతో బాత్రూమ్‌ తలుపు బాదుతూ వచ్చి గార్డెన్‌వైపు సైగ చేసిందని చెప్పారు. తాను పరుగెత్తుకుంటూ వెళ్లేసరికి ఇందిరా గాంధీని తెల్ల అంబాసిడర్‌ కారులోకి తీసుకెళ్తున్నారని, ఆమె చీరపై, ఛాతీపై రక్తం కనిపించిందని గుర్తుచేసుకున్నారు. కళ్లు తెరిచి ఉన్నప్పటికీ ఆమె స్పందించలేదని రాశారు.
పిల్లల భద్రతపై తల్లడిల్లిన మనసు
భారీ ట్రాఫిక్‌ కారణంగా కారు నెమ్మదిగా కదిలిందని, మధ్యలో సిగ్నళ్ల వద్ద కూడా ఆగాల్సి వచ్చిందని సోనియా పేర్కొన్నారు. కారులో సైరన్‌ కూడా లేదని గుర్తుచేసుకున్నారు. ఆస్పత్రికి చేరుకున్న తర్వాత పరిస్థితులు గందరగోళంగా ఉన్నాయని, తనకు ఏం జరుగుతుందో అర్థం కాలేదని తెలిపారు. రాజీవ్‌ ఎక్కడున్నారు? పిల్లలు ఎక్కడున్నారు? వారిని సురక్షితంగా ఇంటికి ఎలా తీసుకురావాలి? అనే ఆలోచనలు తనను వెంటాడాయని పుస్తకంలో రాశారు. 1984 అక్టోబర్‌ 31 మధ్యాహ్నం రెండు గంటలకు ఇందిరా గాంధీ మరణించినట్లు వైద్యులు ప్రకటించారని సోనియా తెలిపారు. ఆ వార్తతో తాను కన్నీళ్లను ఆపుకోలేకపోయానని చెప్పారు. ఇంటికి చేరుకున్న తర్వాత రాహుల్‌, ప్రియాంక కన్నీళ్లతో తనను కౌగిలించుకున్నారని గుర్తుచేసుకున్నారు. ఇంట్లో సిబ్బంది ఏడుస్తుండటాన్ని చూసిన పిల్లలు ‘పాపా ఎక్కడ? దాదీకి ఏమైంది? మీరు నిజం చెప్పట్లేదు’ అంటూ ప్రశ్నించారని వివరించారు. అదే రోజు రాజీవ్‌ ప్రధానిగా బాధ్యతలు చేపట్టాలన్న ప్రతిపాదన వచ్చినప్పుడు ఆయన ప్రాణాలకు ముప్పు ఉంటుందనే భయంతో ఆ పదవిని వద్దని వేడుకున్నట్లు తెలిపారు.
ఆత్మకథలో వ్యక్తిగత జీవితంతో పాటు రాజకీయ మలుపులు
‘బిలాంగింగ్‌: ఏ జర్నీ ఆఫ్‌ లవ్‌’ పేరుతో వెలువడనున్న తన ఆత్మకథలో సోనియా గాంధీ భారత రాజకీయాలను ప్రభావితం చేసిన చారిత్రక పరిణామాలతో పాటు కుటుంబ జీవితంలోని అనుభవాలను కూడా వివరించారు. ఈ పుస్తకం నవంబర్‌ 10న మార్కెట్లోకి రానున్నట్లు అందించిన సమాచారం పేర్కొంటోంది. బ్రిటన్‌కు చెందిన ‘ది గార్డియన్‌’ పత్రిక పుస్తకంలోని కొన్ని భాగాలను ప్రచురించడంతో ఇందిరా హత్య, రాజీవ్‌ ప్రధాని బాధ్యతలు స్వీకరించిన సందర్భంపై సోనియా చేసిన వ్యాఖ్యలు రాజకీయ వర్గాల్లో చర్చకు దారితీశాయి. తన ఆత్మకథ ప్రచురణకు సంబంధించి తలెత్తిన సెన్సార్‌షిప్‌ వివాదంపైనా సోనియా స్పందించినట్లు కథనం పేర్కొంటోంది. కేంద్ర ప్రభుత్వంపై పుస్తకంలో చేసిన విమర్శల విషయంలో ప్రచురణ సంస్థ పెంగ్విన్‌ రాండమ్‌ హౌస్‌ ఇండియా అసౌకర్యానికి, ఆందోళనకు గురైందని ఆమె వ్యాఖ్యానించినట్లు తెలిపింది. తొలుత పుస్తక ప్రచురణపై ఆసక్తి చూపిన సంస్థ ఆ తర్వాత భారత్‌లో ప్రచురించలేమని వెనక్కి తగ్గడం నిరాశ కలిగించిందని సోనియా పేర్కొన్నట్లు వివరించింది. వ్యక్తిగత విషాదాలు, రాజకీయ పరిణామాలు, ప్రచురణ వివాదం వంటి అంశాలు ఈ ఆత్మకథ విడుదలకు ముందే దేశవ్యాప్తంగా ఆసక్తిని రేకెత్తిస్తున్నాయి.
