భూ వివాదంపై తహసీల్దార్‌కు రైతు వినతి
కాకతీయ, పెద్దవంగర : తన పూర్వీకుల నుంచి సాగు చేసుకుంటున్న భూమిపై కొనసాగుతున్న వివాదాన్ని పరిష్కరించి న్యాయం చేయాలని పెద్దవంగర మండల కేంద్రానికి చెందిన రైతు సంకెపల్లి రవీందర్‌రెడ్డి తహసీల్దార్‌కు వినతిపత్రం సమర్పించారు. 2023 నుంచి భూ వివాదం కొనసాగుతోందని, ఈ వారం నుంచి సమస్య మరింత తీవ్రమైందని తెలిపారు. తాము సాగు చేస్తున్న భూమిని ఇతరులు అక్రమంగా ఆక్రమించడమే కాకుండా తనపై దాడులకు పాల్పడుతున్నారని ఆవేదన వ్యక్తం చేశారు. ఈ సమస్యపై ఇప్పటికే ఆర్డీవో, తహసీల్దార్‌, కలెక్టర్‌ కార్యాలయాలను పలుమార్లు ఆశ్రయించినా పరిష్కారం లభించలేదని పేర్కొన్నారు. తన వద్ద ఉన్న భూమి పత్రాలను పరిశీలించి సమగ్ర విచారణ జరపాలని, భూమిపై తన హక్కులను పరిరక్షించి వివాదాన్ని త్వరితగతిన పరిష్కరించాలని అధికారులను కోరారు.
